Na zołku 25 červienia 1950 hoda vojski kamunistyčnaj Paŭnočnaj Karei pierajšli 38-ju paralel. 28 červienia jany ŭziali Sieuł. 27 červienia prezident ZŠA Trumen zahadaŭ armii i fłotu dapamahčy Paŭdniovaj Karei. Da kanca žniŭnia siły Paŭdniovaj Karei i vojski Abjadnanych Nacyj, što pryjšli im na dapamohu, byli prycisnutyja da paŭdniovaha partovaha horada Pusan. Pad ich kantrolem zastałosia nie bolš za 10% terytoryi.

Ale kontrataka sił AAN pad Pusanam i desantnaja apieracyja ŭ Inčchonie, što pačałasia 15 vieraśnia, prymusili vojski Kim Ir Sena adstupać. 25 vieraśnia byŭ vyzvaleny Sieuł. 27 vieraśnia Stalin na pasiedžańni Palitbiuro kryčaŭ pra niekampietentnaść jak paŭnočnakarejskaha režymu, tak i savieckich vajskovych daradcaŭ. Da kanca listapada terytoryja kamunistyčnaha režymu abmiažoŭvałasia nievialikim piatačkom na paŭnočnym uschodzie. I piatačok hety imkliva ściskaŭsia. Jašče adzin nacisk – i nikoli b my nie daviedalisia pra idei čučchie, a karejcy nie viedali, što takoje hoład.

U avanhardzie AANaŭskaha nastupu išoŭ Ch korpus, u skład jakoha ŭvachodzili 1-ja dyvizija korpusa marskoj piachoty i 3-ja i 7-ja piachotnyja dyvizii ZŠA. Samaje mocnaje złučeńnie – dyvizija marskoj piachoty.

Korpus uciahvajecca ŭ dalinu vadaschovišča Čosin, z troch bakoŭ zacisnutuju harami. Marskija piechacincy hladziać na zorki, jakija nahadvajuć im srebnyja dalary. A na marskich piechacincaŭ z hor hladziać 12 dyvizij 9-j armiejskaj hrupy kitajskaj Narodnaj dobraachvotnickaj armii.

Kitajcy – majstry maskiroŭki. Jany znachodziacca ŭ Karei z kanca kastryčnika, i vorah pakul nie zdahadvajecca ni pra ichnuju prysutnaść, ni pra ichnyja namiery. A namiery ŭ ich na dadzienym etapie – poŭnaje, da apošniaha čałavieka, vyniščeńnie 1-j dyvizii. Tamu jany nie zaminajuć jaje adździełam upaŭzać u pastku daliny Čosin.

Ataka pačałasia ŭnačy 27 listapada. Adnačasova z vybuchami i śvistam kulaŭ amierykanskija žaŭniery čuli hołas z uzmacnialnika: «Marskija piechacincy, siońnia vy pamracie».

Samym strašnym u toj situacyi byŭ maroz. Dalinu Čosin nakryŭ antycykłon, što pryjšoŭ ź Sibiry. Tempieratura ŭpała da -37. Takoje zdarajecca ŭ Karei raz na 50 hod.

Atrymaŭšy haračuju ježu i adyšoŭšy na niekalki mietraŭ ad razdačy, marpiechi ŭžo trymali ŭ rukach kavałki lodu zamiest śniadanku. A jeści źmierzłuju ježu – prosty šlach da dyjarei. Tamu niekatoryja prosta ničoha nie jeli.

Ciopłych namiotaŭ nie było. Vopratka ad marozu nie ratavała. Škarpetki prymiarzali da botaŭ.

Amierykanskaje kamandavańnie zabiaśpiečvała vojski pa pavietry. Choć, kaniečnie, razumieńnie «nieabchodnaści» štabnymi aficerami ŭ Tokia i atočanymi marpiechami mahło nie supadać. Adnojčy, adkryŭšy čarhovy pakunak z «vialikaj ziamli», bajcy pabačyli, što jon całkam zabity preziervatyvami.

Uźnikali nieparazumieńni i inšaha kštałtu. Amierykanskija vajskoŭcy, jak i ŭsie ich kalehi pa ŭsim śviecie, vielmi lubiać šyfravać. U tym liku davać bojeprypasam imiony praduktaŭ charčavańnia. Tak, miny dla 60-mm minamiota paznačalisia kodavaj nazvaj «tutsi-rołz».

Tutsi-rołz – heta takija papularnyja amierykanskija cukierki. Jany majuć smak šakaładu i čymści nahadvajuć našy iryski, ale bolš miakkija.

I voś štab vojskaŭ AAN u Tokia atrymlivaje paviedamleńnie: marpiechi ź pieršaj dyvizii patrabujuć dasłać im tutsi-rołz. Mahčyma, dešyfravalnik stamiŭsia, i «navierch» paviedamleńnie pajšło bieź pierakładu «tutsi-rołz» na «60-mm miny». I da marpiechaŭ lacić transpart, zapoŭnieny cukierkami.

Nadziva, tutsi-rołz dla vojskaŭ, jakija hinuli na poŭnačy Karei, byli paratunkam. Jany byli idealnaj ježaj na marozie! 12 kitajskich dyvizij tak i nie zdoleli źniščyć adnu amierykanskuju…

Darečy, kamandujučy kitajskaj 9-j armiejskaj hrupaj u toj vajnie, hienierał Sun Šyłuń, stanie adnym ź siami kitajskich hienierałaŭ, jakija vystupili suprać uviadzieńnia vajennaha stanovišča ŭ mai 1989 h., kali na płoščy Ciańańmeń u kitajskaj stalicy sabralisia ludzi, jakija patrabavali demakratyčnych pieramienaŭ. U liście, dasłanym Centralnaj vajskovaj radzie KNR, Sun Šyłuń razam ź inšymi kazaŭ: «…my, staryja sałdaty, patrabujem nastupnaha: pakolki Narodnaja Armija naležyć narodu, jana nie moža vystupać suprać naroda i tym bolš zabivać narod. Joj nielha dazvalać adkryvać ahoń pa ludziach i vyklikać krovapralićcie. Kab nie dapuścić paharšeńnia situacyi, armija nie pavinnaja ŭvachodzić u horad».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?