Situacyja ŭ drevaapracoŭčaj halinie pakazvaje nieefiektyŭnaść biełaruskaj ekanamičnaj madeli ŭ cełym, i kadravyja pierastanoŭki niazdolnyja źmianić situacyju.
Takuju dumku vykazali BiełaPAN ekśpierty, kamientujučy siońniašnija adstaŭki šerahu čynoŭnikaŭ i daručeńni kiraŭnika dziaržavy.
Padčas naviedvańnia AAT «Barysaŭdreŭ» 8 listapada Alaksandr Łukašenka rezka raskrytykavaŭ urad i svaju administracyju za situacyju ŭ drevaapracoŭčaj pramysłovaści, a taksama pravioŭ šerah kadravych pierastanovak.
Namieśnik kiraŭnika Administracyi prezidenta Andrej Tur vyzvaleny ad pasady, kiraŭniku administracyi Andreju Kabiakovu abjaŭlena strohaja vymova. Staršynia Minabłvykankama Barys Batura adchileny ad pasady i pryznačany kiraŭnikom «Barysaŭdreva».
Vyzvaleny ad pasady i staršynia kancerna «Biellespapierapram» Alaksandr Pierasłaŭcaŭ. Kiraŭniku Kamiteta dziaržkantrolu daručana pravieści pravierki ŭ halinie, pavodle vynikaŭ jakich mohuć być raspačatyja kryminalnyja spravy.
Ekanamist Leanid Zaika nazvaŭ toje, što adbyłosia, «sapraŭdnym razhonam». «Hubiernatara vobłaści pasłali pracavać dyrektaram niejkaha drevaapracoŭčaha pradpryjemstva, heta ž śmiešna.
Toje, što zdaryłasia siońnia, — heta vynik taho, što VUP uzros usiaho na 1%, ekspart upaŭ na 20%, pramysłovaja vytvorčaść źniziłasia na 15%. Usio heta vyklikana składanaj ekanamičnaj situacyjaj u krainie», — padkreśliŭ Zaika.
«U nas poŭny pravał pa ŭsioj makraekanomicy, ale chto hetym budzie zajmacca? Naša kiraŭnictva nie razumieje, kudy ŭvieś śviet ruchajecca», — miarkuje ekanamist. Na dumku palitołaha Valeryja Karbaleviča, siońniašnija adstaŭki «źviazany ź nieefiektyŭnaściu toj sacyjalnaj madeli, jakaja isnuje ŭ Biełarusi».
«Razmova idzie pra toje, što madernizacyja drevaapracoŭčaj haliny nie realizujecca ŭ tym vyhladzie, u jakim była zapłanavanaja», — dadaŭ jon. Karbalevič nahadaŭ, što jašče ŭ kancy minułaha hoda byŭ vydany dekret prezidenta ab zabaronie zvalnieńniaŭ z drevaapracoŭčych pradpryjemstvaŭ.
«Hety dekret byŭ vyklikany nadzvyčajnaj situacyjaj — hrošy na madernizacyju haliny byli vydzieleny, źniščany, a madernizacyju nie praviali. Kab vyratavać situacyju, daviałosia iści na takija krajnija miery», — zaznačyŭ ekśpiert.
Tady ž, dadaŭ jon, byli nazvanyja novyja terminy zaviaršeńnia madernizacyi. «Terminy zakončylisia — vynikaŭ znoŭ niama, tamu Łukašenka znajšoŭ krajnich.
Hod tamu, nahadaju, taksama byli adstaŭki i zvalnieńni. Sistema nie pracuje, i ad źmieny kadraŭ i adstavak nijakaha vyniku nie budzie», — padkreśliŭ Karbalevič.
Na jaho dumku, prykład drevaapracoŭčaj haliny adlustroŭvaje nieefiektyŭnaść biełaruskaj sacyjalnaj madeli ŭ cełym.
«Sama ideja madernizacyi biez surjoznych raźlikaŭ, biez pošuku novych rynkaŭ zbytu, pošuku dadatkovych srodkaŭ źjaŭlajecca bieśpierśpiektyŭnaj, — upeŭnieny ekśpiert. — U dalejšym znoŭ buduć znojdzieny krajnija, vinavatyja ŭ niepaśpiachovaści madernizacyi jak u drevaapracoŭčaj halinie, hetak i ŭ ekanomicy krainy».
Krainie nieabchodnyja hłybokija reformy, zajaviŭ Karbalevič. «Ale pytańnie ich praviadzieńnia budzie zaležać ad taho, ci znojduć ułady źniešnija krynicy finansavańnia i nakolki doŭha hatova ciarpieć nasielnictva.
Kali Rasija daść čarhovy kredyt, to pra reformu možna budzie zabyć na niejki čas. Kali nie daść — na niejkija miery daviadziecca iści. Ale pry hetym jašče nieviadoma, jak nasielnictva adreahuje na mahčymyja ciažkaści», — prahnazuje palitołah.
