U sieradu 3 kastryčnika va ŭpravie Partyi BNF adbyłasia pres‑kanferencyja siabroŭ arhkamitetu «Eŭrapiejskaha maršu». Na hety raz palityki (prysutničali staršynia Partyi BNF Vincuk Viačorka, jahony namieśnik Viktar Ivaškievič, staršynia AHP Anatol Labiedźka, a taksama sacyjał‑demakrat Ihar Rynkievič) havaryli pra mižnarodnuju padtrymku akcyi 14 kastryčnika.
 Viktar Ivaškievič |
 Vincuk Viačorka |
 Anatol Labiedźka |
 Ihar Rynkievič |
Staršynia arhkamitetu Viktar Ivaškievič raskazaŭ, što ŭčora Alaksandar Milinkievič, jon, Andrej Sańnikaŭ i Michaił Marynič mieli sustreču z pasłami krainaŭ Eŭrasajuzu. Sustreča adbyłasia ź inicyjatyvy słavackaha dyplamata Lubamira Rehaka. (Słavaččyna ciapier pradstaŭlaje intaresy ES u Biełarusi).
«My raskazali pasłam pra šmatlikija zatrymańni, jakija adbyvajucca ŭ Miensku napiaredadni «Eŭrapiejskaha maršu».
U toj samy momant, kali adbyvałasia sustreča sudździ pakarali piatnaccaćciu sutkami aryštu barysaŭskich aktyvistaŭ Źmitra Barodku, Leanida Navickaha i Śviatłanu Harachavik. My paprasili, kab dyplamaty vykazali svajo abureńnie biełaruskim uładam», — skazaŭ Ivaškievič.
Darečy, dazvoł na praviadzieńnie «Eŭramaršu» ŭsio jašče nia dadzieny. Ivaškievič praciahvaje:
«Naš stan ciapier padviešany. Maŭčyć i spn.Piatkievič. My prajavili łasku i dobruju volu ŭładam, nakiravaŭšy list Piatkievič. Toje, što ŭłady maŭčać — heta ich prablemy. Heta jany majuć 10 miljardaŭ dalaraŭ zamiežnych zapazyčańniaŭ, a da kanca hodu handlovy deficyt składzie 7 miljardaŭ. Tamu supracoŭnictva z nami i z Eŭropaj u ichnych intaresach. My prajavili eŭrapiejski ŭzrovień palityki, ale Piatkievič maŭčyć. Kali ŭładam tak lepš, to niachaj, kali jany ŭsio ž adumajucca, to čas adkazać jašče jość. Nas šmat krytykavali za hety krok, ale, zrazumiejcie, što my prapanavali supracoŭnictva nie Łukašenku, a chutčej čynoŭnikam siaredniaha źviana, jakija viedajuć sapraŭdny stan biełaruskaj ekanomiki, jakija razumiejuć nieabchodnaść supracoŭnictva z Eŭropaj. Naša ruka pa‑raniejšamu praciahnutaja da dyjalohu, tamu vyrašać uładam».
Na siońniašni dzień ADS nakiravali zaprašalnyja listy bolš čym saraka eŭrapiejskim palitykam, siarod jakich prezydent Eŭraparlamentu Hans‑Hiert Pioterynh, polski deputat Bohdan Klich, deputaty Eŭraparlamentu, parlamentary susiednich ź Biełaruśsiu krainaŭ. Adrazu paśla «Eŭrapiejskaha maršu» ŭ Miensk prylacić specdakładčyk Parlamenckaj Asamblei Rady Eŭropy Andrea Ryhoni. Jon budzie mieć pieramovy, jak z pradstaŭnikami apazycyi, tak i ŭładaŭ. Z apošnimi jon źbirajecca abmierkavać i vyniki akcyi 14 kastryčnika.
Vincuk Viačorka vykazaŭ upeŭnienaść, što bližejšym časam Rasieja budzie praciahvać pazbaŭlać biełaruski režym ekanamičnym ryčahoŭ.
«Ułady buduć vymušanyja pavaročvać u bok Zachadu. Naša zadača, kab susiednija ź Biełaruśsiu krainy vykarystali heta. Vielmi pazytyŭnym tut vyhladaje vizyt Siarhieja Sidorskaha ŭ Vilniu», — adznačyŭ V.Viačorka.
Anatol Labiedźka paviedamiŭ, što AHP nakiravała zaprašeńni na «Eŭrapiejski marš» va Ŭkrainu siabram BIUT i «Našaj Ukrainy». Ci pryjeduć jany zaležyć ad taho, jak budzie raźvivacca palityčnaja sytuacyja va Ŭkrainie paśla parlamenckich vybaraŭ. Taksama Anatol Labiedźka prademanstravaŭ vitalny list ad hieneralnaha sakratara Chryścijanska‑demakratyčnaha sajuzu Niamieččyny Ronalda Pafały. Na pres‑kanferencyi było zaznačana, što šmat chto z zamiežnikaŭ nia zmoža pryjechać u Biełaruś praz admovu ŭ atrymańni vizy.
Pry kancy pres‑kanferencyi Viktar Ivaškievič adznačyŭ, što siońnia vidavočna, što biełaruskija ŭłady dumajuć nad tym, «jak dazvolić akcyju, kab joj pieraškodzić». Palityki nie vyklučajuć, što napiaredadni maršu pabolšaje vypadkaŭ zatrymańniaŭ i aryštaŭ demakratyčnych aktyvistaŭ. U svaju čarhu Anatol Labiedźka paabiacaŭ «dažyć» da 14 kastryčnika.
Na pytańnie, ci šmat ludziej vyjdzie na vulicy padčas mitynhu Ivaškievič vykazaŭsia karotka:
«Vyjduć usie tyja, chto ličać siabie eŭrapiejcami».
