Trahiedyja na darozie adbyłasia ŭ minułuju niadzielu ŭ Mahiloŭskim rajonie, pablizu vioski Kniažycy. Aŭtamabil "Ford" źbiŭ čatyroch vučniaŭ Kniažyckaj škoły. 15-hadovaja dziaŭčyna zahinuła na miescy, astatnija atrymali ciažkija traŭmy. Dva chłopcy znachodziacca ŭ reanimacyi, stan jašče adnoj dziaŭčynki miedyki aceńvajuć jak stabilny.
Kampanija padletkaŭ kala hadziny ŭnačy viartałasia z dyskateki: jany šli pa zbočynie i, jak naležyć, mieli flikiery. Aŭtamabil vyjazdžaŭ z darohi, jakaja viadzie ad aeraporta na trasu "Minsk—Mahiloŭ" i, vidać, vadziciel nie spraviŭsia z kiravańniem. Adnak zamiest taho, kab akazać dapamohu dzieciam, vadziciel ź miesca zdareńnia źbieh. Praŭda, jaho chutka znajšli i zatrymali rabotniki Dziaržaŭtainśpiekcyi.
Vinoŭnikam strašnaj avaryi akazaŭsia 37-hadovy mužčyna, achoŭnik SVK "Avanhard". Jon byŭ pjany. Jak potym vyśvietliłasia, napiaredadni ranicaj jaho ŭžo zatrymlivali ŭ stanie ałkaholnaha apjanieńnia, adnak praz 15 hadzin, niahledziačy ni na što, jon znoŭ sieŭ za rul aŭtamabila, što i skončyłasia trahiedyjaj.
Mužčyna ciapier zatrymany, adnak jon nastojvaje na tym, što spaŭ i ničoha nie rabiŭ, bo nie pamiataje. Tym nie mienš, aŭtamabil z charakternymi paškodžańniami stajaŭ kala vartaŭnickaj, dzie spaŭ achoŭnik, i klučy byli na miescy. Z hetym daviadziecca razabracca śledčym, bo raspačata kryminalnaja sprava. Pavodle infarmacyi DAI Mahiloŭskaj vobłaści, za vosiem miesiacaŭ u rehijonie zatrymana kala 4300 vadzicielaŭ, jakija kiravali aŭtamabilami ŭ stanie ałkaholnaha apjanieńnia. Za 9 miesiacaŭ niećviarozyja vadzicieli stali vinoŭnikami 80 DTZ. Pa ich vinie 12 čałaviek zahinuli i bolš za sotniu atrymali traŭmy i kalectvy.
A ŭčastak šašy kala vioski Kniažycy Mahiloŭskaha rajona apošnim časam atrymaŭ viadomaść jak vielmi niebiaśpiečny. Tut uzimku maršrutnaje taksi, jakim kiravaŭ minčanin, źbiła naśmierć dvuch małodšych školnikaŭ, jakija pierachodzili darohu pa piešachodnym pierachodzie, nakiroŭvajučysia ŭ škołu.
