Akramia taho, jon uładalnik viadomaha «Pub Club Mixx», što na vulicy Čyrvonaj. Ciaham apošnich miesiacaŭ restaran byŭ začynieny: pieražyvaŭ rebrendynh, ale ź miesiac tamu znoŭ zapracavaŭ pad nazvaj «Wine&whiskey bar Mixx». Karespandentka «Našaj Nivy» paabiedała ŭ abiedźviuch ustanovach.
«Boulevard» z prychodam novaha haspadara nie źmianiŭsia: dyzajn i ceny zastalisia raniejšymi, aficyjantki ŭ kaviarni vietlivyja dy ŭvažlivyja, a zamovu ź dźviuch stravaŭ padčas abiedu nieśli roŭna 15 chvilin.
U mieniu pa-raniejšamu panuje jeŭrapiejskaja kuchnia, z 12 da 16 hadzin možna zamović biznes-łanč. Na abied naviednikam prapanujuć sałat z harodniny z alejem za 19 000 rubloŭ ci kłasičny «Cezar» za 44 000.
Na pieršuju možna zamović kuryny bulon (25 000) ci sup z frykadelkami (28 000). Z haračaha jość jałavičnaja vyrazka, tušanaja z apielsinami (58 000), i filej indyčki z harodninaj (57 000).
Ceny na haračyja stravy ŭ «City-cafe Boulevard» pačynajucca ad 119 tysiač.
Doraha? U centry Minska ceny abiedziennaha mieniu skroź takija. A voś za viačeru ŭ «Boulevard» daviadziecca zapłacić daražej.
Sałata «Cezar» u abiedziennym mieniu za 44 000, viečaram kaštuje ŭ dva razy daražej.
U viečarovym mieniu toj ža «Cezar» budzie kaštavać amal udvaja bolš, a ceny na supy pačynajucca ŭžo ad 44 000 za zvyčajny bulon z hrenkami.
U mieniu prysutničajuć jak vytančanyja sałaty z maładoj kapusty z rakavymi šyjkami i kłubnicami ŭsiaho za niejkija 69 000, tak i sup z cybuli, jaki vielmi lubili francuzskija sialanie XIX stahodździa (a vy jaho možacie palubić tut i ciapier za 54 000).
U mieniu šmat receptaŭ italjanskaj kuchni: na zakusku — kapreze (77 000) ci bruskieta z načynkaj na vybar, u jakaści asnoŭnaj stravy — spahieci (bałańjeze – 74 000, karbanara – 69 000), niekalki vidaŭ fietučyni i łazańja.
Interjer kaviarni «Boulevard» vykanany ŭ ciopłych kolerach.
Ceny na stravy ź miasa ŭ kaviarni spadara Kanaplova nie maleńkija: za jałavičnuju vyrazku «Šatabryjan» naviednik zapłacić 249 000, za cialačuju vyrazku — 199 000. Na ptušcy ci rybie sekanomić taksama naŭrad ci atrymajecca. Kurynaje file ŭ tamatnym sousie z hratenam z harbuza kaštuje 119 000, file 3-ch vidaŭ ryby — 239 000.
Takim čynam, davajcie padličym samy tanny nabor stravaŭ dla sytnaj viačery. Samy prosty sałat pad nazvaj «Lohki zialony sałat» budzie kaštavać 54 000, sup — kuryny bulon za 44 000, z haračaha voźmiem kurycu: pałova kuraniaci albo kurynaje file ŭ tamatnym sousie budzie kaštavać 119 000 za porcyju. A na desiert — samuju tannuju kavu espresa za 19 000 ci lubuju harbatu za stolki ž. Da jaje — prafitroli za 44 000. Treba zaznačyć, što navat samaja tannaja harbata padajecca tut u imbryčku, a nie pakiecikavuju — drobiaź, ale pryjemna.
Harbatu padajuć u imbryčku, a nie pakiecikavuju.
Ałkahol nie biarom — i ŭ nas atrymlivajecca 280 000 na čałavieka, abo 30 dalaraŭ.
Takim čynam, «Boulevard» — nie samaja tannaja kaviarnia, ale z hustam, i kuchar tam dobra viedaje svaju spravu.
Źmiena haspadara prostym naviednikam niezaŭvažnaja, chiba što ŭładalniki dyskontnych kartak zastalisia pakryŭdžanyja. Vyjaviłasia, što ciapier niemahčyma skarystacca byłoj źnižkaj – mahčyma, kali źmianiŭsia ŭładalnik, usia klijenckaja baza była anulavanaja, i heta niepryjemna ździŭlaje.
Druhaja ŭstanova Kanaplova-małodšaha nazyvajecca «Wine & Whiskey Bar Mixx». «Z akcentam na biezdakorny hust. Z tonkimi smakavymi niuansami ŭ kožnaj stravie», — takoje napyšlivaje apisańnie maje bar na svajoj veb-staroncy.
