tsn.ua

tsn.ua

Viktar Fiodaravič!

Siońnia ja ŭžo mahu adnosna spakojna napisać vam list.

Ščyra kažučy, učora, paśla rašeńnia ŭrada ab admovie padpisvać Pahadnieńnie ź ES, mnie chaciełasia vas prosta zabić.

Dumaju, toje ž adčuli i pracentaŭ 70 daručanaha vam naroda. Prabačcie nas usie hetyja spantannyja emocyi, tamu što ŭsie my ludzi i časam byvaje ciažka trymać siabie ŭ rukach. Ale zaraz treba nie ŭpadać u ahresiju, a ŭsimi srodkami ratavać situacyju. Vy adziny, chto moža heta zrabić, i tamu ja da vas źviartajusia z hetym listom.

Viktar Fiodaravič, ja raju vam i prašu vas jak maha chutčej sabrać Saviet nacyjanalnaj biaśpieki i abarony, vysłuchać z baćkoŭskaj uvahaj usie sumnieńni vašaha ŭrada pa ŭskładnieńni adnosinaŭ z Rasijaj, pryznać, što vy razumiejecie ich ščyraje chvalavańnie, i nieadkładna, na pazačarhovym pasiadžeńni SNBA pryniać rašeńnie ab padpisańnia Pahadnieńnia.

Heta adziny vaš šaniec vyžyć jak palityku, tamu što ciapier, zabivajučy Pahadnieńnie, vy robicie hałoŭnuju pamyłku ŭsiaho vašaha žyćcia.

Ja dobra viedaju ŭsie vašy sapraŭdnyja, unutranyja matyvacyi, i tamu nie budu vas pierahružać maralnymi abo cyvilizacyjnymi sientencyjami. Ja chaču dać vam usiaho try parady, jakija vy sapraŭdy zrazumiejecie i, mahčyma, uratujecie Pahadnieńnie.

Parada № 1.

Vy vybirajecie zaraz viektar mižnarodnaj stratehii Ukrainy ŭ zaležnaści ad taho, jak heta paŭpłyvaje na vašy šancy pieraabracca paŭtorna na prezidencki post. Vy vyrašyli, što dla realizacyi hetaj mety najlepšaje rašeńnie — heta zachavać niejtralitet pamiž Jeŭrapiejskim Sajuzam i Rasijaj, i tamu zabivajecie Pahadnieńnie ab asacyjacyi ź ES.

Vy dumajecie, što i dalej zmožacie blefavać, šantažavać i hulać pamiž dvuma cyvilizacyjnymi centrami i atrymlivać ad ich žadanyja padarunki dla zachavańnia svajoj ułady.

Ad adnych — tanny haz, elektarat i hrošy, ad druhoha — mižnarodnuju lehalizacyju vašaha aŭtarytarnaha kiravańnia i karupcyi. Vy pamylajeciesia.

Ja dumaju, što paśla zryvu padpisańnia Pahadnieńnia zachodni demakratyčny śviet pakinie vas u spakoi i adzinocie da 2015 hoda, tamu što jany nie słužba pa pieravychavańni prymityŭnych palitykaŭ. Z momantu kančatkovaha zryvu Pahadnieńnia ŭ vas źniknie adzin z mahutnych centraŭ upłyvu, jaki vy chočacie i ŭ dalejšym ekspłuatavać, a mienavita — demakratyčny zachodni śviet.

Vy zastanieciesia sam-nasam z Rasijaj, i vam daviadziecca žyć pa jaje darožnaj karcie.

Na hetym etapie zryŭ padpisańnia Damovy ź ES budzie dobra uspryniaty Rasijaj, i vy chutčej za ŭsio navat atrymajecie za hety «mužny» krok peŭnaje ŭznaharodžańnie. Ja nie viedaju, što heta budzie — adnosna tanny haz, umieranyja kredyty abo prosta źniaćcie handlovych prablem. Heta nie maje značeńnia. Ale majcie na ŭvazie, što heta buduć nie prosta padarunki, a padarunki — hapliki, na jakija vas ščylna pasadziać. I heta nie ŭsio.

Kali vam u ekanamičnym i sacyjalnym pravale stanie zusim ciažka i ŭ vas nie budzie pobač ni MVF, ni Jeŭrasajuzu, to adziny vaš «siabar» Rasijskaja Fiederacyja vam niesumnienna dapamoža. Ale za košt zdačy nacyjanalnych intaresaŭ Ukrainy, jaki navat vy nie hatovyja budziecie zapłacić.

