Ułady adkłali ŭviadzieńnie novych praviłaŭ u adnosinach da IP. Pra heta havorycca ŭ dakumiencie, jaki atrymała RHA «Pierśpiektyva» ad namieśnika Ministra ekanomiki. U im paćviardžajecca infarmacyja ab terminach siertyfikacyi, jakija dziejničali raniej.
«Pa infarmacyi Dziaržstandartu, hety kamitet nie vydavaŭ narmatyŭnych pravavych aktaŭ, jakija źmianiajuć z 1 śniežnia 2013 h. praviły paćvierdžańnia IP - płacielščykami adzinaha padatku patrabavańniaŭ TR MS 017/2011 «Ab biaśpiecy tavaraŭ lohkaj pramysłovaści». Da 1 lipienia 2014 hoda na terytoryi Mytnaha sajuza ŭ dačynieńni da tavaraŭ lohkaj pramysłovaści dziejničaje pierachodny pieryjad», - havorycca ŭ dakumiencie.
Akramia taho, u ministerstvie paviedamili, što pa prapanovie biełaruskaha boku Jeŭrazijskaja ekanamičnaja kamisija padrychtavała i abmiarkoŭvaje dźvie źmieny ŭ techrehłamient ab biaśpiecy pradukcyi lohkaj pramysłovaści.
«Praduhledžana na padstavie pratakołaŭ vyprabavańniaŭ syraviny i materyjałaŭ pravodzić siertyfikacyju abo dekłaravańnie adpaviednaści hatovaj pradukcyi, što dazvolić skaracić vydatki zajaŭnikaŭ na paćvierdžańnie adpaviednaści. Pa šerahu vidaŭ pradukcyi abaviazkovaja siertyfikacyja budzie zamienienaja na dekłaravańnie adpaviednaści», - havorycca ŭ adkazie Minekanomiki.
Nahadajem, na sustrečy z pradstaŭnikami biźnies-sajuzaŭ 15 listapada ŭ Miensku vice-premjer Piotr Prakapovič zajaviŭ, što 1 śniežnia pierachodny pieryjad sproščanaj siertyfikacyi dla IP budzie skasavany, adnak u vynikovym pratakole heta zajava nie fihuravała. Akramia taho, pradprymalniki nie vyklučali mahčymych źmianieńniaŭ u padatkovym zakanadaŭstvie, jakija b ich zakranuli.
Hetaja niavyznačanaja situacyja pryviała da taho, što IP stali abmiarkoŭvać varyjant prypynieńnia svajoj dziejnaści ŭ śviatle vierahodnaha ŭzmacnieńnia žorstkaści pravił realizacyi tavaraŭ lohkaj pramysłovaści.
U vyniku 1 śniežnia nie pracavali pradprymalniki na rynkach Barysava, Žodzina i Rahačova, adnak bolšaść IP praciahnuli pracavać.
«Pakul my spynili to varjactva, jakoje nabližałasia na nas, pradprymalnikaŭ. My zmahli pierakanać urad nie iści na kroki, pra jakija kazaŭ vice-premjer Prakapovič niekatory čas tamu, a mienavita pra nieabchodnaść z 1 śniežnia mieć siertyfikaty ŭsim. U nas napieradzie jašče šmat prablem i ciažkaściaŭ, ale ŭsie pavinny viedać, my ŭsio pieraadolejem i ŭ nas usio atrymajecca, tamu što naša sprava pravaja i my taja častka hramadstva, ź jakoj nie ličycca ŭ hetaj uładzie ŭžo nie atrymajecca», — kažuć pradprymalniki.
