Rasiejski CVK zabaraniŭ vykarystoŭvać u vybarčaj kampanii partrety kiraŭnikoŭ dziaržaŭ biaź ichniaj zhody. Faktyčna heta zachad suprać Alaksandra Łukašenki. Na ŭsialaki pažarny.

Jak viadoma, vobrazy biełaruskaha dy venesuelskaha prezydentaŭ miełasia skarystać u pieradvybarčaj ahitacyi KPRF. Čavesu što, jon moža i zhadzicca. A voś dla jahonaha mienskaha kalehi sytuacyja ryzykoŭnaja.

Uviesnu Łukašenka ŭžo musiŭ zapeŭnivać Maskvu, što nia maje namieraŭ hulać na rasiejskim palityčnym poli. Pamiatajecie, tady tam raptam paŭstała ekzatyčnaja inicyjatyva jahonych adeptaŭ "Łukašenka-2008" ź idejaj prasunuć kumira ŭ Kreml. A nieŭzabavie ab žadańni bačyć jaho svaim lideram zajavili stvaralniki nacyjanał-patryjatyčnaj partyi "Vialikaja Rasieja". Kamanda Pucina, treba dumać, była nie ŭ zachapleńni, i ad tych inicyjatyvaŭ daviałosia aperatyŭna dystancyjavacca.

Zaraz voś i siabra Ziuhanaŭ moža zastacca bieź pijaraŭskaha kozyra. "A ciapier na zajaŭku čalcoŭ CVK hučyć staradaŭni ramans "Ja vam viartaju vaš partret…". Karaciej, nia taja sytuacyja, kab dražnić husiej za kramloŭskaj aharodžaj.

Eksperty schilajucca da dumki, što hetym razam biełaruski bok naŭrad ci palezie u rasiejskuju elektaralnuju buču (kali nie ličyć latentnaha finansavaha siłkavańnia asobnych siabroŭ). Mienski palitolah Mikałaj Łukša kaža: "Dumaju, što zaraz nadyjšoŭ čas, kali Łukašenka budzie pavodzić siabie vielmi cicha i vielmi dobra dumać nad tym, što, jak i kali jon havoryć". Na dumku eksperta, "u biełaruskaj ułady ŭžo źjaŭlajecca razumieńnie, što lubyja rezkija vykazvańni i ruchi mohuć sustreć dastatkova žorstkuju reakcyju z boku Rasiei. Niejkich čyńnikaŭ, što abmiažoŭvali b hetuju žorstkuju reakcyju, zastajecca ŭsio mieniej dy mieniej".

Zrešty, inšy ekspert — Andrej Fiodaraŭ dapuskaje, što partretny vyklik Kramlu imavierny. I pryvodzić prykład demanstratyŭnaj sustrečy Łukašenki z emisaram Saakašvili. "Heta byŭ pijaraŭski krok, bo uvohule prymać ministra ŭnutranych spraŭ inšaj krainy — nie prezydencki ŭzrovień", — kaža Fiodaraŭ. Dyj ciopłyja zajavy pra namier raźvivać stasunki z Tbilisi — kaniešnie ž, jak sol na rany Maskvie.

Naziralniki ćvierdziać, što Saakašvili moh pajści na kantakt niajnačaj jak z padačy Vašynhtonu. Naš mižnarodnik Raman Jakaŭleŭski nie vyklučaje, što Miensk maje pryceł na HUAM — u statucie naziralnika.

Va ŭsiakim razie, suvoryja realii abjektyŭna padšturchoŭvajuć Miensk da alternatyŭnych Maskvie aljansaŭ. U alternatyvie — šancy na vyžyvańnie. A davać vyjavu na plakaty Ziuhanavu — usio adno pusty numar. Toje samaje, što z šaškaj na tank.

Plakat z sajtu ruchu "Łukašenka-2008".

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?