Novy kiraŭnik rabočaj hrupy Parłamienckaj asamblei ABSIE pa Biełarusi 37-hadovy Kryścijan Cholm (Šviecyja) maje namier aktyvizavać jaje dziejnaść i dabivacca adnaŭleńnia pracy ofisa ABSIE ŭ Minsku. Pra heta jon zajaviŭ u intervju BiełaPAN adrazu paśla svajho pryznačeńnia 15 kastryčnika.

«Nam važna i treba trymać pytańnie pa Biełarusi na paradku dnia PA ABSIE, — skazaŭ Cholm. — My praciahniem rabić toje ž, što i raniej, — zaprašać na sustrečy pradstaŭnikoŭ roznych hrup ź Biełarusi.

My miarkujem, što važna zaprašać nie tolki biełaruskich deputataŭ, ale i pradstaŭnikoŭ apazicyi i hramadzianskaj supolnaści, kab była mahčymaść vieści dyskusii i čuć roznyja mierkavańni na našych sustrečach».

Kryścijan Cholm padkreśliŭ važnaść dyjałohu z usimi subjektami palityčnaha pola ŭ Biełarusi — jak z uładami, hetak i z apazicyjaj.

Adnoj z najvažniejšych zadač šviedski parłamientaryj ličyć «nieabchodnaść dabivacca dazvołu na adnaŭleńnie pracy ŭ Minsku ofisa ABSIE», zakrytaha biełaruskimi ŭładami paśla prezidenckich vybaraŭ 2010 hoda.

Aceńvajučy ciapierašniuju situacyju ŭ Biełarusi, Kryścijan Cholm padkreśliŭ: u apošniaj rezalucyi pa Biełarusi, pryniataj u lipieni hetaha hoda, PA ABSIE jasna dała zrazumieć, što Biełaruś «nie źjaŭlajecca svabodnaj i demakratyčnaj krainaj».

«U Biełarusi nie vykonvajucca demakratyčnyja standarty, a pravy čałavieka rehularna parušajucca, — skazaŭ jon. — Ale našy namahańni skiravanyja na sumiesnuju pracu z usimi častkami biełaruskaha hramadstva, kab Biełaruś stała svabodnaj, adkrytaj i demakratyčnaj».

Parłamientaryj spadziajecca, što ŭ chutkim časie jamu i inšym členam rabočaj hrupy pa Biełarusi budzie dazvolena naviedvańnie krainy: «Ja budu sprabavać dabicca mahčymaści naviedać Biełaruś jak maha chutčej. Kali takaja mahčymaść budzie, to my chacieli b pravieści sustrečy jak z pradstaŭnikami aficyjnaj ułady, hetak i apazicyi, hramadzianskaj supolnaści, palitźniavolenymi i, viadoma ž, pradstaŭnikami ŚMI».

Cholm zaznačyŭ, što raniej nieadnarazova sprabavaŭ atrymać vizu ŭ Biełaruś u pasolstvie ŭ Stakholmie, ale jamu «viartali pašpart bieź vizy i jakich-niebudź tłumačeńniaŭ».

Padčas lipieńskaj siesii PA ABSIE ŭ Stambule jon hutaryŭ pra heta z kiraŭnikom biełaruskaj delehacyi, namieśnikam staršyni Pałaty pradstaŭnikoŭ Biełarusi Viktaram Huminskim. «Paźniej ja taksama čytaŭ u biełaruskich ŚMI, što Huminski vielmi jasna skazaŭ, što mianie niama ŭ śpisach tych, kamu zabaronieny ŭjezd u Biełaruś.

Spadziajusia, ja mahu vieryć jaho słovam i atrymaju zaprašeńnie naviedać Biełaruś», — skazaŭ Cholm. Kamientujučy situacyju ź biełaruskimi palitźniavolenymi, šviedski parłamientaryj zaznačyŭ: «Kožny raz, kali ja daviedvajusia ab vyzvaleńni palitźniavolenaha ŭ Biełarusi, ja radujusia.

Ale ŭ cełym situacyja z najaŭnaściu ŭ krainie palitźniavolenych absalutna nieprymalnaja — palitźniavolenych być nie pavinna.

