Biełaruski ŭrad pry padtrymcy investara ź Luksemburhu planuje pačać pierapracoŭku buraha vuhalu i haručych słancaŭ.
Biełaruskaje AAT «Biełhorchimpram» i luksemburskaj kampanija Polar Stars Group S.A. padpisali dźvie investycyjnyja damovy pa realizacyi prajektu hłybokaj pierapracoŭki buraha vuhalu i haručych słancaŭ, paviedamlaje hazeta «Biełorusy i rynok». Prajekt papiarednie byŭ adobrany prezydentam Biełarusi. Prykładny košt uhody — bolš za $2 młrd.
Miarkujecca, što zdabyty vuhal buduć pierapracoŭvać na patreby chimičnaj pramysłovaści i dla vytvorčaści matornaha paliva. Pavodle papiarednich raźlikaŭ najaŭnyja resursy vuhalu dazvolać u budučyni atrymlivać da 500 tys.t. matornaha paliva ŭ hod (štohadovaja patreba Biełarusi ŭ vadkim palivie składaje kala 2 młn. t.).
Na siońnia ŭ Biełarusi viadomyja try najbolš bujnyja radoviščy buraha vuhalu — Tonieŭskaje, Žytkavickaje i Brynieŭskaje (usie try znachodziacca — na Homielščynie). Ahulnyja zapasy vuhalu aceńvajucca ŭ 1,5 młrd. t., prydatnyja da pramysłovaha zasvajeńnia pakul tolki 100 młn. t.
«BR» padaje cikavyja źviestki pra investara ź Luksemburhu. Kiraŭnik kampanii Polar Star Group S.A. Nikałaj fon Kieler zajmieŭ viadomaść u susiedniaj Rasiei, jak stvaralnik finansavych pasiarednickich kampanijaŭ, jakija nieadnarazova pryznavalisia niepłaciežazdolnymi. Kampanija Polar Star Group S.A. utvoranaja ŭ minułym hodzie.
Inšy enerhietyčny prajekt uradu mienš maštabny, ale budzie zrealizavany amal napeŭna: stvareńnie padziemnych hazaschoviščaŭ. Pieršaja čarha takoha schovišča ŭ Mazyry pavodle planaŭ pačnie dziejničać užo ŭ nastupnym hodzie. Dla jaho pabudovy budzie vykarystanaja adpracavanaja salevaja šachta. Taki sposab pabudovy schovišča vymahaje značna mienš srodkaŭ i času. Pieršapačatkovy abjom Mazyrskaha PHS składzie 170-200 młn. kub.m., da 2018 h. abjom maje pavialičycca ŭ 5 razoŭ.
Padziemnyja hazaschoviščy nieabchodnyja dla taho, kab kampensavać sezonnuju nieraŭnamiernaść spažyvańnia hazu, asabliva ŭ asieńnie-zimovy sezon, a taksama z metaj paźbiehnuć pierabojaŭ z pastaŭkami hazu ŭ pazaštatnych sytuacyjach. Pavodle profilnych čynoŭnikaŭ, z «Hazpramam» nia raz vialisia pieramovy pa stvareńni PHS u Biełarusi. Nibyta rasiejski bok vielmi zacikaŭleny takimi prajektami. Adnak niezaležnyja eksperty miarkujuć, što rasiejcy nie pačnuć układać u ich hrošy, pakul nie atrymajuć kantrol nad hazatranspartnaj systemaj Biełarusi.
