Alaksandr Kul.
Siońnia, 8 kastryčnika, biełarusy ŭ Ryzie ŭ ramkach baskietbolnaha turniru Adzinaja liha VTB zhulajuć ź miascovym VEFam.
A potym buduć dźvie chatnija sustrečy: 14 kastryčnika — «Čyrvony Kastryčnik» (Vałhahrad), 20 kastryčnika — «Niaptunas» (Kłajpieda).
Hulni tradycyjna buduć adbyvacca na «Minsk-Arenie». Pačatak u vychadnyja dni a 16-j. U budni a 19-j. Abaniemient na ŭsie 12 matčaŭ budzie kaštavać 120-150 tysiač rubloŭ. Bilety na asobnyja matčy — u rajonie 20-25 tysiač.
Lehijaniery
U mižsiezońni «Cmoki» istotna źmianili skład. Pierš za ŭsio kamanda tradycyjna pazbaviłasia ŭsich lehijanieraŭ.
Centravoha Atera Madžoka nie vielmi škada. Choć hety aŭstralijec sudanskaha pachodžańnia i staŭ lubimcam minskaj publiki, ale čakać ad jaho vyrašeńnia zvyšzadač nie vypadała. Kožnaje jahonaje nie traplańnie ŭ košyk hledačy sustrakali śmiecham: «Nu što zrabić — heta ž Madžok».
Tjery Braŭn mieŭ dośvied hulniaŭ u Nacyjanalnaj baskietbolnaj asacyjacyi («Chjustan», «Kliŭlend», «Lejkiers»). U NBA aby-kaho nie biaruć. I kali ŭ Braŭna kaciła, to spynić hetaha chłapčysku było vielmi ciažka. Praŭda, vielmi časta Braŭn na placoŭcy ščyra valaŭ durnia.
Nu, i litoviec Vidas Hiniavičus byŭ nie samym fiejeryčnym hulcom kamandy. Ale koŭdru na siabie nie ciahnuŭ, jak Braŭn. Vykonvaŭ mnostva čarnavoj pracy, byŭ adnym z tych, čyja hulnia nikoli nie padała nižej peŭnaj płanki. Na Hiniavičusa možna było spadziavacca.
Sioleta lehijanieraŭ u «Cmokach» paboleła: zamiest troch atrymali piaciarych (čatyry amierykancy i bałharyn). Amierykancy prajšli na radzimie praz univiersiteckija lihi, a potym hulali ŭ samych ekzatyčnych čempijanatach — ad Finlandyi da Vieniesueły. Jakoha jany ŭzroŭniu, pabačym užo ŭ pačatku siezona.
Strata Kudraŭcava
Lidar «Cmokaŭ» Alaksandr Kudraŭcaŭ pierabraŭsia ŭ bolš soniečnyja krai. Prynamsi bližejšy siezon biełarus budzie abaraniać kolery tureckaha «Hazijantepa». «U Turcyi baču pierśpiektyvu: kalektyŭ padabraŭsia dobry, kamanda ŭdzielničała ŭ jeŭrakubkach, mocny čempijanat», — matyvacyja Kudraŭcava.
Ź biełaruskich nabytkaŭ źviartaje na siabie ŭvahu viartańnie Vitala Lutyča.
Hety 21-hadovy chłopiec apošnija try hady pravioŭ u litoŭskim «Šaŭlai». Na siońniašni momant Lutyč źjaŭlajecca ci nie samym pierśpiektyŭnym biełaruskim baskietbalistam. Darečy, heta małodšy brat lidara biełaruskamoŭnaha rok-hurta BN Alesia Lutyča.
Kajrys
Źmianiŭsia taksama hałoŭny trenier «Cmokaŭ». Ciapier były rulavy Andrej Kryvanos budzie dapamahać u pracy litoŭskamu śpiecyjalistu Donaldasu Kajrysu. Jamu ŭsiaho 36 hadoŭ. Adnak niahledziačy na ŭzrost, litoviec paśpieŭ šmat dzie papracavać: «Łakamatyŭ-Kubań» (Rasija), «Dniapro-Azot» (Ukraina). Praŭda, pośpiechaŭ nidzie nie dasiahaŭ.
Na čale «Cmokaŭ» chacieli bačyć inšaha litoŭca — treniera žanočaj zbornaj Biełarusi pa baskietbole Rymantasa Hryhasa, — ale jon admoviŭsia ad prapanovy.
U pieršy siezon u Adzinaj lizie VTB «Cmoki» atrymali adnu pieramohu. Letaś — try. Spadziajomsia, što ŭ hetym hodzie pieramoh bu-dzie jašče bolej.
Kul: Nichto nie pavinien chadzić na baskietboł «dobraachvotna-prymusova»
Dyrektar centra ekanamičnaha raźvićcia i spartyŭnaha markietynhu «Cmokaŭ» Alaksandr Kul adkazaŭ na niekalki pytańniaŭ «Našaj Nivy».
