Mužčyna napadpitku i pad kajfam łaziŭ pa bałkonach šmatpaviarchovika ŭ Minsku.
Pra heta paviedamiŭ pamočnik načalnika Minskaha haradskoha ŭpraŭleńnia Ministerstva pa nadzvyčajnych situacyjach Vital Demboŭski.
Ranicaj 2 listapada ŭ MNS pastupiła paviedamleńnie ab sprobie suicydu na vuł.Surhanava, 49. Ratavalniki, jakija prybyli na miesca zdareńnia, ubačyli mužčynu, jaki znachodziŭsia na bałkonie na siomym paviersie (z boku vulicy) dzieviacipaviarchovaha žyłoha doma. Žycharoŭ u kvatery ŭ toj momant nie było.
Tady supracoŭniki MNS ŭstalavali pnieŭmatyčnuju vyratavalnuju padušku «Kub žyćcia» na vypadak, kali mužčyna ŭsio ž taki sarviecca z bałkona.
Zatym ratavalniki pry dapamozie aŭtaleśvicy i kalenčataha padjomnika padnialisia da mužčyny i spuścili taho na ziamlu. Jon nie paciarpieŭ.
Mužčyna znachodziŭsia ŭ stanie ałkaholnaha i narkatyčnaha apjanieńnia. Vyratavanaha dastavili ŭ Respublikanski centr psichičnaha zdaroŭja.
Vyśvietliłasia, što jon znachodzicca na ŭliku ŭ psichanieŭrałahičnym i narkałahičnym dyspansierach.
Uviečary 1 listapada jon znachodziŭsia ŭ kvatery ŭ svajoj znajomaj, na 9-m paviersie. Ranicaj haspadynia kvatery pabačyła svajho hościa na bałkonie kvatery, raźmieščanaj na siomym paviersie z boku vulicy.
Mužčyna spuściŭsia z bałkona dzieviataha pavierchu na bałkon siomaha pavierchu. Dalejšyja padrabiaznaści vyśviatlajucca.
