U paraŭnańni ź minułym hodam jana padniałasia na šeść pazicyj. Vyrasła jaje vyručka i prybytak.
U rejtynhu, składzienym na padstavie dadzienych pa vyručcy za 2012 hod, «BNK-Ukraina» zaniała 30-je miesca z abjomam vyručki 9450 młn hryŭniaŭ (1,155 młrd dalaraŭ). Čysty prybytak «BNK-Ukraina» u ciapierašnim pieryjadzie skłaŭ 50 młn hryŭniaŭ (6,1 młn dalaraŭ).
Jak adznačana aŭtarami rejtynhu, «biełaruskaje paliva praciahvaje skarać ukrainski rynak».
«U minułym hodzie «Biełaruskaja naftavaja kampanija» ŭviezła ŭ Biełaruś 3,8 młn ton paliva. Na naftapradukty z susiedniaj krainy siońnia prypadaje kala 40% impartu. Asvoiŭšysia na aptovym rynku, «dačka» BNK sprabuje siły ŭ paliŭnym rytejle. U hetym hodzie kampanija adkryła pieršyja 10 zapravak», — havorycca ŭ kamientary.
U kancy 2012 Antymanapolny kamitet Ukrainy daŭ dazvoł «BNK-Ukraina» na nabyćcio naftabazy ŭ Žytomirskaj vobłaści.
Siarod pradpryjemstvaŭ naftahazavaha siektara «BNK-Ukraina» zaniała šostaje miesca, prapuściŭšy napierad WOG, «Ukrtatnaftu», «Haztek», kancern «Hałnaftahaz» i «TNK-BP Kamiers».
U paraŭnańni z rejtynham-2012, u jakim byli adlustravanyja pakazčyki za 2011 hod, «BNK-Ukraina» padniałasia na šeść pazicyj. U 2011 hodzie jaje vyručka składała 7197 młn hryŭniaŭ (880 młn dalaraŭ), a prybytak 11 młn hryŭniaŭ (1,3 młn dalaraŭ).
U novym rejtynhu Forbes «BNK-Ukraina» apiaredziła pa pakazčykach takija kampanii, jak Roshen, Cargill Ukraina, «Łukojł-Ukraina», «Hazpram Zbyt Ukraina», «Mator Sič», Procter&Gamble Ukraina.
Trojku lidaraŭ rejtynhu skłali, jak i ŭ minułym hodzie, «Mietinviest» (mietałurhija), DTEK (enierhietyka ) i «Industryjalny sajuz Danbasa» (mietałurhija). U paraŭnańni ź letašnim rejtynham DTEK padniałasia na druhoje, a ISD apuściŭsia na treciaje miesca.