Rasija pastavić vas pierad vybaram: albo jana budzie vas ratavać ad sacyjalna -ekanamičnaha kałapsu, jaki ŭžo nastupiŭ, canoj straty dziaržaŭnaj niezaležnaści, ci ŭvohule nie budzie ratavać. Abodva varyjanty dla vas i dla Ukrainy palityčna śmiarotnyja, a inšych u toj čas u vas prosta nie zastaniecca.

Takim čynam, maja pieršaja parada: ni pry jakich abstavinach nie zastavacca sam-nasam z Rasijaj, tamu što ŭ hetym farmacie vy stracicie ŭsio. Abaranić vas moža tolki pahadnieńnie ab asacyjacyi ź ES.

Parada № 2.

Nie vybivajcie tak hruba i histeryčna hrošy z zachodniaha śvietu ŭ abmien na Pahadnieńnie. Heta vyhladaje jak prymityŭny, piačorny movieton. Padpišycie Damovu — i vam zachodni śviet usio addaść sam. Jany vas vyratujuć ad usich finansavych i sacyjalna-ekanamičnych pravałaŭ, jakija vy arhanizavali.

Zrazumiejcie, što kali vy padpišacie pahadnieńnie, to dla ŭsiaho demakratyčnaha śvietu ŭžo budzie spravaj honaru nie rasčaravać ŭkrainskaje hramadstva ŭ jeŭrapiejskim viektary raźvićcia.

Budzie zroblena ŭsio, kab 46 miljonaŭ čałaviek adčuli realny i istotny pazityŭ ad padpisańnia pahadnieńnia ź ES. Suśvietnyja lidery, u adroźnieńnie ad vas, adkazna staviacca da viery ludziej u jeŭrapiejskija kaštoŭnaści i standarty i dapamohuć vam nie prajhrać jak palityku i nie stracić krainu. Navat kali vy budziecie mocna supraciŭlacca, vas dziela jeŭrapiejskich nadziej ŭkrainskaha hramadstva zrobiać paśpiachovym prezidentam.

 

Takim čynam, druhaja maja parada: kali chočacie finansavaj, intelektualnaj i palityčnaj padtrymki ŭsiaho śvietu — padpisvajcie Pahadnieńnie bieź źnievažalnych i biazdarnych tarhoŭ. Vam usio daduć i tak biez sumnieńniaŭ i vahańniaŭ. Pry ŭsioj maštabnaści rasijskich resursaŭ ich nielha paraŭnoŭvać z mahčymaściami demakratyčnaha śvietu.

Parada № 3.

Nie kampleksujcie tak vidavočna z nahody majho pytańnia. Vaš strach nastolki prykmietny, što vam nie ŭdajecca jaho chavać. Padpisańnie Pahadnieńnia ŭ toj čas, kali vy budziecie ŭtrymlivać palityčnaha zakładnika ŭ svaich zaścienkach, značna źnizić košt vašaha jeŭrapiejskaha hieraizmu. Ale heta ŭžo vašyja ryzyki i vašy straty. Rabicie toje, što ličycie patrebnym.

Ja daju vam słova, što kali vy prymiecie rašeńnie ŭ SNBA padpisać Pahadnieńnie, ja ŭ toj ža dzień źviarnusia da jeŭrapiejskich lidaraŭ z prośbaj padpisać Pahadnieńnie biez vykanańnia častki kryteryjaŭ, u tym liku tych, što datyčacca majho vyzvaleńnia.

Ja nie viedaju, ci prysłuchajucca jany da majoj prośby, ale ja zrablu ŭsio, što ŭ maich siłach, dla padpisańnia Pahadnieńnia. Zapomnicie maju treciuju paradu i dumajcie ab paśpiachovaści krainy, za jakuju vy adkazvajecie, a nie pra banalnaje zachavańnie ŭłady luboj canoj, i pośpiech znojdzie vas sam. Jon nie zamarudzić.

Zrazumieła, što vy možacie i nie prysłuchoŭvacca da maich paradaŭ. Heta aznačaje, što za vašu palityčnuju budučyniu nichto nie daść navat łomanaj kapiejki i naŭrad ci vy nadoŭha zastanieciesia prezidentam Ukrainy. Ale pakul u vas jość čas i prava na vybar. Vybirajcie.

Nadrukavana na sajcie glavnoe.ua, pierakład na biełaruskuju movu novychas.info.

 

 

Клас
Панылы сорам
Ха-ха
Ого
Сумна
Абуральна