72% apytanych biełarusaŭ ličać pahrozu devalvacyi biełaruskaha rubla realnaj ci mahčymaj, amal pałova pa-raniejšamu bolš daviarajuć dołaru ZŠA, čym biełaruskamu rublu (26,9%), tamu zvyš 62% sočać za abmiennym kursam rubla da dołara.
Takija vyniki nacyjanalnaha apytańnia, praviedzienaha ŭ vieraśni 2013 hoda Niezaležnym instytutam sacyjalna-ekanamičnych i palityčnych daśledavańniaŭ (NISEPD). Byli apytanyja 1.510 čałaviek, pamyłka reprezientatyŭnaści nie pieravyšaje 3%.
«Namahańni ŭładaŭ, skiravanyja na ŭmacavańnie nacyjanalnaj valuty, šmatlikija zapeŭnivańni ŭ tym, što nijakaj devalvacyi nie budzie, zakliki «nie słuchać «niahodnikaŭ śviadomych» i nie biehčy ŭ punkty abmienu», nie pierakonvajuć bolšaść nasielnictva», — kanstatujuć sacyjołahi.
Jany zaznačajuć, što rost cen u krainie, jaki pabiŭ rekord u Jeŭropie za pieršaje paŭhodździe, nie zastaŭsia niezaŭvažanym miljonami biełarusaŭ.
Tak, aceńvajučy najaŭnuju situacyju, tolki 27,3% skazali, što «ŭsio nie tak drenna i možna žyć», 51,3% — «žyć ciažka, ale možna ciarpieć», a 18% — «ciarpieć naša biadotnaje stanovišča ŭžo niemahčyma».
Apisvajučy svajo staŭleńnie da ciapierašniaha žyćcia, zvyš 61% skazali, što «nijak nie mohuć prystasavacca da ciapierašniaha žyćcia», što «davodzicca «krucicca», chapacca za lubuju mahčymaść zarabić, tolki b zabiaśpiečyć sabie i blizkim ciarpimaje žyćcio»
(amal 55% biełarusaŭ časta ci chacia b inšym razam davodzicca pracavać zvyšuročna), abo «zvyklisia z tym, što daviałosia admovicca ad pryvyčnaha sposabu žyćcia, abmiažoŭvajučy siabie ŭ vialikim i małym», i tolki 35,5% — «žyvu, jak i raniej, dla mianie ŭ apošnija hady ničoha asablivaha nie źmianiłasia» abo «mnie ŭdałosia vykarystać novyja mahčymaści, kab dabicca bolšaha ŭ žyćci».
«Niahledziačy na toje što kolkaść biełarusaŭ, jakija ličać, što ekanomika krainy znachodzicca ŭ kryzisie, krychu źmienšyłasia (kali ŭ červieni tak dumali 59,8%, to siońnia — 57,4%, supraćlehłaj dumki prytrymlivalisia 29,5%, siońnia — 32,4%), a ich realnyja dachody padraśli
(siaredni pamier dachodu, uklučajučy zarpłaty, piensii, dapamohi i inšyja pryrabotki, jaki prypadaŭ na adnaho člena siamji, za kvartał pavialičyŭsia z 280 da 310 dołaraŭ ZŠA), uzrovień aptymizmu, ź jakim jany hladziać u budučyniu, prykmietna źniziŭsia: kali ŭ červieni 23,7% respandentaŭ mierkavali, što «sacyjalna-ekanamičnaja situacyja ŭ Biełarusi najbližejšymi hadami pahoršycca», to siońnia tak miarkujuć 28,1% (kolkaść aptymistaŭ zastajecca na ŭzroŭni 17,5%)», — kanstatujuć aŭtary sacapytańnia.
NISEPD — najstarejšy ŭ Biełarusi niedziaržaŭny daśledčy centr, stvorany ŭ lutym 1992 hoda hrupaj vučonych, žurnalistaŭ, palitykaŭ i biźniesmienaŭ. Asnoŭnymi vidami jaho dziejnaści źjaŭlajucca: daśledavańni ŭ śfiery sacyjałohii, ekanomiki i palitałohii; infarmacyjna-kansultatyŭnaja dziejnaść; praviadzieńnie kanfierencyj i sieminaraŭ; vydavieckaja dziejnaść; prafiesijny treninh. U krasaviku 2005 hoda instytut byŭ likvidavany na padstavie rašeńnia Viarchoŭnaha suda Biełarusi i potym zarehistravany ŭ Litvie jak hramadskaja ŭstanova.
