4 listapada ź liniejki kredytaŭ Parytetbanka źnikli aŭtakredyty, refinansavańnie i kredyty na žyllo.
Heta aznačaje, što ź siońniašniaha dnia nie zastałosia ni adnaho dziaržaŭnaha banka, jaki vydavaŭ by pazyki na nabyćcio žylla, piša finance.tut.by.
9 kastryčnika sajt finance.tut.by pisaŭ pra toje, što śledam za Bielinviestbankam i Biełarusbankam spyniŭ pryjom dakumientaŭ na kredytavańnie kupli žylla Biełahraprambank.
Praŭda, dva apošnija da hetaha času prapanujuć kredyty na budaŭnictva žylla pad 38,5 % hadavych (SR + 15 p.p.).
Apošnim z čatyroch dziaržaŭnych bankaŭ, z dapamohaj jakoha možna było kupić žyllo, byŭ Parytetbank, čyj asnoŭny akcyjanier — Nacbank.
Da siońniašniaha dnia jon prapanoŭvaŭ kredyt "Tvaja nieruchomaść" pad 54 % hadavych na termin da 20 hadoŭ.
Pytańnie abmiežavańnia kredytavańnia žylla finance.tut.by abmierkavaŭ z namieśnikam staršyni Nacbanka Piatrom Mamanovičam. U pryvatnaści, była zakranutaja tema alternatyvy ilhotnych kredytaŭ.
“Zaraz my padvodzim nasielnictva da taho, što budavacca treba cyvilizavana, rychtavacca da hetaha i akumulavać na heta hrošy, a nie čakać ilhot ad dziaržavy.
Jak varyjant: sistema žyłbudźbieražeńniaŭ, jakaja aktyŭna vykarystoŭvajecca ŭ inšych krainach. Prajekt padobnaha zakona ŭžo byŭ raspracavany, ale jon nie prajšoŭ ŭzhadnieńnie.
Ciapier my źbirajemsia jaho dapracavać i stvaryć niešta padobnaje ŭ Biełarusi.
Što tyčycca kredytaŭ na kuplu žylla, ciapier ich vydaje tolki adzin kamiercyjny bank. Fransabank prapanuje pazyku pad 55 % hadavych na termin da 15 hadoŭ.