Padstavaj dla vyniasieńnia pradstaŭleńniaŭ pasłužyli niečuvanyja dla vykanaŭčaj viertykali vyniki rasśledavańnia kryminalnaj spravy Siarhieja Łahno. Pryčym hetyja vyniki možna śmieła prymiarać na luby rajvykankam u aśpiekcie stvareńnia prosta idealnych umovaŭ dla roskvitu karupcyi. Kali vieryć Śledčamu kamitetu, to Siarhiej Łahno, kuryravaŭ pa słužbovych abaviazkach ekanamičnuju śfieru rajona, byŭ dla jaje i carom, i boham i volna moh prymać lubyja rašeńni ź lubymi padstavami.
Heta i pryviało da taho, što hrošy nasili litaralna ŭsie za ŭsio.
Śledčamu kamitetu ŭdałosia vyjavić bolš za dziasiatak faktaŭ, ale i heta tolki mizernaja častka ŭsioj praŭdy. Jak kažuć śviedki, mnohija biznesoŭcy rajona, jakija byli vymušanyja płacić, jak i astatnija, prosta vyrašyli trymacca ad hetaj spravy dalej. Z adnaho boku, Łahno z hałavoj chopić i taho, što ŭžo vyjaŭlena śledčymi. Ź inšaha — umovy viadzieńnia biznesu i pracy miascovaj viertykali naŭrad ci pamianiajucca ŭ ahladnaj budučyni, i tamu kali zaśviecišsia tut, potym tabie žyćcia ŭ rajonie sapraŭdy nie budzie.
Pa sutnaści, u vynikach rasśledavańnia fihurujuć tolki tyja chabaradaŭcy, jakija dziejničali praz adnu davieranuju asobu byłoha namieśnika staršyni vykankama. Hetaja davieranaja asoba čynoŭnika i zdała, raskazaŭšy, ad kaho, kali i kolki nasiła čałavieku, jaki adkazvaŭ za ŭsiu ekanomiku rajona. Što dziŭna, kali vieryć śledstvu, braŭ Łahno ŭsio i ź luboj nahody: ad praduktaŭ charčavańnia na 100 tysiač rubloŭ za «dach» da 10 tysiač dalaraŭ za stanoŭčaje rašeńnie pa inviestycyjnym prajekcie. Zrešty, pra ŭsio pa paradku.
Pieršy epizod złačynnaj dziejnaści Siarhieja Łahno, jaki vyśvietlili śledčyja, adnosicca da krasavika 2011 hoda.
Pavodle dadzienych śledstva, tady namieśnik staršyni Barysaŭskaha rajvykankama pryniaŭ u svaim pracoŭnym kabiniecie 3 tysiačy dalaraŭ ad H. — pradstaŭnika «Fjužnhrup» za stanoŭčaje vyrašeńnie pytańnia ab zaklučeńni damovy arendy z UP «Žyllo». Darečy, hetaje kamunalnaje pradpryjemstva, jakoje rasparadžajecca dziaržaŭnaj nieruchomaściu ŭ rajonie, zhadvajecca ŭ niekalkich epizodach złačynnaj dziejnaści S. Łahno, ale čamuści nichto ź biełaruskich aficyjnych asob UP «Žyllo» ŭ jakaści padazravanych u spravie nie fihuruje.
Druhi raz, ličać śledčyja, S. Łahno ŭziaŭ 2,5 tysiačy dalaraŭ, pryčym znoŭ za zaklučeńnie damovy arendy z UP «Žyllo» tolki ciapier užo inšaj pryvatnaj kampanijaj, «Baryhran». Ale hrošy pieradavała ŭsio taja ž davieranaja asoba. Ale tut cikavaja i padaploka hetaha epizodu. Kab adpracavać hrošy i vyłučyć «Baryhranu» nieabchodnyja płoščy, Siarhiej Łahno prymusiŭ dyrektara kampanii «Vierytas i K» napisać zajavu ab skasavańni damovy arendy kaviarni «Vierytas» pa praśpiekcie Revalucyi ŭ Barysavie. I hetyja płoščy potym adyšli «Baryhranu».
