Nahadajem, što ŭ lipieni 2013 Kamitet dziaržaŭnaj biaśpieki zajaviŭ ab zaviadzieńni adrazu piaci kryminalnych spraŭ u dačynieńni da staršyni Biełkaapsajuza Siarhieja Sidźko, načalnika ŭpraŭleńnia kapitalnaha budaŭnictva tavarystva Dźmitryja Kałodziežnaha, jaho namieśnika Sizuka, a taksama niekalkich biznesmenaŭ. Kiraŭniki Biełkaapsajuza abvinavačvalisia ŭ atrymańni chabaraŭ, jakija dasiahali 500 tys. dalaraŭ, złoŭžyvańni ŭładaj abo słužbovymi paŭnamoctvami, kradziažach. Hetyja złačynstvy byli vyjaŭleny «ŭ chodzie praviadzieńnia mierapryjemstvaŭ pa naviadzieńni paradku ŭ budaŭničaj halinie».

 

Pavodle źviestak KDB, kiraŭniki Biełkaapsajuza i biznesmeny, ź jakimi jany byli źviazany, zajmalisia vymahalnictvam chabaraŭ za pradastaŭleńnie abjomaŭ rabot na abjektach spažyŭkaapieracyi i za prodaž inviestaram ziamielnych učastkaŭ i abjektaŭ nieruchomaści. Krychu paźniej, u žniŭni, KDB paviedamiŭ, što Dźmitryj Kałodziežny taksama, złoŭžyvajučy słužbovymi paŭnamoctvami, łabiravaŭ intaresy kamiercyjnych struktur pry budaŭnictvie kramy ŭ horadzie Lida, čym nanios tavarystvu škodu ŭ pamiery kala 700 młn rubloŭ.

 

Na hetym aficyjnaja infarmacyja pa hetaj spravie spyniłasia. Za amal dva miesiacy ni KDB, ni Śledčy kamitet, kudy pieradadziena dla rasśledavańnia kryminalnyja spravy, nie pramovili ni słova. I dla hetaha jość surjoznyja padstavy.

 

Sprava ŭ tym, što paśla pačatku rasśledavańnia ŭ Biełkaapsajuzie pačalisia masavyja pravierki, u jakija byli ŭciahnutyja nie tolki KDB, ale taksama roznyja padraździaleńni MUS, Departamienta finansavych rasśledavańniaŭ Kamiteta dziaržkantrolu i prakuratury. Pryčym pravierki pravodzilisia nie tolki ŭ hałaŭnoj struktury, a va ŭsioj kamiercyjnaj sietcy hramadstva, jakaja siońnia naličvaje bolš za 300 roznych jurydyčnych asob, u tym liku kala 10 tys. mahazinaŭ, raźmieščanych u asnoŭnym u sielskaj miascovaści i małych haradach krainy. Pravierki jašče iduć i, uličvajučy abjom dziejnaści Biełkaapsajuza, praviarajučyja pakul navat pryblizna nie mohuć skazać, kali jany zavieršacca. Adnak pieršyja vyniki pravierak dla mnohich byli šakujučymi. Pa sutnaści, kali aceńvać situacyju zboku, to možna kazać pra toje, što ŭnutry hramadstva była stvorana cełaja złačynnaja arhanizacyja, jakaja abjadnoŭvaje niekalki dziasiatkaŭ słužbovych asob, jakija atrymlivajuć prybytki ŭ samych roznych śfierach dziejnaści.

 

Praŭda, dziela abjektyŭnaści varta skazać, što Śledčy kamitet pakul nie zavodziŭ kryminalnych spravaŭ pa art.285 Kryminalnaha kodeksa (stvareńnie złačynnaj arhanizacyi albo ŭdzieł u joj). Adnak u hetym fakcie bolš prysutničaje palityčny momant, bo pryznańnie faktu isnavańnia złačynnaj bujnoj kamiercyjnaj dziaržarhanizacyi moža mieć vielmi surjoznyja nastupstvy dla krainy. Tut užo daviadziecca pytacca nie tolki z słužbovych asob Biełkaapsajuza, ale i mnohich inšych, jakija stajali nad imi. Ale fakty, jak ich ni padavaj, sami pa sabie kažuć vielmi šmat pra što. I hetych faktaŭ za apošnija dva miesiacy było vyjaŭlena stolki, što KDB, MUS, DFR KDK i Śledčy kamitet ličać za lepšaje maŭčać, čym abviaščać choć małuju častku ich.

 

Siońnia Biełkaapsajuz zajmaje faktyčna manapolnyja pazicyi ŭ sielskaj miascovaści i małych haradach Biełarusi, abjadnoŭvajučy bolš za 10 tys. abjektaŭ roźničnaha handlu. Pry hetym lubyja sproby ŭklinicca na ich terytoryju z boku bujnych pryvatnych rytejleraŭ sustrakajuć adčajny supraciŭ na ŭzroŭni miascovych uładaŭ. Pra heta nie raz zajaŭlali sami pradstaŭniki pryvatnych handlovych sietak.

