Siońnia adbudziecca finał adboru na dziciačaje Jeŭrabačańnie.
Za prava adpravicca na konkurs zmahajecca 10 naminantaŭ, adzin ź jakich śpiavaje pa-biełarusku, dva čałavieki abrali svaim stylem łacinu, a jašče niekalki — džaz. «Naša Niva» prapanuje vam acanić maładyja biełaruskija talenty.
Rusłan Asłanaŭ – «Źviezdy zovut»
Pieršy finalist — 11-hadovy Rusłan Asłanaŭ ź Minska, na čyim rachunku ŭžo jość pieramohi na konkursach u Bałharyi i Łatvii, a taksama na Konkursie patryjatyčnaj pieśni ŭ Minsku. Jaho numar — simpatyčnaja paŭakustyčnaja bałada.
Anhielina Pipier – «My tancujem džaz»
13-hadovaja dziaŭčynka z Bresta Anhielina Pipier śpiavaje kłasičny džajv u modnaj ciapier maniery 1950-ch. Anhielina taksama paśpieła atrymać niekalki dypłomaŭ — u Biełarusi i ŭ Polščy.
Ksienija Cierašonak – «Pad parusom miečty»
Vielmi znajomy kłavišny ŭstup adkryvaje całkam siabie darosłuju pa ŭzroŭni łacinu ŭ vykanańni 13-hadovaj Ksienii Cierašonak. Kali b hetaja pieśnia hučała pa-biełarusku, było b jašče pryjemniej. Adnak toje možna skazać i pra astatnich udzielnikaŭ.
Danaja Šaršavickaja – «Prostoj motiv»
Vykanaŭca pieśni «Prostoj motiv» Danaja Šaršavickaja z Barysava, pavodle ŭłasnych słovaŭ, bačyć siabie na scenie Letniaha amfiteatra ŭ Viciebsku. Miarkujučy pa pieśni, maje na toje ŭsie šansy – pa stylistycy pieśnia nahadvaje znakamituju pieśniu Ksienii Sitnik.
Ihar Muraŭkin – «Sonca śviecić usim»
Adzinuju biełaruskamoŭnuju pieśniu ŭ finale zaśpiavaje Ihar Muraŭkin ź Lidy – pavolnaja kłavišnaja bałada, całkam u duchu darosłaha Jeŭrabačańnia.
Julija Mažyłoŭskaja – Miečty
Iznoŭ lohkija džazavyja matyvy, stvoranyja pry dapamozie hurta Chiefs Band, zdajecca, biełaruskaje dziciačaje Jeŭrabačańnie natchniajecca filmam «Stylahi». Tym nie mienš, z usich džazavych rečaŭ na konkursie «Mary» vyhladajuć najbolš cikava.
Uładlen Ivanoŭ – «Biełyje obłaka»
Jašče adna bałada, ciapier u vykanańni 12-hadovaha Uładlena Ivanova, jaki pa ŭłasnych słovach, lubić hurt Queen, što pa pieśnie bačna – miełodyja lijecca vadaspadam, jaki pieraryvajecca kłavišnymi pasažami.
Illa Vołkaŭ – «Poj so mnoj»
Jašče adzin ź finalistaŭ – Illa Vołkaŭ raspracoŭvaje tuju samuju muzyčnuju temu, što i Alena Łanskaja – lohkaja ŭschodniaja miełodyja, jakija vielmi lubiać u našaj i blizkich krainach.
Nadzieja Misiakova – «Diełovaja»
A voś tut užo adčuvajecca ŭpłyŭ sučasnaj jeŭrapiejskaj muzyki – pieśnia pra biznes-płan i raśpisanaje pachvilinna žyćcio. 13-hadovaja minčanka Nadzieja Misiakova nazyvaje siabie «Dziaŭčynka, jakaja śpiavaje». Mahčyma nie na Jeŭrabačańni, ale hetuju pieśniu my jašče pačujem.
Ania Zajcava – «My pomnim»
Pieśnia pra vialikich śpievakoŭ minułaha – ad Džona Lenana da Uładzimira Mulavina. Vielmi pradumanaja reč, adnak nie zusim upisvajecca ŭ farmat dziciačaha Jeŭrabačańnia. Tym nie mienš, varta ŭchvalić.