Pryrost patrabavańniaŭ bankaŭ da ekanomiki sioleta pavinien składać nie bolš čym 1 pracent u miesiac.
Heta praduhledžana płanam sumiesnych dziejańniaŭ pa strukturnym refarmavańni ekanomiki, jaki zaćvierdžany pastanovaj urada i Nacbanka № 895/15 ad 10 kastryčnika.Zhodna z płanam, Minfinu, Nacbanku, Minekanomiki i dziaržbankam daručana da 15 kastryčnika padrychtavać pastanovu dla zabieśpiačeńnia da kanca hetaha hoda kredytavańnia ekanomiki ŭ biełaruskich rublach i zamiežnaj valucie na vałavoj asnovie nie bolš čym 30 trłn. rubloŭ u miesiac (1% pryrostu patrabavańniaŭ bankaŭ da ekanomiki ŭ miesiac).
Akramia taho, Nacbanku, Minfinu i Minekanomiki daručana zabiaśpiečyć u 2014 hodzie pryrost patrabavańniaŭ bankaŭ da ekanomiki na čystaj asnovie ŭ pamiery nie bolš čym 52 trłn. rubloŭ (ahulny abjom vałavoj vydačy kredytaŭ u biełaruskich rublach i zamiežnaj valucie — 406 trłn. rubloŭ).
Na vydaču kredytaŭ na žyllovaje budaŭnictva ź dziaržpadtrymkaj praduhledžana nakiravać 10 trłn. rubloŭ, na sielskuju haspadarku ź dziaržpadtrymkaj — 6,9 trłn. rubloŭ, darožnuju haspadarku ź dziaržpadtrymkaj — 3,6 trłn. rubloŭ. Na inšyja kirunki, uklučajučy papaŭnieńnie abarotnych srodkaŭ, — 31,6 trłn. rubloŭ.
Sumiesny płan dziejańniaŭ urada i Nacbanka taksama praduhledžvaje, što pryrost depazitaŭ urada dla kredytavańnia dziaržprahram na 2013 i 2014 hady składzie 6 trłn. rubloŭ u hod.
Nahadajem, u pačatku 2013 hoda biełaruskija ŭłady ŭziali žorstkaje abaviazacielstva pa tempach kredytavańnia ekanomiki pierad Antykryzisnym fondam JeŭrAzES (AKF). Pakazčyk pa roście kredytavańnia ekanomiki byŭ pieraviedzieny (u ramkach dziejnaj kredytnaj prahramy z AKF) u razrad kantrolnych i ŭstanoŭleny na ŭzroŭni 1,5% u miesiac. Na dumku pradstaŭnikoŭ fondu, abmiežavańnie tempaŭ kredytavańnia sadziejničaje strymlivańniu inflacyjnych pracesaŭ.
Tym nie mienš, jak raniej adznačali pradstaŭniki AKF, tempy kredytavańnia biełaruskaj ekanomiki sioleta apiaredžvali praduhledžanyja tempy. Nievykanańnie Biełaruśsiu hetaha kantrolnaha pakazčyku moža ŭskładnić vydzialeńnie šostaha tranša kredytu (440 młn. dołaraŭ). Biełaruskija ŭłady płanavali atrymać hetu sumu ŭ listapadzie 2013-ha.
Da hetaha času Minfin Biełarusi vykazaŭ žadańnie padrychtavać novuju kredytnuju prahramu z AKF JeŭrAzES. U svaju čarhu Siarhiej Šatałaŭ — namieśnik staršyni praŭleńnia Jeŭrazijskaha banka raźvićcia, jaki kiruje srodkami AKF, — zajaviŭ u kancy žniŭnia, što havaryć ab novaj kredytnaj prahramie ź Biełaruśsiu dačasna. «Nieabchodna spačatku praanalizavać vyniki dziejnaj stabilizacyjnaj prahramy, jakaja pačałasia ŭ 2011 hodzie i pakul nie zavieršana», — skazaŭ Šatałaŭ.
Misija AKF, jakaja budzie aceńvać vykanańnie Biełaruśsiu ŭmoŭ dziejnaj kredytnaj prahramy, prybudzie ŭ Minsku u treciaj dekadzie kastryčnika.
Pačatak dziejnaj kredytnaj prahramy Biełarusi z Antykryzisnym fondam JeŭrAzES byŭ pakładzieny 2 hady tamu. U červieni 2011-ha Saviet AKF uchvaliŭ vydzialeńnie Biełarusi finansavaha kredytu ŭ abjomie 3 młrd. dołaraŭ ZŠA. Kredyt vydzialajecca šaściu tranšami na praciahu 2011—2013 hadoŭ u adpaviednaści z vykanańniem etapaŭ kredytnaj prahramy biełaruskim uradam.