 Uładzimier Zdanovič |
U papiarednim paradku dnia ŭžo kala 40 pytańniaŭ. Prynamsi, miarkujecca razhledzieć novyja zakonaprajekty ab hipatecy, amnistyi, kanstytucyjnaj sudovaj vytvorčaści, praviłach biełaruskaj artahrafii i punktuacyi. Deputaty chočuć taksama ŭnieści papraŭki ŭ zakony ab supraćdziejańni ekstremizmu, zaniataści nasielnictva, pensijnym zabieśpiačeńni dy inšyja.
Staršynia kamisii ŭ spravach adukacyi, kultury, navuki i navukova‑techničnaha prahresu Ŭładzimier Zdanovič z usich pytańniaŭ samym hałoŭnym nazyvaje biudžetnaje:
«Na hetaj sesii, jak i na ŭsich vosieńskich, samym važnym i hałoŭnym budzie pryniaćcie biudžetu na nastupny hod. Heta tyčycca ŭsich kamisijaŭ. I ŭsie my ŭžo daŭno pracujem nad hetaj prablemaj.
A naša kamisija planuje vynieści na hetuju sesiju dva, a, mahčyma, i try prajekty. Pieršy ź ich — prajekt ab praviłach biełaruskaj artahrafii i punktuacyi, padrychtavany dla razhladu ŭ pieršym čytańni. Pracu nad hetym zakonam my viali i viadziem u vielmi adkrytaj formie. Jon nadrukavany na sajcie ministerstva adukacyi. I kožny čałaviek moža ź im paznajomicca i dasłać svaje zaŭvahi na adras kamisii. Darečy, my ŭžo šerah listoŭ atrymali z prapanovami. I častku ź ich paličyli vielmi słušnymi».
Siońnia ž deputaty źbirajucca abrać novaha staršyniu Pałaty zamiest Uładzimiera Kanaplova, jaki padaŭ u adstaŭku sa spasyłkaj na drenny stan zdaroŭja. Cikaŭlusia ŭ spadara Zdanoviča, ci nie źbirajecca jon vyłučyć svaju kandydaturu — zakon nie zabaraniaje samavyłučeńnia?
«Ja liču, što zaraz znachodžusia mienavita tam, dzie ja pavinien znachodzicca, pracujučy nad zakanadaŭstvam u halinie adukacyi. Heta — majo. U kožnaha čałavieka jość takaja praca, jakaja jamu pasuje.
A ŭznačalić Pałatu, ja dumaju, čałaviek, jaki ŭžo maje peŭny dośvied kiravańnia takim orhanam».
 Vadzim Papoŭ |
U ciapierašnim składzie tolki adna asoba maje taki dośvied — Vadzim Papoŭ kiravaŭ Pałataj papiaredniaha sklikańnia. Na sprobu daviedacca niešta ŭ samoha spadara Papova, ja pačuŭ nastupnaje:
«Bez kamentaraŭ. Da mianie ŭ hetym pytańni nie źviartajciesia».
Siarhiej Skrabiec u Pałacie papiaredniaha sklikańnia čatyry hady pracavaŭ pad kiraŭnictvam Vadzima Papova. Voś jahonyja ŭražańni:
«Było šmat pytańniaŭ, ź jakimi my źviartalisia da Papova. I pieravažna jon adkazvaŭ, što hetaje pytańnie jon nie vyrašaje albo raiŭ źviarnucca da Kanaplova, jaki ŭ toj čas byŭ jahonym namieśnikam».