Siadzieć pavinny tyja, chto ŭčyniŭ kryminalnyja złačynstvy. Apazicyjnyja palityki i aktyvisty pavinny być svabodnymi i mieć mahčymaść zajmacca svajoj spravaj».

Kryścijan Cholm taksama spadziajecca, što ŭ chutkim časie možna budzie ŭbačyć prahres jak u samoj Biełarusi, hetak i va ŭzajemaadnosinach biełaruskich uładaŭ z ABSIE.

Zajavy aficyjnych pradstaŭnikoŭ Minska pra toje, što rabočaja hrupa PA ABSIE pa Biełarusi nie patrebnaja, Cholm prakamientavaŭ nastupnym čynam: «Jaje stvareńnie było jasnym sihnałam taho, što ŭ Biełarusi nie ŭsio ŭ paradku. My patrabavali i patrabujem nieadkładnaha vyzvaleńnia palitźniavolenych, praviadzieńnia demakratyčnych reform, kab urad nie parušaŭ pravy čałavieka. I dla ŭrada prablematyčna vyrašać hetyja pytańni».

«Značna praściej zajaŭlać, što rabočaja hrupa nie patrebnaja, čym niešta rabić dla likvidacyi isnujučych prablem u śfiery demakratyi i pravoŭ čałavieka», — dadaŭ Cholm.

Pavodle jaho słoŭ, PA ABSIE dakładna dała zrazumieć, što takaja hrupa ŭsio jašče nieabchodnaja i pavinna pracavać bolš aktyŭna.

«Asabista ja nie mahu dačakacca taho momantu, kali my zmožam skazać, što rabočaja hrupa pa Biełarusi nam bolš nie patrebnaja, što situacyja źmianiłasia i nieabchodnaść u joj adpała», — padkreśliŭ šviedski deputat. Cholm raspavioŭ, što napiaredadni pryznačeńnia hutaryŭ sa svajoj papiarednicaj Utaj Capf, jakaja ŭznačalvała rabočuju hrupu PA ABSIE pa Biełarusi z 2002 hoda.

«Ja i ŭ dalejšym źbirajusia padtrymlivać ź joju kantakty, tamu što ŭ jaje vialiki vopyt pa biełaruskim pytańni, jaje rekamiendacyi mohuć dapamahčy. Ale samaja hałoŭnaja jaje rekamiendacyja — praciahvać pracavać pa ŭsich tych prablemnych pytańniach, jakija ja ŭzhadaŭ.

Jana zaŭsiody jasna zajaŭlała, što niepavaha pravoŭ čałavieka i demakratyčnych kaštoŭnaściaŭ źjaŭlajecca nieprymalnym», — zajaviŭ deputat Parłamienckaj asamblei ABSIE. Kryścijan Cholm viadomy rezkaj krytykaj aficyjnaha Minska i źjaŭlajecca adnym z najbolš aktyŭnych šviedskich deputataŭ, jakija zajmajucca biełaruskaj prablematykaj.

U lipieni hetaha hoda na siesii PA ABSIE ŭ Stambule jon vynies na hałasavańnie rezalucyju pa Biełarusi, jakaja ŭ vyniku i była pryniataja. U dakumiencie zaznačałasia, što parušeńni pravoŭ čałavieka ŭ Biełarusi «pa-raniejšamu nosiać sistemny charaktar».

PA ABSIE rekamiendavała ŭradu nieadkładna i biezahavoračna vyzvalić i apraŭdać usich palitźniavolenych, spynić nacisk na pradstaŭnikoŭ hramadzianskaj supolnaści, pryvieści nacyjanalnaje zakanadaŭstva ŭ adpaviednaść ź jeŭrapiejskimi standartami.

U rezalucyi taksama vykazvałasia škadavańnie adnosna abmiežavanaha supracoŭnictva ŭrada Biełarusi z mnohimi instytutami ABSIE, u tym liku z rabočaj hrupaj PA ABSIE pa Biełarusi, jakaja tak i nie atrymała zaprašeńnie naviedać krainu.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?