 |
Biełaruskija małakazavody sutyknulisia z prablemaj deficytu syraviny. Vytvorcy małaka vyvoziać svaju pradukcyju ŭ Rasieju, dzie zakupačnyja košty ŭdvaja vyšejšyja.
Prablemy z syravinaj na staličnych małakazavodach peryjadyčna ŭźnikali na praciahu vieraśnia, vyśvietliła hazeta «Salidarnaść». 1 kastryčnika dva z troch mienskich zavodaŭ prypynili pastaŭki małaka ŭ haradzkija kramy. Haradzki małakazavod №2 zabiaśpiečyŭ małakom dziciačyja sadki i bolnicy, a ŭ kramy patrapili tolki małočnyja pradukty. Mienskija zavody na siońnia atrymlivajuć ad pastaŭščykoŭ tolki pałovu nieabchodnaha abjomu syraviny. Sytuacyju na pradpryjemstvach tłumačać tym, što ŭ Rasiei zakupačnyja košty ŭdvaja vyšejšyja. Tudy i źbiahaje biełaruskaje małako. Pakazalna toje, što ŭ Ministerstvie sielskaj haspadarki i charču, a taksama ŭ Mienharcharčpramie ad kamentaroŭ admovilisia.
Možna dapuścić, što vytvorcy małaka karystajucca nia tolki vyhadnaj kanjunkturaj, ale j adterminoŭkaj Raśsielnasnahladam ŭvodu novaha paradku impartu pradukcyi žyviołahadoŭli ź Biełarusi. Ź 1 listapada pastaŭki buduć dazvolenyja tolki tym zavodam, jakija projduć atestacyju i atrymajuć prava na ekspart.
Varta adznačyć, što ŭ paraŭnańni ź minułym hodam nazirajecca rost vytvorčaści małočnaj pradukcyi. Małaka, u pryvatnaści, vypuścili na 10% bolš.
U Biełarusi za Łukašenkam užo zdaralisia pieraboi z pastaŭkami ŭ kramy małočnych praduktaŭ. Jak i ciapier, pryčynaj byli bolš pryvabnyja zakupačnyja košty ŭ Rasiei. Tady pytańnie vyrašyli administratyŭnym sposabam — zabaranili vyvaz syraviny. Jak vyrašycca pytańnie hetym razam — padvysiać zakupačnyja košty, ci zabaroniać vyvozić małako, pakul niajasna. Pieršy sposab udaryć pa spažyŭcach, druhi — pa vytvorcach. U dadzienym vypadku vyklikaje cikavaść zajava prezydenta ŭ časie «Dažynak» nakont ekspartnych mahčymaściaŭ vytvorcaŭ małaka:
«Siońnia ŭ čarzie stajać rasiejcy, kuplajuć pa vialikaj canie małočnyja i miasnyja pradukty. Eŭrapejskija krainy hatovyja nabyvać u ahromistych kolkaściach masła, realizacyja jakoha jašče niekalki hod tamu była prablemaj».
