U minskich kinateatrach idzie niezvyčajnaje kino. Ciažka zrazumieć, jak jaho prapuściła cenzura. Zdarovyja chłopcy abjadnoŭvajucca i łupiać śpiecnazaŭcaŭ, a supracoŭniki śpiecsłužbaŭ paŭstajuć jak maralnyja dehienieraty. I heta zusim nie «Žyvie Biełaruś». Heta stužka pra rasijskich futbolnych chulihanaŭ «Kalafutboła».

U režysiora Antona Bormatava atrymałasia stvaryć ramantyčnuju historyju pra čatyroch 30­hadovych chulihanaŭ maskoŭskaha «Spartaka». Heta ludzi roznych prafiesij i sacyjalnaha statusu. Siarod ich — vykładčyk historyk Cičer, jość aŭtaślesar Jary, biznesmen Mažor. Jany źbirajucca razam, kab bić mordy chulihanam inšych kłubaŭ — «Dynama», CSKA, «Zienita».

Čamu bjucca? Ciažka patłumačyć. Heta navat nie prablemy siaredniaha kłasa, jak u «Bajcoŭskim kłubie» Pałanika. Chutčej adlustravańnie supiarečlivaha času ŭ Rasii. «U palitycy ja nie raźbirajusia, — kaža handlar u fan­kłubie «Spartaka». — A tut usio jasna, chto tvoj vorah i jak jaho treba pakarać».

Rasija siońnia sapraŭdy adna z asnoŭnych krain u śviecie pa «kalafutbole». Jašče možna adznačyć Polšču, Sierbiju, Turcyju, Bałharyju. Krainy, dzie ŭžo nie treba dumać ab chlebie nadzionnym, ale jašče nie dasiahnuli ŭ raźvićci viadučych krain. U Anhlii «kalafutboł» praktyčna zžyŭ siabie. Tam niama ŭžo navat fanataŭ u biełaruskim razumieńni. Toje samaje Hiermanija, Ispanija. Futbolnyja chulihany prachodziać, jak chvaroba rostu.

Darečy, na premjernym pakazie «Kalafutboła» ŭ Minsku adbyłasia sutyčka pamiž fanatami «Partyzana» i «Dynama».

U hetym, darečy, vialikaje adroźnieńnie biełaruskaj i rasijskaj situacyi. U Rasii niama fanackich hrupirovak z antyfašysckimi pohladami. U Biełarusi ž vielmi mocnaja hrupoŭka levaj moładzi hurtujecca vakoł «Partyzana». Rasijski nieanacyst Ciasak moža heta paćvierdzić. Jość i siarod mienšych kłubaŭ — «Oršy», «Biarozy», «Rudzienska», «Haradziei». Charakterna, što i pravyja, i levyja šanujuć Pahoniu i bieł­čyrvona­bieły ściah jak nacyjanalnyja simvały krainy.

Rolu vorahaŭ u Rasii najčaściej adyhryvajuć nie antyfa, a fanaty kaŭkazskich kłubaŭ. Hetaja tema taksama była zakranutaja ŭ filmie.

Čym jašče adroźnivajecca biełaruski «kalafutboł» ad rasijskaha?

Usio ž u Biełarusi bolšaść chulihanaŭ — školniki i studenty. Znajści vykładčykaŭ univiersitetaŭ značna składaniej. Heta źviazana ŭ tym liku ź vialikim kantrolem z boku śpiecsłužbaŭ i milicyi. Paviercie, fanaty sutykajucca z hetym nie mieniej za apazicyjnych aktyvistaŭ.

Sieksoty, niespraviadlivyja turemnyja prysudy, sačeńnie i prasłuchoŭvańnie — heta ž toje samaje z čym sutykajucca nie tolki hieroi «Kalafutboła», ale i apazicyja.

U Biełarusi nadzvyčaj redka ŭźnikajuć publičnyja bojki. Usio praz toj ža tatalny kantrol.

Tyja, što zdarajucca, chutčej vypadkovyja ci adbyvajucca na matčach nižejšych dyvizijonaŭ, jak było zusim niadaŭna ŭ Navahrudku. Najčaściej niedzie ŭ lesie. Bojki farmatam «10 na 10 ci 20 na 20».

Što da filma, to jon vyjšaŭ i śmiešnym, i ščymlivym. Dobraje spałučeńnie. Pahladzieć varta, choć dziela taho, kab raźviejać mif, što ŭsie futbolnyja fanaty — «prymaty».

«Kalafutboła» idzie ŭ subotu i niadzielu ŭ minskim kinateatry «Pieramoha» (Internacyjanalnaja, 20). Pačatak sieansaŭ u 15:00, 17:00, 19:00, 21:00.

Firmy

U centry «Kalafutboła» los spartakaŭskaj firmy Skullhead Crew. Na fanackim słenhu firmami nazyvajuć «hrupiroŭki» ŭnutry ruchu. Trapić u firmu vielmi składana, heta tolki dla nievialikaj kolkaści pravieranych ludziej.

U Biełarusi jość nastupnyja firmy:

«Dynama» (Minsk) — «Navaviłka», Formation7, Generation Ultra, «Adstupniki»
«Dynama» (Brest) — Blue­white devils, «Biez mazhoŭ»
«Minsk» — «Unija­09»
«Homiel» — «Paleski styl»
BATE — Young buzoters
SKVIČ — «Paravoz»
«Biełšyna» — «Bahatyry»
«Partyzan» — «Chieŭra», Red­white hunters
«Dniapro» — «Siamja»
«Maładziečna» — Green­White Boys, «Žuliki»
«Chimik» (Śvietłahorsk) — «Šervud»
«Asipovičy» — Shedwill
«Baranavičy» — Suicide squad
«Naftan» — «Hramnicy»
«Lida» — «Sota»

Клас
Панылы сорам
Ха-ха
Ого
Сумна
Абуральна