Alaksandr Łukašenka daručyŭ Hienieralnaj prakuratury supolna ź Viarchoŭnym sudom bolš staranna raźbiracca ŭ rezanansnych spravach, takich jak žorstkaje zabojstva dziaŭčyny ŭ Homieli.
«Kali ty, niahodnik i padonak, idzieš i nie pieršy raz užo robiš złačynstva, zabivaješ čałavieka, to jakoje prava ty maješ žyć na hetaj ziamli? Ja nie kryvažerny, ale adpłata i pakarańnie pavinny być adpaviednymi. Vaźmicie heta na kantrol, — zajaviŭ Alaksandr Łukašenka, prymajučy z dakładam hienprakurora Alaksandra Kaniuka. — U advarotnym vypadku my nikoli nie naviadziem paradak i nikoli nie panizim hetuju tempieraturu ŭ hramadstvie. Ciažkija, asabliva ciažkija złačynstvy: vinavaty — adkazvaj na ŭsiu katušku».
Nahadajem, Alaksandr Hrunoŭ abvinavačvajecca ŭ ździajśnieńni zabojstva z asablivaj žorstkaściu (studentka Natalla Jemieljančykava atrymała 102 nažavyja ranieńni). Sud nad im zaviaršyŭsia ŭ červieni. Tady jaho prysudzili da vyklučnaj miery pakarańnia — rasstrełu.
Adnak u kastryčniku Viarchoŭny sud zadavoliŭ kasacyjnuju skarhu jaho advakata.
Pieršy praces byŭ pryznany pamyłkovym, i sprava nakiravanaja na pierahlad. Ciapier sudzić Hrunova buduć inšyja sudździ.
Paŭtorny sud nad hamielčukom raspačniecca 26 listapada.
Alaksandr Hrunoŭ užo pieraviedzieny z kamiery śmiarotnikaŭ minskaha SIZA №1 na vulicy Vaładarskaha ŭ SIZA Homiela,
paviedamiŭ pravaabaronca Andrej Pałuda.
