«11 kastryčnika prykładna a 21.00 kiroŭca 1990 hoda naradžeńnia kiravaŭ aŭtamabilem «Miersedes». Nie daŭ rady kiravańniu, vyjechaŭ na sustrečnuju pałasu ruchu, dzie ździejśniŭ najezd na piešachoda, jakaja ruchałasia ŭ paputnym kirunku pa levaj uzbočynie.
Paśla najezdu na piešachoda aŭtamabil pierakuliŭsia. U vyniku DTZ dziaŭčyna zahinuła». Tak usio vyhladaje ŭ milicejskaj zvodcy. A za suchimi farmuloŭkami — dziavočy los.
Trahiedyja zdaryłasia ŭ vioscy Šarpiłaŭka ŭ Homielskim rajonie. 18hadovaja Kaciaryna žyła tam z baćkami, pakul niekalki hadoŭ tamu jany nie pierajechali bližej da Homiela — u pasiołak Biarozki. U toj dzień dziaŭčyna pryjechała na viosku adviedać babulu, ale tak i nie paśpieła raskazać naviny.
Padrabiaznaści zdareńnia pryhadvaje Jania. Dziaŭčynu taksama začapiła ŭ toj avaryi, ale, na ščaście, napaminam pra toj viečar na ruce zastalisia tolki drapiny.
«My z Kaciaj prahulvalisia. Išli pa levaj uzbočynie. Čuli, jak za nami jechała mašyna. Heta ŭsio tak chutka adbyłosia… Mašyna pralacieła na vializnaj chutkaści, i ja adčuła mocny bol u ruce. Paklikała Kaciu, a ŭ adkaz — cišynia. Paśla, jak jaje ŭbačyła, u mianie byŭ šok…»
«Jaje ŭdaryła tak, što rukaŭ ad kurtki adarvaŭsia, krasoŭki adlacieli ŭ roznyja baki. Paźniej ja znajšła małanku ad kurtki i pałovu ramieńčyka ad štanoŭ, — raskazała siastra Kaciaryny.
«Ludzi, jakija pieršyja padbiehli, vyciahvali kiroŭcu z mašyny, bačyli, što jon ledź išoŭ. Jon sam nie admaŭlaŭ, što vypiŭ 1,5 litra piva. A jon ža nastaŭnik historyi. Pastupiŭ u Minsk u aśpiranturu».
Kaciaryna ž letaś pastupiła ŭ Brescki ŭniviersitet — na jurysta, a sioleta pieraviałasia ŭ Homiel. U siamji try dački. Kacia była starejšaj.
«Čałaviek za rulom byŭ mocna pjany. Ja čuła, jak jon razmaŭlaŭ pa telefonie i ŭsio havaryŭ pra svaju karjeru, — pryhadvaje sa skruchaj Jana. — «Jaho ŭ toj momant chvalavała tolki heta».
Jon jašče pa telefonie kamuści kazaŭ, što bačyŭ nas: «Adna dziaŭčyna była ŭ biełaj kurtcy, a druhaja — u ciomnaj. Ja ž prosta chacieŭ pažartavać».
Chacieŭ prajechać kala samych dziaŭčat — pafarsić.
