Dadatkovyja ekśpiertyzy buduć praviedzienyja pa kryminalnaj spravie, zaviedzienaj u suviazi sa śmierciu ŭ minskim SIZA asudžanaha Ihara Pcičkina, paviedamili BiełTA va ŭpraŭleńni Śledčaha kamiteta Biełarusi pa Minsku.
«U metach poŭnaha, usiebakovaha i abjektyŭnaha ŭstanaŭleńnia ŭsich abstavinaŭ rasśledavańnia kryminalnaj spravy, śledstvu treba budzie praviadzieńnie praduhledžanych zakonam śledčych dziejańniaŭ i mierapryjemstvaŭ, a taksama dadatkovych ekśpiertnych daśledavańniaŭ, jakija znachodziacca ŭ kampietencyi Dziaržaŭnaha kamiteta sudovych ekśpiertyz», — adznačyli va ŭpraŭleńni.
Z maci pamierłaha, pryznanaj pa spravie paciarpiełaj, u prysutnaści abaroncy praviedzieny zapłanavanyja śledčyja dziejańni.
«U pryvatnaści, paciarpiełaja aznajomlenaja z vysnovami śpiecyjalistaŭ pa šerahu zavieršanych ekśpiertyz», - patłumačyli BiełTA va ŭpraŭleńni SK.
Nahadajem, što 21-hadovy Ihar Pcičkin musiŭ adbyć u SIZA na Vaładarskaha trochmiesiačny aryšt: sieŭ za rul aŭto, chacia byŭ pazbaŭleny pravoŭ.
30 lipienia jon pryjechaŭ u Zavodskaje RUUS Minska, kab adbyć pakarańnie i zatym byŭ dastaŭleny ŭ SIZA №1 na Vaładarskaha. 4 žniŭnia Pcičkin pamior.
Na sustrečy z načalnikam SIZA rodnym chłopca paviedamili, što ŭ Ihara 3 žniŭnia pačałosia «psichamatornaje ŭzbudžeńnie». I jaho źmiaścili ŭ miedycynskuju čaść, «dzie daviałosia fiksavać jaho miakkimi ramianiami». Na fatazdymkach trupa Pcičkina zaŭvažnyja šmatlikija siniaki. Foty vykładzienyja ŭ ahulny dostup u supołcy Ukantakcie.
Rodnyja Pcičkina praviali 14 vieraśnia kala SIZA na Vaładaraskaha akcyju z patrabavańniem rasśledavańnia spravy, u vyniku jany byli zatrymanyja.