«Naša Niva»: Čym budziecie pryvablivać ludziej na trybuny?
Alaksandr Kul: U pieršuju čarhu zapaŭnialnaść budzie zaležyć ad taho, jak hulaje kamanda. Hledziačy pa mižsiezoncy, jak «Cmoki» ŭkałvajuć, jak hulajuć, možna spadziavacca na hodny vynik. I kali pieramohi buduć, to i našamu adździełu budzie pracavać lahčej. A tak nijaki rovar my nie vynachodzim. Bu-dziem zaciahvać ludziej na trybuny rekłamaj, infarmacyjaj u ŚMI pra kłub i hulcoŭ. Taksama sioleta źjavicca maskot (viadoma, cmok), jaki budzie zabaŭlać publiku, ź im možna sfatahrafavacca.
«NN»: Na matčach chakiejnaha «Dynama» možna vypić piva. Na «Cmokach» nielha. Ci źmienicca niešta?
AK: Adnosna piva pytajucca vielmi časta. Adkažu, što chutčej «nie», čym «tak». Nakolki ja razumieju, chakiejnaje «Dynama» — heta takoje vyklučeńnie. Što datyčyć kramak charčavańnia, to jany buduć pracavać pa-raniejšamu. Što tyčycca kaviarniaŭ na «Minsk-Arenie», kab jany pracavali, patrebna publiki nie mienš, za 4 tysiačy čałaviek. Budzie stolki ludziej — kaviarni zapracujuć.
«NN»: A na jakuju aŭdytoryju raźličvajecie?
AK: Na samuju maksimalnuju. Kaniečnie, razumieju, što schodu kaśmičnych ličbaŭ nie budzie. Kali na pieršyja hulni siezona pryjdzie 2-3 tysiačy čałaviek, to budu zadavoleny. U kancy siezona raźličvaju na ličbu ŭ 6—7 tysiač.
«NN»: A što z pradukcyi z vyjavaj «Cmokaŭ» možna budzie nabyć?
AK: Niejkaja minimalnaja su-vienirka padrychtavanaja, ale hetaha małavata. My trochu abmiežavanyja ŭ srodkach. Dakładna buduć bajki, biejsbołki, mahnity. Jašče mnie chaciełasia b bačyć ramiani, kašalki, zaplečniki dy šmat čaho inšaha.
«NN»: Apošni siezon «Cmoki» nie zajmalisia zahonam na trybuny školnikaŭ dla masavaści. Tut ničoha mianiać nie budziecie?
AK: Heta naša pryncypovaja pazicyja. Nichto nie pavinien chadzić na baskietboł «dobraachvotna-prymusova». Čałaviek pavinien iści na vidovišča, jakoje jamu cikavaje, atrymlivać ad hetaha asałodu, a nie tamu, što tak kamuści treba zapoŭnić trybuny.
«NN»: Nie zusim da vas pytańnie, ale kamanda stała macniej šaj u paraŭnańni ź minułym siezonam?
AK: Bolš čym upeŭnieny ŭ hetym.
Raskład chatnich hulniaŭ
14 kastryčnika. 19:00. «Cmoki» — «Čyrvony Kastryčnik» (Vałhahrad);
20 kastryčnika. 16:00. «Cmoki» — «Niaptunas» (Kłajpieda);
3 listapada. 16:00. «Cmoki» — CSKA (Maskva);
17 listapada. 16:00. «Cmoki» — «Astana»;
1 śniežnia. 16:00. «Cmoki» — «Chimki»;
14 śniežnia. 16:00. «Cmoki» — «Čyrvonyja Kryły» (Samara);
19 studzienia. 16:00. «Cmoki» — VEF (Ryha);
16 lutaha. 16:00. «Cmoki» — «Azoŭmaš» (Maryupal);
16 sakavika. 16:00. «Cmoki» — «Tryumf» (Lubiercy).
«Cmoki-Minsk» — baskietbolny kłub, zasnavany ŭ 2006 h. Doŭhi čas vystupaŭ pad nazvaj «Minsk-2006». Pierajmienavany ŭ «Cmoki» ŭ minułym hodzie. Jak adznačyŭ Alaksandr Kul, «Cmokaŭ» možna ličyć pieršymi biełaruskimi «baskietbalistami», bo vielmi časta na vyjavach jany trymajuć u łapach kamiani, a nie miačy. Čempijon Biełarusi apošnich piaci hadoŭ.
Adzinaja liha VTB — baskietbolny turnir, stvorany ŭ 2008 h. Abjadnaŭ najmacniejšyja kłuby Uschodniaj i Paŭnočnaj Jeŭropy. Na siońniašni dzień u VTB hulajuć kamandy z Rasii, Biełarusi, Litvy, Łatvii, Estonii, Ukrainy, Kazachstana, Polščy i Čechii. Prezident Adzinaj lihi VTB - hienierał Siarhiej Ivanoŭ, kiraŭnik Administracyi prezidenta Rasii.