Litaralna za paru miesiacaŭ miesca źmianiłasia da niepaznavalnaści: raniej u adnoj z załaŭ stajaŭ muzyčny aŭtamat i kalekcyja piŭnych kubkaŭ z roznych kutkoŭ śvietu, a ciapier pab pieraprafilavaŭsia ŭ łaŭnž-bar «z atmaśfieraj vysokaha stylu». Škada, kaniečnie, što aŭtamat prybrali — dzie jašče takuju aŭtentyčnuju reč u Minsku znojdzieš. Ale zatoje łanč-mieniu ŭ bary bolš raznastajnaje, čym u pieršaj kaviarni Kanaplova.
U abiedziennym mieniu spahieci bałańjeze kaštujuć usiaho 55 000, hulaš sa śvininy z bulbianymi dolkami i marynavanym hurkom — 45 000, a vialikaja talerka krem-supu z brokali z trufielnym alejem — 26 000.
Krem-sup z brokali z trufielnym alejem i hrenkami za 26 000 možna zamović u abiedziennym mieniu.
Hučyć apietytna, słovazłučeńnie «trufielny alej» nadaje stravie zahadkavaści, dy i kaštuje ŭsiaho na tysiaču rubloŭ daražej za kuryny bulon ad «Boulevard». Što dziŭna, u hetym mieniu jość i desiert: tvarožny mus z kłubničnym sousam za 23 000.
Jak vodzicca, viečarovaje mieniu našmat daražejšaje za dzionnaje. Tak, luby harnir tut kaštuje 25 000: možna zamović zialonuju sałatu z aliŭkavym alejem, zapiečanuju bulbu z travami i časnakom, piure z parmiezanam dy harodninaj. Paraŭnajcie: za adny i tyja ž hrošy ŭ bary «z vysokim stylem» možna nabyć adrazu dva zialonyja sałaty, a ŭ «Boulevard» — tolki adzin (pry tym, što składaŭ mieniu ŭ abiedźviuch kaviarniach adzin i toj ža šef-kuchar).
Ale nie budziem skvapnymi, chaj u «Wine & whiskey bar Mixx» my sekanomili na sałacie, zatoje pajeści ŭviečary tannaj pasty tut užo nie atrymajecca. Budźcie hatovyja vykłaści 100 000 za spahieci z vendžanymi kiłbaskami i firmovym sousam (napeŭna, aŭtarski varyjant karbanara) dy 140 000 za chatnija taljateli z trufielnym sousam.
Samaja darahaja sałata kaštuje tut bolš za pastu i sałatu razam uziatyja — budźcie łaskavyja, 160 000 za hrudzinku kački z apielsinami. Nu, ci 80 000 za sałatu «Ajśbierh» z vostrymi vendžanymi kiłbaskami i fasolaj.
Padličvać samy tanny ček z ulikam hryl-karty nie padymajecca ruka: samy tanny stejk ź file siomhi ź limonnaj sollu budzie kaštavać 110 000, pa astatnich pazicyjach tut i blizka niama takich cen.
Sałaty ŭ «Wine&whiskey bar Mixx» — ad 80 000 za porcyju.
Samy darahi stejk — «Porter-chaŭs» za 600 000 (ZŠA, 110 dzion ziernievaha adkormu — tłumačycca ŭ mieniu). Dla amataraŭ mižziemnamorskaj kuchni bar prapanuje smažanych karakacic z avakada i čyli — znoŭ ža, pa boskich, možna skazać, cenach — 130 000 za porcyju.
Amierykana i espresa kaštujuć prykładna stolki ž, kolki ŭ inšych kaviarniach horada — 20 000, łate tut troški daražejšaje — 35 000, ajryš-kava ź viski abydziecca ŭ 60 000. Lubuju harbatu možna zamović za 25 000.
Takim čynam, abiedźvie kaviarni Kanaplova-małodšaha tannymi nie nazavieš. Raźličanyja jany, napeŭna, na pradstaŭnikoŭ kłasa, troški vyšejšaha za siaredniaha vybarca, jaki vybiraŭ jahonaha tatu ŭ pałatu (na siaredniestatystyčny, pavodle Biełstata, zarobak u 5 547 075 rubloŭ možna źjeści roŭna 9 stejkaŭ «Porter-chaŭs» ci štodnia ciaham miesiaca jeści karakacic i dva sałaty).
Jašče ŭ 2011 syn eks-staršyni Pałaty pradstaŭnikoŭ Uładzimira Kanaplova byŭ namdyrektara (pa ideałahičnaj pracy) u minskaj kaviarni, a ciapier jon paśpiachovy restaratar ź dźviuma niatannymi ŭstanovami ŭ centry stalicy.
Plus treba ŭličyć, kolki hrošaj było ŭkładziena na daviadzieńnie piŭnoha paba da «bara z vysokim stylem» — cikava, jak nazyvajecca hety recept zvyšpaśpiachovaha biznesu?
