Imia Dźmitryja Saleja, pieramožcy Paralimpijskich hulniaŭ u Piekinie [załaty miedal na 100 m baterflajem — NN], viadoma amal kožnamu maładziečancu. Praz čatyry hady, u 2012-m, Dźmitry Salej pradstaŭlaŭ krainu na Paralimpijskich hulniach i ŭ Łondanie.
A potym pačali havaryć, što naš čempijon vystupaje ŭžo za inšuju krainu. Ci tak heta, my daviedalisia ŭ samoha Dźmitryja.
— Dźmitry, ci praŭda toje, što vy pakinuli Biełaruś?
— Heta nie zusim tak. Ja pa-raniejšamu žyvu ŭ Maładziečnie, ale trenirujusia ŭ Azierbajdžanie.
— I jak časta vy tam byvajecie?
— Jak praviła, 20 dzion trenirujusia tam, a na 20 dzion pryjazdžaju damoŭ.
— A doraha jeździć tudy-siudy?
— Dy što vy! Usie vydatki na darohu kampiensuje prymajučy bok.
— Dźmitry, jak vy rašylisia na takija kardynalnyja pieramieny?
— Davajcie pačniom z taho, što adnosiny da spartsmienaŭ i ŭmovy dla trenirovak tam značna lepšyja. I spartsmienaŭ tam nie padmanvajuć.
Trenirujučysia ŭ Biełarusi, mnie nadakučyła słuchać abiacanki: zaŭtra dadzim, zaŭtra zapłacim, zaŭtra budzie lepš.
— A vy ŭžo pradstaŭlali Azierbajdžan na niejkich spabornictvach?
— Pa praviłach, pavinny prajści dva hady z taho času, jak ty vystupaŭ za inšuju krainu. Ale heta ŭmoŭna, daŭno možna było b damovicca, ale pakul niama rašeńnia ad Biełarusi.
— Nie adpuskajuć?
— Nie (uzdychnuŭšy). Nie adpuskali: ni Biełaruś, ni ŭłasny trenier. Chacia adnosiny z trenieram u mianie zachavalisia siabroŭskija. My zrazumieli adzin adnaho.
— Viadoma, što vy treniravalisia sa svaim małodšym bratam Ramanam? A jon zastaŭsia ŭ Biełarusi?
— Nie, ja jamu prapanavaŭ pajechać sa mnoj, i jon pahadziŭsia. Razumiejecie, kali b ja ci Roma zastalisia ŭ Biełarusi, to pryjšłosia b rabić vybar.
I, chutčej za ŭsio, nie na karyść sportu. Pryjšłosia b šukać stabilnuju pracu sa stabilnym zarobkam, a ŭ basiejn chadzić pa vychadnych.
Ja ž da takoha nie hatovy. Ja chaču być spartsmienam, chaču pieramahać. Toje ž i z Ramanam. U Biełarusi jon byŭ nikomu nie patrebny. A tolki pryjechali ŭ Azierbajdžan, tut tabie i ŭmovy dla trenirovak, i zarobak.
— A kolki vy zarablajecie?
— Heta kamiercyjnaja tajamnica (žartuje). Ale voś dla paraŭnańnia. U Biełarusi za pieramohu na bujnych spabornictvach možna atrymać kala 100-120 tysiač dołaraŭ, a ŭ Azierbajdžanie za takuju ž pieramohu − miljon jeŭra. Voś i ličycie.
— A da Paralimpijady-2016 rychtujeciesia?
— Ja abaviazkova budu prymać udzieł u Paralimpijskich hulniach u Brazilii! Ale ŭžo pad ściaham Azierbajdžana. Ja ni razu nie paškadavaŭ, što pryniaŭ takoje rašeńnie. I nazad u Biełaruś ja nie viarnusia.
