Na vychadnych u Čechii prajšli daterminovyja parłamienckija vybary. U krasaviku češski parłamient prahałasavaŭ za samarospusk. Hetkim čynam deputaty vykazalisia suprać pryznačeńnie premjer-ministram Iržy Rusnaka.
Najbolšuju kolkaść hałasoŭ nabrali sacyjał-demakraty. Za ich prahałasavała bolš za miljon vybarcaŭ (20,45%). Sacdeki atrymajuć 50 miescaŭ z 200 u parłamiencie, što na 6 mieniej, čym u papiarednija vybary.
Na druhim miescy akazałasia novaja centrysckaja partyja ANO-2011. Partyju zasnavaŭ miljarder słavackaha pachodžańnia Andrej Babiš. Partyja vystupaje z šeraham papulisckich prapanovaŭ: za admienu deputackaha imunitetu, za źmianšeńnie padatkaŭ dla pradprymalnikaŭ, źmianšeńnie taryfaŭ na elektraenierhiju.
Sam Babiš sprabavaŭ padnieści siabie jak «čałavieka z naroda», znajomaha z prablemami prostych hramadzian. ANO nabrała 18,65%.
Na trecim miescy Kamunistyčnaja partyja Čechii i Maravii, jakaja navat palepšyła vyniki, pavialičyła kolkaść mandataŭ z 26 da 33.
U Čechii efiekt novych partyj vielmi mahutny. Na hetych vybarach strelnuła ANO-2011, a na minułych vialikaha pośpiechu dasiahnuła tolki stvoranaja TOP-09, jakuju ŭznačalvaje ministr zamiežnych spravaŭ Čechii Karł Švarcenbierh. Na hetych vybarach TOP zhubiŭ 15 mandataŭ.
Ale samy ahłušalny pravał zdaryŭsia z partyjaj, jakaja niaredka vyjhravała vybary ŭ Čechii. Hramadzianskaja demakratyčnaja partyja, jakuju patreśli niekalki karupcyjnych skandałaŭ, zmahła nabrać usiaho 7,7%. I zhubić až 37 miescaŭ u parłamiencie.
Taksama ŭ parłamient traplajuć Chryścijanskija demakraty, jakija nie byli pradstaŭlenyja padčas minułaha sklikańnia.
Pakul ciažka adnaznačna kazać, chto ŭtvoryć kiroŭnuju kaalicyju. Čechiju čakajuć doŭhija pieramovy ab bolšaści ŭ parłamiencie.