Najvyšejšuju ŭznaharodu Eŭropy za ŭniosak u achovu raślin atrymaŭ miančuk Aleh Masłoŭski. Aproč jaho, takoj uznaharodaj vałodajuć usiaho 12 čałaviek u śviecie.
Uznaharodžańnie adbyłosia pry kancy vieraśnia na 5‑j mižnarodnaj kanferencyi «Planeta Eŭropa» ŭ Rumynii. «Srebny list» prysudžajuć za ŭniosak u zachavańnie raślin.
— Heta najvyšejšaja ŭznaharoda dla batanika ŭ Eŭropie, jak dla piśmieńnika — Pulicaraŭskaja premija. Mnie było tak pryjemna! — raskazaŭ Aleh Masłoŭski. — Uznaharodu prysudzili za toje, što biełarusy ŭdzielničali ŭ raspracoŭcy metadaŭ zachavańnia raślin u Eŭropie j pieršymi ŭ SND realizavali ŭnikalnyja prajekty: vyłučyli samyja značnyja bataničnyja terytoryi, vyjavili vidy j ekasystemy, jakija znachodziacca pad pahrozaj źniknieńnia; vyrašyli prablemu zachavańnia łuhoŭ; a samaje hałoŭnaje — raspracavali dla orhanaŭ kiravańnia systemu kadastraŭ. Takoj bolš niama nidzie. Kadastar — heta kamputarnaja encyklapedyja, pavodle jakoj miascovyja ŭłady mohuć sačyć, jak źmianiajecca kolkaść pryrodnych resursaŭ, i prymać hramatnyja rašeńni (naprykład, ci dazvalać narychtoŭku draŭniny ci zbor jahad u svaich lasach). Było pryjemna, što Biełaruś nazvali ŭ liku 4‑ch krain, jakija damahlisia najbolšaha prahresu ŭ halinie zachavańnia raślin, razam ź Vialikabrytanijaj, Baŭharyjaj i Serbijaj.
Uznaharoda zroblenaja z čystaha srebra, da jaje prykładzieny imienny dyplom. Ciapier jana ŭpryhožvaje pracoŭnaje miesca Aleha Masłoŭskaha ŭ Instytucie eksperymentalnaj bataniki imia Kupreviča. Aprača nahody dla honaru, «Srebny list» — heta propusk u eŭrapiejskuju ekalahičnuju palityku j da dadatkovaha finansavańnia na pryrodaachoŭnyja prajekty.
