22 kastryčnika Alaksandr Łukašenka daŭ dazvoł na pryznačeńnie Alaksandra Zazuli staršyniom Kobrynskaha rajvykankama. Na momant pryznačeńnia čynoŭnik uznačalvaŭ u parłamiencie pastajannuju kamisiju pa dziaržaŭnym budaŭnictvie, miascovym samakiravańni i rehłamiencie.
Pavodle biełaruskaha zakanadaŭstva, sumiaščać dźvie hetyja pasady čynoŭnik nie maje prava. Tamu nieŭzabavie jon pavinien skłaści paŭnamoctvy deputata.
Pavodle Zakona «Ab statusie deputata Pałaty pradstaŭnikoŭ, člena Savieta Respubliki Nacyjanalnaha schodu Respubliki Biełaruś» deputat nižniaj pałaty ažyćciaŭlaje svaje paŭnamoctvy na prafiesijnaj asnovie, vyklučeńnie zroblena tolki dla navukovaj, vykładčyckaj, kulturnaj, tvorčaj dziejnaści i miedycynskaj praktyki. U inšych vypadkach deputat abaviazany daterminova skłaści svaje paŭnamoctvy.
U Centrvybarkamie paviedamili, što apošnim časam precendentaŭ, kab «narodna abranaha deputata» adklikali na inšuju pracu, nie było.
Sam Alaksandr Zazula na zvarot, źviazany z pytańniem, jak jon budzie sumiaščać deputactva z kiraŭnictvam spravami Kobrynskaha rajona paviedamiŭ:
«U suviazi z pryznačeńniem na novuju pasadu mnoj u adras pałaty pradstaŭnikoŭ budzie nakiravana zajava ab zvalnieńni z pasady staršyni pastajannaj kamisii … Rašeńnie ab vyzvaleńni … prymajecca pałataj pradstaŭnikoŭ».
Sakratar CVK Mikałaj Łazavik paviedamiŭ, što Zazula pakul nie składaŭ svaich paŭnamoctvaŭ. Na sajcie parłamienta pa-raniejšamu jon źjaŭlajecca staršyniom kamisii. Tym časam na sajcie Kobrynskaha rajvykankama imia novaha staršyni ŭžo paznačana –Alaksandr Ivanavič Zazula.
Chto zamienić deputata ŭ parłamiencie?
«Davybary» pravodzić składana, - kaža Mikałaj Łazavik, - bo kali vybirajecca adnačasova 110 deputataŭ, to pracuje ŭsia dziaržaŭnaja mašyna - CVK, miascovyja kamisii, ŚMI… A na adnym učastku składana ŭźniać ludziej na hałasavańnie. Tamu my imkniemsia ŭ takich situacyjach abjadnoŭvać vybary na adnym učastku z nastupnymi ahulnadziaržaŭnymi - ź miascovymi ci vybarami prezidenta. Mahčyma, na Navabielickaj akruzie ŭdasca pravieści vybary adnačasova ź miascovymi. Nu i kali Zazula ci niechta inšy adkliča paŭnamoctvy, to i na tych učastkach taksama.
Nahadajem, što na apošnich parłamienckich vybarach było abrana 109 deputataŭ z 110 mahčymych – na Novabielickaj akruzie, dzie ŭ vyniku bałatavaŭsia tolki adzin kandydat ad Libieralna-demakratyčnaj partyi, hramadzianie «nie zmahli» abrać deputata.
Pa mierkavańni palitołaha Valera Karbaleviča,
rašeńnie Alaksandra Łukašenki ab pryznačeńni deputata kiraŭnikom rajvykankama śviedčyć pra toje, što vykanaŭčaja ŭłada niesurjozna stavicca da parłamienta.
«Heta tłumačycca tym, što siońniašni parłamient vykonvaje tolki naminalnyja funkcyi, nie źjaŭlajecca samastojnaj halinoj ułady. Tamu deputataŭ, jak i inšych čynoŭnikaŭ, pierasoŭvajuć z adnoj pasady na inšuju», - adznačyŭ ekśpiert.
Deputat pałaty pradstaŭnikoŭ II sklikańnia Uładzimir Navasiad paviedamiŭ, što raniej nie było precendentaŭ, kab deputaty sychodzili, nie adpracavaŭšy svoj termin, na inšuju pasadu.
«U toj čas parłamient pracavaŭ bolš prafiesijna. Choć siarod deputataŭ I i III sklikańnia byli tyja, chto paralelna z deputactvam zajmali kiraŭničyja pasady ŭ dziaržaŭnych ustanovach.
Pa praviłach pavinna była sklikacca kamisija, jakaja b vykryła hetyja vypadki. Ale na praktycy takija pravierki nie pravodzilisia», -
uzhadvaje były deputat.
* * *
Daśje
Alaksandr Zazula
Naradziŭsia ŭ 1965, u vioscy Hajkoŭka Kobrynskaha rajona. Skončyŭ BDU pa śpiecyjalnaści «pravaznaŭstva», Akademiju kiravańnia. Vychadziec z kamsamoła. Pracavaŭ pieršym sakratarom Kobrynskaha HK ŁKSMB, zahadčykam adździeła handlu, inśpiektaram pa spravach moładzi, jurystam Kobrynskaha harvykankama, u firmie «Faktar», dyrektaram ZAT «Aptymałservis» horada Kobryna. Na parłamienckich vybarach u 2012 byŭ abrany pa Kobrynskaj vybarčaj akruzie paŭtorna, źjaŭlaŭsia deputatam i IV sklikańnia. U 2012 u intervju telekanału STV zajaviŭ, što jaho deputacki zarobak składaje 10 miljonaŭ rubloŭ.
