Humanitarny licej imia Jakuba Kołasa pačaŭ piaty navučalny hod u nielehalnych umovach. U 2003 hodzie licej likvidavali zhodna z patrabavańniem Ministerstva adukacyi z farmuloŭkaj “dziela aptymizacyi navučalnaha pracesu”.
U aŭtorak u liceistaŭ pačalisia zaniatki. Pakolki vučni i nastaŭniki letam znachodziacca ŭ Polščy, dzie jany sumiaščajuć vučobu i adpačynak, u vieraśni praciahvajucca vakacyi. Analahičnaja sytuacyja i ŭzimku: na Kalady, kali školniki adpačyvajuć, licej źjaždžaje ŭ Vilniu i tam maje mahčymaść vučycca ŭ budynku litoŭskaha liceju ź labaratoryjami, spartovaj zalaj, abstalavanymi kabinetami.
Ciapier častka liceistaŭ razam z dyrektaram Uładzimieram Kołasam znachodzicca ŭ Polščy na zaprašeńnie polskich kalehaŭ dla ŭdziełu ŭ sumiesnym prajekcie “Narodny albom”.
Uł.Kołas: “Konkurs. U paniadziełak ź piaci žadajučych uziali adnaho čałavieka”
Havoryć Uładzimier Kołas:
“Navat nia ŭsich žadajučych prymajem. Konkurs. U paniadziełak ź piaci žadajučych uziali adnaho čałavieka. Adbor davoli surovy”.
Vykładčyk liceju Lavon Barščeŭski ličyć, što sioleta, niahledziačy na ŭsie ciažkaści nielehalnaha isnavańnia, stała lahčej pracavać. Jon tłumačyć heta tym, što za čatyry hady ŭdałosia vypracavać niekatoryja rečy, kab źviartać na ich mienš uvahi.
“Vučoba ŭ licei dazvalaje zasiarodzicca mienavita na vučobie i na pazaklasnaj dziejnaści, pavodle intaresaŭ samich vučniaŭ, a nie pa zahadu načalstva, jak heta ciapier u škołach. Što tyčycca perspektyvaŭ, to, biezumoŭna, pakul isnuje ŭ krainie siońniašniaja systema padaŭleńnia, danośnictva, systema padmanu, uźviadzieńnia adukacyi da poŭnaj farmalnaści i abiesčałaviečvańnia adukacyi, hetaja patreba budzie zastavacca”.
Vučanica liceju Palina kaža, što ciapier nie pajšła b u zvyčajnuju škołu:
“Mnie tut značna cikaviej vučycca, čym u škole i nia tolki z-za taho, što tut mienšyja hrupy i padychod da nastaŭnikaŭ i ich da nas absalutna inšy. Mnie padabajecca ŭdzielničać u pazaklasnych mierapryjemstvach. Ciapier my stavim pjesu “Narodny albom”, jeździm na roznyja festyvali navat za miažu. Mnie vielmi padabajecca ŭdzielničać u kancertach, jakija časam robiać sami navučency liceja”.
Liceist Źmicier Halanaŭ padzialiŭsia svaimi planami:
“Ja rychtujusia być licejskim dy-džejem, tamu što naš dy-džej Hienadź Zajac chutka skončyć licej. Jon na čaćviortym kursie. Jon navučyŭ mianie niekalkim dy-džejskim pryjomam. Kali my znachodzimsia ŭ Polščy, nam dajuć mahčymaść stavić dyskateki i liceistam jany padabajucca. Liceisty nia tolki lubiać vučycca, ale j adpačyvać taksama”.
U licei ciapier vučycca kala 70 navučencaŭ. U pieršy hod nielehalnaha isnavańnia ich było 120. Vypuskniki liceju vučacca ŭ prestyžnych eŭrapiejskich i biełaruskich universytetach.
