 |
Alaksandru Milinkieviču prysudžanaja pačesnaja českaja premija. Jon vyrašyŭ pieradać jaje Paŭłu Sieviaryncu.
Praskaje Tavarystva mižnarodnaha supracoŭnictva prysudziła Alaksandru Milinkieviču premiju za Hramadzianskija zasłuhi imia Hanny Elenbohien.
“Ja razhladaju hetuju ŭznaharodu jak vydatnaje pryznańnie namahańniaŭ demakratyčnych siłaŭ Biełarusi pa ŭstalavańniu demakratyi i svabody ŭ svajoj krainie, — zajaviŭ Alaksandr Milinkievič.
Ja liču za vialiki honar pieradać hetuju ŭznaharodu Paŭłu Sieviaryncu, vybitnamu maładomu biełaruskamu palityku, lideru Biełaruskaj Chryścijanskaj Demakratyi, zasnavalniku Maładoha Frontu.
Na praciahu niekalkich hod Pavał źjaŭlajecca bliskučym lideram biełaruskaj demakratyčnaj moładzi. Jahonyja vysokija maralnyja pryncypy - heta jaskravy prykład patryjatyzmu, niazłomnaj voli i viery ŭ pieramohu Svabody i Spraviadlivaści. Jahonaja addanaść chryścijanskim i demakratyčnym kaštoŭnaściam, a taksama jahony ŭdzieł u adukacyi moładzi nadajuć jamu vialiki maralny aŭtarytet u vačach jak maładoha pakaleńnia i ŭsioj biełaruskaj demakratyčnaj supolnaści.
Mienavita z hetaj pryčyny Pavał staŭ abjektam pastajannaha pieraśledu z boku represiŭnaha aparatu siońniašniaha režymu. Śpis jahonych štrafaŭ, aryštaŭ, zatrymańniaŭ i navat kryminalnaha pieraśledu i prysudu śviedčać ab jahonaj addanaści, samaachviarnaści i ŭzornaj mužnaści. Pavał taksama źjaŭlajecca vielmi talenavitym publicystam, aŭtaram šerahu knih i artykułaŭ, dzie jon adstojvaje idei i kaštoŭnaści, jakija zaklikajuć biełarusaŭ da nacyjanalnaha adradžeńnia i pratestu suprać dyktatury. Pierakanany, što dziejnaść Paŭła moža słužyć uzoram hramadzianskaj pazycyi i praŭdzivaści jak u Biełarusi, tak i za jaje miežami”, — havorycca ŭ zajavie Milinkieviča.
Premija imia Elenbohien raniej prysudžałasia byłomu prezydentu Čechii Vacłavu Haŭłu, byłoj dziaržsakratarcy ZŠA Madlen Ołbrajt, byłomu karalu Rumynii Michaju, pijanistu Ŭładzimieru Aškienazi. Pavodle tradycyi, atrymalnik uznaharody pieradaje jaje maładomu čałavieku. Darečy, V. Havał pieradaŭ jaje ŭ 2003 hodzie redaktaru “Našaj Nivy” Andreju Dyńku.
Hrašovaja častka premii składaje sioleta 150 tysiač českich kronaŭ (kala 7500 dalaraŭ).
Pavał Sieviaryniec, akazvajecca, ad paniadziełka viedaje, što Milinkievič pieradaŭ jamu premiju Elenbohien. “U pieršuju čarhu ja vielmi ŭdziačny jamu. Jon hodny čałaviek, jaki zasłužyŭ hetuju premiju. Jamu chapiła mužnaści, kab uziać na siabie kryž zmahańnia z apošniaj dyktaturaj Eŭropy. Milinkievič zrabiŭ toje, što nia moh zrabić nivodzin biełaruski palityk ciaham apošnich piatnaccaci hadoŭ. Jon viarnuŭ u biełaruskuju palityku pačućcie ćviarozaści, nie straciŭšy pačućcia duchoŭnaści. Toje, što Milinkievič pieradaje premiju mnie – heta ŭčynak ŭhanaravańnia dziasiatka “maładafrontaŭcaŭ”, jakija prajšli praz kryminalnyja sudy, a taksama stvaralnikam Biełaruskaj chryścijanskaj demakratyi, jakija sutykajucca z prablemami rehistracyi i dziejańnia. Vielmi mnie pryjemna, što premiju pieradali mnie. Dziakuj usim, chto spryčyniŭsia da hetaha”.
Fota photo.bymedia.net
