Pryznačany novy hienieralny dyrektar AAT «Piŭzavod Alivaryja». Jak paviedamili na pradpryjemstvie, 1 listapada 2013 hoda hetu pasadu zojmie Dzianis Šarścieńnikaŭ. Jon źmienić Michaiła Čačaniova, jaki kiravaŭ kampanijaj na praciahu šaści hadoŭ.
«Dziakujučy jaho paśpiachovamu kiraŭnictvu i vydatnym lidarskim kampietencyjam z 2008 pa 2012 hady apieracyjny prybytak «Alivaryi» pavialičyŭsia bolš jak u 8 razoŭ, u toj čas jak akcyz na piva vyras u 5,3 razu. Vytvorčaja mahutnaść kampanii pašyryłasia z 650 tys. hł da 1 młn. hł, a dola rynku vyrasła z 13,4% da 18%. U 2011—2012 hadach Čačanioŭ byŭ staršynioj savieta Hildyi pivavaraŭ Biełarusi», — adznačajecca ŭ paviedamleńni pradpryjemstva.
Na hety momant Dzianis Šarścieńnikaŭ zajmaje pasadu vice-prezidenta pa markietynhu kampanii «Bałtyka» i rehijonu Uschodniaja Jeŭropa Carlsberg Group.
Jon pačaŭ svaju karjeru ŭ hrupie ŭ 1999 hodzie, kali pryjšoŭ u adździeł markietynhu kampanii «Viena», dzie zajmaŭ roznyja pazicyi: brend-mieniedžara, nacyjanalnaha mieniedžara pa raźvićci prodažu, mieniedžara pa markietynhu, dyrektara pa markietynhu. Paśla abjadnańnia čatyroch rasijskich kampanij hrupy ŭ 2006 hodzie zajmaŭsia raźvićciom licenzijnych, biezałkaholnych i słabaałkaholnych brendaŭ, a paźniej — klučavych nacyjanalnych brendaŭ kampanii «Bałtyka». U 2008 hodzie Šarścieńnikaŭ byŭ pryznačany vice-prezidentam pa markietynhu kampanii «Bałtyka». Na praciahu 2012 hoda jon taksama kiravaŭ ekspartnymi prodažami «Bałtyki». Z kanca 2012 hoda kiruje abjadnanaj funkcyjaj markietynhu i markietynhu handlovych kanałaŭ, a taksama słužbami markietynhu ŭ kampanijach rehijonu Uschodniaja Jeŭropa.
«Ja z zadavalnieńniem pačynaju pracu ŭ kamandzie «Alivaryi». Zadačy pierad nami stajać vielmi ambicyjnyja, i novaje pryznačeńnie — vialikaja adkaznaść dla mianie. Ja ź nieciarpieńniem čakaju sustrečy z novymi kalehami i krainaj. Ja byŭ u Biełarusi niekalki razoŭ, i ŭražańni ŭ mianie ad krainy i ludziej samyja ciopłyja i pryjemnyja», — adznačaje Šarścieńnikaŭ.
Dzianis Šarścieńnikaŭ naradziŭsia 11 žniŭnia 1974 hoda ŭ Kiraŭskaj vobłaści Rasii (Viatka).
Skončyŭ Sankt-Pieciarburhski dziaržaŭny ŭniviersitet ekanomiki i finansaŭ. Maje stupień MBA pa ahulnym mieniedžmiencie Stakholmskaj škoły ekanomiki. Da Carlsberg Group pracavaŭ u Pepsi Co i ŭ adnym z najbujniejšych mižnarodnych rekłamnych ahienctvaŭ DDB. Žanaty, vychoŭvaje syna i dvuch dačok.
AAT «Piŭzavod Alivaryja» — pivavarnaja vytvorčaść, zasnavanaja jašče ŭ 1864 hodzie. Kantrolny pakiet akcyj pradpryjemstva (67,8%) naležyć Carlsberg Group — adnoj ź lidzirujučych pivavarnych hrup u śviecie, što maje šyroki partfiel brendaŭ piva i inšych napojaŭ. Vypuskaje 18 hatunkaŭ piva pad brendami «Alivaryja», «Brovar», Holsten, «Žyhuloŭskaje», źjaŭlajecca ekskluziŭnym imparcioram śpiecyjalnaha piva Eve.
