Pałata pradstaŭnikoŭ nacyjanalnaha schodu Biełarusi pryniała siońnia, 22 listapada, u pieršym čytańni zakonaprajekt «Ab biełarusach zamiežža».
Zakonaprajekt uvodzić dakładnaje vyznačeńnie, jakija hrupy ludziej majucca na ŭvazie pad biełarusami zamiežža.
Pa-pieršaje, heta hramadzianie Biełarusi, jakija pastajanna pražyvajuć pa-za miežami terytoryi krainy. Pa-druhoje, da ich płanujecca adnieści zamiežnych hramadzian i asob biez hramadzianstva, jakija pastajanna pražyvajuć za miažoj, kali jany sami abo ich prodki pa pramoj linii naradzilisia abo žyli ŭ Biełarusi. I narešcie, heta zamiežnyja hramadzianie i asoby biez hramadzianstva, jakija pastajanna pražyvajuć pa-za Biełaruśsiu, ale identyfikujuć siabie jak biełarusy (z punktu hledžańnia etničnaj prynaležnaści da biełaruskaha naroda abo movy, kultury, histaryčnych suviaziaŭ, viedaŭ i zachavańnia biełaruskich tradycyj i abradaŭ).
Jak paviedamlałasia raniej, kamientujučy hety zakonaprajekt, namieśnik staršyni pastajannaj kamisii pałaty pradstaŭnikoŭ pa mižnarodnych spravach Viktar Fiasak zajaviŭ žurnalistam, što pracu ź biełaruskimi dyjasparami za miažoj pravodziać Ministerstva zamiežnych spraŭ, Ministerstva kultury i Aparat upaŭnavažanaha pa spravach relihij i nacyjanalnaściej.
Vialiki ŭkład u hetuju spravu ŭnosić i mižnarodnaje hramadskaje abjadnańnie «Zhurtavańnie biełarusaŭ śvietu» Baćkaŭščyna».
Usiaho, pavodle roznych źviestak, u śviecie pražyvajuć nie mienš za 1,5 młn biełarusaŭ.
Niedziaržaŭnyja krynicy dajuć ličbu ad 3 da 3,5 młn, Ministerstva kultury — 2 młn, MZS — ad 1,5 da 2 młn.
Samaja šmatlikaja dyjaspara znachodzicca ŭ Rasii, dzie, pavodle roznych źviestak, pražyvajuć prykładna 1 młn biełarusaŭ. U Polščy naličvajecca kala 200 tys., u Kazachstanie — prykładna 100 tys., u Łatvii — 96 tys., u Litvie — 95 tys.
Padčas VI Źjezda biełarusaŭ śvietu ŭ Minsku, 23-24 lipienia 2013 h.
