Schod u vice-premjera adbyŭsia viečaram u piatnicu, pad zaviaršeńnie pracoŭnaha dnia. Lidar pradprymalnikaŭ Anatol Šumčanka kaža, što ich paklikali tolki dla taho, kab kanstatavać fakt — palohki nie budzie, i z 1 śniežnia uvodzicca abaviazkovaja siertyfikacyja tavaraŭ. Akramia hetaha, dziaržava źbirajecca stvaryć sietku aptovych bazaŭ u Biełarusi, dzie pradprymalniki zmohuć nabyvać užo siertyfikavany tavar.
«Minhandlu, Biełkaapzajuzu i inšym dadziena daručeńnie arhanizavać aptovyja bazy, adkul pradprymalniki zaraz buduć nabyvać siertyfikavany tavar. Prakapovič skazaŭ, što heta žorstki rynak i kali niechta nie vyžyvie, to zastanucca sietki».
Akramia Šumčanki na schodzie prysutničali ministr pa padatkach i zborach, ministr handlu, jaho namieśnik, dyrektar Departamienta pradprymalnictva, ekanamisty Karahin, Marhiełaŭ, Kalinin i inšyja.
Ideju z arhanizacyjaj aptovych baz u Biełarusi Šumčanka krytykuje. Na jaho dumku, u dziaržavy prosta niama stolki hrošaj, kab zakuplać nieabchodnyja abjomy tavaraŭ. «Na heta spatrebicca, pa maich padlikach, kala 3 miljardaŭ dołaraŭ u hod. Adkul jany voźmuć takija hrošy?» — ździŭlajecca jon.
