Jak paviedamlaje pres-słužba milicyi, 2 listapada dva supracoŭniki Leninskaha RAUS zastupili na słužbu dla praviadzieńnia prafiłaktyčnych mierapryjemstvaŭ pa praduchileńni i raskryćci kradziažoŭ z aŭtatranspartu i jaho razukamplektavańni.
A pałovie na treciuju hadzinu, znachodziačysia ŭ rajonie haražna-budaŭničaha kaapieratyvu «Łada-2008» (vuł. Avijataraŭ), jany zaŭvažyli natoŭp, jaki biŭsia.
Paviedamiŭšy pra heta ŭ apieratyŭna-dziažurnuju słužbu rajadździeła milicyi, milicyjaniery pasprabavali spynić bojku, ale jaje ŭdzielniki prajavili siabie ahresiŭna, dvoje ź ich napali na adnaho z apieratyŭnikaŭ i źbili jaho pałkaj i rukami.
Dla spynieńnia supraćpraŭnych dziejańniaŭ aficery milicyi prymianili tabielnuju zbroju, zrabiŭšy dzieviać papieradžalnych, a zatym try prycelnyja streły pa napadnikach.
Supracoŭniki AMAP UUS, jakija prybyli na miesca zdareńnia, zatrymali ŭdzielnikaŭ bojki i vyklikali chutkuju mieddapamohu.
Z dyjahnazam «čerapna-mazhavaja traŭma» ŭ balnicu byŭ dastaŭleny supracoŭnik kryminalnaha vyšuku, a taksama z ahniastrelnymi ranieńniami ściohnaŭ, halonkastupniovaha sustavu, pachavaj vobłaści i ałkaholnym apjanieńniem — dvoje napadnikaŭ, miascovych žycharoŭ 1985 i 1986 hadoŭ naradžeńnia.
Zaraz ich žyćciu ničoha nie pahražaje. U miedustanovach, dzie znachodziacca paciarpiełyja, vystaŭleny post achovy.
U dačynieńni da hramadzian 1985 i 1986 hadoŭ naradžeńnia Mahiloŭskim mižrajonnym adździełam Śledčaha kamiteta raspačata sprava na padstavie art. 364 KK (hvałt u dačynieńni da supracoŭnika orhanaŭ unutranych spraŭ).