Majontak Navickaha ŭ Drazdach, zastaŭleny banku, fota Siarhieja Hudzilina
Hienadź Navicki ciapier hanarovy piensijanier, photo.bymedia.net
U 1994 Hienadź Navicki, na toj čas kiraŭnik Mahiloŭskaha abłsielbuda, zrabiŭ vybar, jaki vyznačyŭ jahonuju budučyniu. Navicki aktyŭna źbiraŭ podpisy za Alaksandra Łukašenku i paśla jahonaj pieramohi staŭ ministram architektury i budaŭnictva.
2001-2003 hady — zorny čas dla Hienadzia Navickaha. Jon druhaja asoba krainy, premjer-ministr. Ale kiraŭnik krainy byŭ im nie zadavoleny i davoli chutka pierasadziŭ va ŭtulnaje miesca staršyni Savieta respubliki.
U pačatku 2000-ch Navicki trapiŭ u śpis niekalkich dziasiatkaŭ vysokich čynoŭnikaŭ, jakija atrymali prapanovu pabudavać katedž u elitnych Drazdach, pad bokam u Łukašenki. Viadoma ž, śpikier parłamienta nie admoviŭsia.
Dom byłoha budaŭnika byŭ dakončany ŭ žniŭni 2006 i akazaŭsia ledź nie samym vialikim siarod susiedziaŭ — amal 550 m2. Ciapier cana takoj nieruchomaści dasiahaje $2 miljonaŭ!
Hetym i skarystaŭsia Navicki, kali 26 krasavika 2007, u dzień Čarnobylskaha šlachu, aformiŭ kredyt u dziaržaŭnym «Bielinviestbanku». Jon, na toj momant staršynia Savieta Respubliki, pad zastavu doma adkryŭ rublovuju kredytnuju liniju na 630 miljonaŭ rubloŭ — $300 tysiač pa tahačasnym kursie.
Ale samaje cikavaje — umovy vydzialeńnia kredytu.
Zhodna ź infarmacyjaj Nacyjanalnaha kadastravaha ahienctva, pradastaŭlenaj «Našaj Nivie», Navicki ŭziaŭ hrošy pad pałovu staŭki refinansavańnia — na toj čas 5,5%. Pavodle damovy, addać ich treba da 2018. Takija vialikija kredyty nie dajuć asobam pieradpiensijnaha ŭzrostu, ale dla Navickaha zrabili vyklučeńnie.
Ci ŭziaŭ Navicki ŭsiu kredytnuju liniju, nieviadoma. Ale možna zrabić prybliznyja raźliki: kali b jon viartaŭ usiu sumu roŭnymi płaciažami, to štomiesiac daviałosia b płacić pa 6,1 miljona rubloŭ.
2007 hod — čas pierad pieršaj devalvacyjaj. Pry tahačasnym kursie dalara Navickamu daviałosia b viartać u rublach pa $2850 štomiesiac, pa ciapierašnim — usiaho $668. Pryčym inflacyja praciahvaje źmianšać hetuju sumu.
Bolš za $2 tysiačy čystaha «navaru» za miesiac — jaki dobry dadatak da piersanalnaj piensii!
Viadoma ž, padobnym čynam štomiesiac źmianšajucca kredytnyja vypłaty ŭsich «ilhotnikaŭ», jakija atrymali dziaržaŭnuju dapamohu, — naprykład, šmatdzietnych i maładych siemjaŭ. Ale jakim ilhotnikam moh być śpikier Navicki, majučy siadzibu na 550 m2?
U krasaviku 2007 minimalnaja staŭka pa rublovych kredytach «Bielinviestbanka» składała 11% i mahli vydavacca jany na kankretnyja mety: apłatu navučańnia, rytualnyja pasłuhi i lačeńnie. Tyja, chto stajaŭ u čarzie na palapšeńnie žyllovych umovaŭ, mahli ŭziać hrošy na kuplu nieruchomaści pad 11%, a astatnija — pad 16%.
Ale kab pad 5,5% — ni pry jakich umovach.
Jak kažuć, kamu vajna, a kamu maci radna. Dla bolšaści ludziej devalvacyja była dramaj, jana źjeła ich rublovyja aščadžeńni. A dla takich «ilhotnikaŭ» heta była radaść. Bo jany na joj oj jak navaryli.
«Heta nie narmalna. Praviły pavinny być adnolkavymi dla ŭsich pazyčalnikaŭ, niezaležna ad taho, jakuju pasadu zajmaje toj ci inšy hramadzianin. Śpiecyjalnyja lhotnyja ŭmovy dla premjer-ministra — heta karupcyja», — kamientuje situacyju były staršynia Nacbanka Stanisłaŭ Bahdankievič. Zrešty, heta ŭsio tolki zdahadki.
«Naša Niva» adpraviła piśmovy zapyt u «Bielinviestbank» z prośbaj prakamientavać situacyju. Chatni telefon Hienadzia Navickaha nie adkazvaje ŭžo druhi tydzień.
