«Nakolki čałaviek moža pry hetym być u narmalnym stanie, nastolki i jon u narmalnym stanie», — tak charaktaryzuje stan Uładzisłava Baŭmhiertera dla radyjo «Svaboda» advakat Julij Taj, jaki pradstaŭlaje ŭ Rasiei intaresy hieneralnaha dyrektara «Urałkalija».
— Julij Valerjevič, apaviadzicie, kali łaska, na jakim etapie znachodzicca sprava vašaha padabaronnaha ŭ Rasiei?
— Sam Uładzisłaŭ Arturavič znachodzicca ŭ maskoŭskim śledčym izalatary. Rasiejskija pravaachoŭnyja orhany vystavili jamu abvinavačańnie. U dadzieny momant anijakich śledčych dziejańniaŭ nie pravodzicca. Kali jany buduć pravodzicca, my budziem jamu sadziejničać i akazvać pravavuju dapamohu ŭ ramkach Kryminalna-pracesualnaha kodeksu. A što budzie rabić śledztva, nam nie viadoma. Naturalna, jany buduć pravodzić raśśledavańnie i roznyja dziejańni, źviazanyja z Uładzisłavam Arturavičam ci nie źviazanyja.
— Raniej vy abskardžvali rašeńnie pra zaklučeńnie Ŭładzisłava Baŭmhiertnera pad vartu…
— Tak, Maskoŭski haradzki sud nam admoviŭ u zadavalnieńni skarhi. My budziem abskardžvać hetaje rašeńnie ŭ vyšejšych instancyjach. Ja ŭpeŭnieny, što moj padabaronny absalutna ni ŭ čym nie vinavaty. Znachodžańnie jaho ŭ śledčych izalatarach Rasiei ci Biełarusi źjaŭlajecca pamyłkaj. Ale pakul pravaachoŭnyja orhany nia zhodnyja, i ŭsio adbyvajecca tak, jak adbyvajecca.
— Ci Vy aznajomlenyja z materyjałami spravy? Možacie raskazać, u čym kankretna abvinavačvajecca Ŭładzisłaŭ Baŭmhiertner?
— My nia možam aznajomicca z materyjałami spravy, bo heta źjaŭlajecca śledčaj tajnaj. Aznajomicca ź imi my možam tolki tady, kali budzie zaćvierdžana abvinavaŭčaje zaklučeńnie, i na hetaj stadyi sprava budzie pieradavacca ŭ sud. My znajomyja tolki z fabułaj abvinavačańnia — u ahulnych rysach viedajem, u čym abvinavačvajecca Ŭładzisłaŭ Arturavič. Fabułu złačynstva ja kamentavać nie mahu. Mahu nazvać skład złačynstva — «złoŭžyvańnie paŭnamoctvami». Heta 201-šy artykuł Kryminalnaha kodeksu RF. Heta ŭsio, što ja mahu apavieści pa spravie na dadzieny momant.
— U jakim stanie znachodzicca Uładzisłaŭ Arturavič?
— Ja asabista nie sustrakaŭsia ź im. Ź im sustrakaŭsia moj kaleha Alaksiej Basistaŭ. Pavodle jahonych słoŭ, fizijalahičny i psychalahičny stan jaho narmalny. Nastolki narmalny, jakim moža być stan čałavieka, jakoha ekstradziravali, chaj sabie i ŭ jahonuju rodnuju krainu, što jamu da peŭnaj stupieni pryjemna. Ale pry hetym jon znachodzicca ŭ śledčym izalatary, i jamu siońnia pradjaŭlenaje abvinavačańnie. Nakolki čałaviek moža pry hetym być u narmalnym stanie, nastolki i jon u narmalnym stanie.
— U jakim umovach jon zaraz znachodzicca?
— Va ŭmovach śledčaha izalatara. Na žal, padrabiaznaściaŭ ja nia viedaju. Sam ja ŭ izalatary nia byŭ.
— Ci raskazvaŭ jon niešta pra svajo pierabyvańnie ŭ Biełarusi?
— Zaraz nie da taho. Zaraz my na terytoryi Rasiei, idzie raśśledavańnie. Zaraz nia čas dla feljetonaŭ i memuaraŭ. Nia taja sytuacyja.
— Jak budzie dalej adbyvacca raśśledavańnie? Jakich nastupnych padziejaŭ čakać?
— Kryminalna-pracesualny kodeks Rasiei i Biełarusi pryncypova nie adroźnivajucca. Idzie raśśledavańnie, pa miery skančeńnia terminaŭ jaho buduć praciahvać ci nie praciahvać. Vidy śledčych dziejańniaŭ usie vielmi padobnyja. Usio budzie ŭ adpaviednaści z standartnaj praceduraj. A ŭ dalejšym albo pierakvalifikujuć abvinavačańnie, albo spyniać pieraśled z pryčyny adsutnaści składu złačynstva, albo, naadvarot, pieradaduć u sud, kali paličać, što sprava skončanaja. Usio hetaksama, jak u vas.
***
Śledčy kamitet RF 22 listapada paviedamiŭ, što hieneralnamu dyrektaru «Ŭrałkalija» Ŭładzisłavu Baŭmhiertneru vystaŭlenaje abvinavačańnie ŭ złoŭžyvańni paŭnamoctvami, jon dapytany ŭ jakaści abvinavačanaha. Pa versii śledztva, Baŭmhiertner, «vykonvajučy kiraŭničyja funkcyi ŭ kamercyjnych arhanizacyjach, złoŭžyvaŭ svaimi paŭnamoctvami, vykarystoŭvajučy ich nasupierak zakonnym intaresam hetych arhanizacyj i ŭ metach atrymańnia vyhodaŭ i pieravahaŭ dla inšych asobaŭ». «Heta paciahnuła naniasieńnie istotnaj škody i ciažkija nastupstvy dla sumiesnaha rasiejska-biełaruskaha pradpryjemstva «Biełaruskaj kalijnaj kampanii» i «Biełaruśkalija»», — paviedamiŭ pres-sakratar SK RF Uładzimier Markin.