 

Takoje stanovišča spraŭ zusim nie vypadkova. Bo mnohija kiraŭniki rajonnych rajpo ŭvachodziać u rajonnyja Saviety deputataŭ i, pradstaŭlajučy miascovuju ŭładu, majučy realny ŭpłyŭ, prosta nie chočuć addavać karovu, jakuju sami ž i dojać.

 

Siońnia padazravanymi pa spravach Biełkaapsajuza prachodziać bolš za 15 asob, ź jakich kala traciny - deputaty rajsavietaŭ. Jašče stolki ž na padychodzie. Heta značyć, rašeńni pa ich jašče nie vyniesiena, bo nie zavieršany pravierki, ale situacyja bolš-mienš pramaloŭvajecca. Pry hetym złačynstvy vyjaŭleny nie tolki ŭ centralnym ofisie, ale taksama praktyčna ŭ kožnaj vobłaści na samych roznych uzroŭniach. Cikava, što niekatoryja słužbovyja asoby arhanizacyi, jak tolki pačalisia apieratyŭnyja i śledčyja mierapryjemstvy, paśpiašalisia zvolnicca, spadziejučysia paźbiehnuć adkaznaści, ale heta im nie dapamahło.

 

Voś tolki niekatoryja, samyja jarkija i nie viadomyja hramadskaści fakty złačynnaj dziejnaści niekatorych słužbovych asob šyroka razhalinavanaj sietki Biełkaapsajuza, jakaja achoplivaje ŭsiu krainu. Heta tolki paćvierdžanyja dakumientalna fakty, ale na samoj spravie ich značna bolš.

 

U Salihorsku (Minskaja vobłaść) raspačata kryminalnaja sprava ŭ dačynieńni da byłoha staršyni Salihorskaha rajpo, jaki paśla zvalnieńnia staŭ indyvidualnym pradprymalnikam. Pa dadzienych baraćbitoŭ z ekanamičnymi złačynstvami UUS Minabłvykankama, u červieni 2011 hoda padazravany, złoŭžyvajučy słužbovymi paŭnamoctvami, pryčyniŭ škodu tavarystvu ŭ pamiery 480 młn rubloŭ, što dało padstavu dla kvalifikacyi jaho dziejańniaŭ pa č.3 art.426 Kryminalnaha kodeksa Biełarusi (pieravyšeńnie ŭłady abo słužbovych paŭnamoctvaŭ, učynienaje asobaj, jakaja zajmaje adkaznaje stanovišča, albo jakijapryviali da ciažkich nastupstvaŭ).

 

U Vaŭkavysku (Hrodzienskaja vobłaść) u vyniku sumiesnych dziejańniaŭ prakuratury, ABEZ i finansavaj milicyi, raspačata kryminalnaja sprava ŭ dačynieńni da deputata Vaŭkavyskaha rajonnaha Savieta deputataŭ, ciapier niepracujučaj, jakaja jašče niadaŭna zajmała pasadu dyrektara vaŭkavyskaj filii Hrodzienskaha abłasnoha spažyvieckaha tavarystva. Žančyna zvolniłasia praktyčna adrazu z pačatkam pravierak, ale heta joj nie dapamahło. Joj taksama inkryminujecca ździajśnieńnie złačynstva pa č.3 art.426 Kryminalnaha kodeksa Biełarusi z pryčynieńniem škody tavarystvu ŭ pamiery bolš za 112 młn rubloŭ.

 

Mahiloŭskaja prakuratura pa materyjałach BEZ UUS Mahiloŭskaha abłvykankama zaviała kryminalnuju spravu ŭ dačynieńni da deputata Čavuskaha rajsavieta, staršyni praŭleńnia Čavuskaha rajpo. Jon abvinavačvajecca va ŭčynieńni złačynstva pa č.3 art.424 Kryminalnaha kodeksa Biełarusi (złoŭžyvańnie ŭładaj abo słužbovymi paŭnamoctvami, ździejśnienaje słužbovaj asobaj, albo pry vykanańni funkcyjaŭ pa raździaržaŭleńni ci pryvatyzacyi dziaržaŭnaj majomaści, albo jakija paciahnuli ciažkija nastupstvy). Pa dadzienych pravaachoŭnych orhanaŭ, padazravany pryčyniŭ svaimi dziejańniami škodu tavarystvu ŭ pamiery bolš za 214 młn rubloŭ.

 

U Niaśvižy (Minskaja vobłaść) raspačata kryminalnaja sprava pa č.3 art.426 Kryminalnaha kodeksa Biełarusi ŭ dačynieńni da žančyny, jakaja jašče zusim niadaŭna zajmała pasadu staršyni praŭleńnia Niaśvižskaha rajpo, ale zvolniłasia z pačatkam pravierak. Pa dadzienych pravaachoŭnych orhanaŭ, jana ŭ sakaviku 2013 naniesła škodu tavarystvu ŭ pamiery amal 30 młn rubloŭ.

 

U Brasłaŭskim rajonie raspačata kryminalnaja sprava pa fakcie pryčynieńnia škody ŭ pamiery bolš za 260 młn rubloŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?