Nastupny epizod adnosicca da pačatku 2012 hoda, kali namieśnik staršyni rajvykankama pryniaŭ u jakaści chabaru pradukty charčavańnia na sumu kala 400 tysiač rubloŭ ad dyrektara kampanii «Šamacha». Biznesoviec padkarmiŭ čynoŭnika za toje, kab u dačynieńni da jaho nie prymalisia miery pa vyjaŭlenych parušeńniach, a taksama kab viertykalščyk pachadajničaŭ pierad słužbovymi asobam Barysaŭskaha RUUS ab spynieńni pravierak handlovych abjektaŭ pradpryjemstva. Pravierki, darečy, byli spynienyja, ale ŭ spravie ŭ jakaści abvinavačanych słužbovyja asoby Barysaŭskaha RUUS nie fihurujuć. Krychu paźniej, u vieraśni 2012 hoda, dyrektar «Šamachi» pieradaŭ čynoŭniku praduktaŭ charčavańnia jašče na 100 tysiač rubloŭ, a potym jašče 100 dalaraŭ — na znak padziaki za kłopaty pa spynieńni milicejskich pravierak.
Čarhovy raz, upeŭnienaje śledstva, S. Łahno uziaŭ chabar u žniŭni 2012 hoda. Prosta ŭ svaim słužbovym aŭtamabili padazravany atrymaŭ ad davieranaj asoby 10 tysiač dalaraŭ za stanoŭčaje vyrašeńnie pytańnia ab pieradačy TAA «Łabaratoryja pryrody» ŭ biazvypłatnaje karystańnie nievykarystoŭvanaha budynka škoły ŭ v. Bytča. Hety budynak pryvatnaja kampanija płanavała vykarystać dla realizacyi inviestycyjnaha prajekta «Rekanstrukcyja (budaŭnictva) budynkaŭ byłoj škoły ŭ v. Bytča dla arhanizacyi vytvorčaści bijałahična aktyŭnych dabavak».
Aryjentavana ŭ tym ža žniŭni 2012 S. Łahno nibyta atrymaŭ 2 tysiačy dalaraŭ ad zasnavalnika kampanii «Mikraaŭtobus». Hetym razam za dazvoł na ažyćciaŭleńnie pasažyrskich pieravozak u Barysavie.
Nastupny epizod chabarnictva adnosicca ŭžo da listapada 2012 hoda, kali ŭ svaim słužbovym kabiniecie S. Łahno ŭziaŭ ad toj ža davieranaj asoby 5 tysiač dalaraŭ za stanoŭčaje vyrašeńnie pytańnia pa nabyćci va ŭłasnaść TAA «Łabaratoryja pryrody» jašče adnaho budynka byłoj škoły — ciapier užo ŭ v. Vialikaja Traścianica.
Vielmi cikavym možna nazvać epizod, jaki śledčyja datujuć krasavikom 2013 hoda.
Miarkujecca, što tady Siarhiej Łahno atrymaŭ ad svajho dobraha znajomaha Chusejna Zarmajeva, jaki paśpieŭ papracavać na šerahu kiraŭničych pasad dziaržpradpryjemstvaŭ rajona, dva mabilnyja telefony canoj bolš za 30 miljonaŭ rubloŭ. Chabar, upeŭnienyja śledčyja, pieradavaŭsia za spryjalnaje vyrašeńnie pytańnia ab pracaŭładkavańni Zarmajeva na čarhovuju kiraŭničuju pasadu čarhovaha dziaržpradpryjemstva.
U ciapierašni čas byłomu namieśniku staršyni pa ekanomicy Barysaŭskaha rajvykankama inkryminujecca ździajśnieńnie złačynstvaŭ pa dvuch artykułach Kryminalnaha kodeksa Biełarusi: pa č.3 art.430 (atrymańnie chabaru asobaj, jakaja zajmaje adkaznaje stanovišča ) i č.3 art.426 (pieravyšeńnie ŭłady abo słužbovych paŭnamoctvaŭ asobaj, jakaja zajmaje adkaznaje stanovišča).
Čakajem suda, kab pačuć usie padrabiaznaści hetaj skandalnaj spravy. Kali, viadoma, jaje nie zrobiać zakrytaj, kab schavać ad hramadskaści sapraŭdny tvar barysaŭskaj viertykali.
