 |
Pomnik na mahile Anatola Sysa da treciaje hadaviny śmierci paeta źbirajecca pastavić skulptar Henik Łojka. Kamień užo zamoŭleny, ale na vyrab brakuje hrošaj.
“Ja dobra viedaŭ Anatola, jon ličyŭ mianie siabram, — kaža skulptar. — My byli znajomyja z tych časoŭ, kali jon byŭ u “Tutejšych”, a ja — u “Tałace”. U mianie jość skulptura, jakuju ja zrabiŭ tady dla “Tutejšych”: “Vianok maładym biełaruskim paetam”, ciapier jana zachoŭvajecca ŭ muzei Bahdanoviča”. I samomu Sysu Hienik Łojka niekali padaryŭ nievialikuju skulpturu “Stracim-lebiedź”: “Pamiatajecie jahony vierš:
A ty, Stracim, adzin
u evanhielskim niebie Radzimy...
Ty laci. Nie hladzi,
ty ž pryvyk da azior u ildzinach”.
Henik Łojka ŭžo stvaraŭ pomniki pa dziejačach kultury. Naprykład, pa Michasiu Stralcovu, Michału Dubianieckamu. Jaho pomnik pa Sysu — stylizavany kryž z bareljefam paeta ŭ centry. Źvierchu sprava ŭ ciarnovym hniaździe prymaściłasia ptuška, što symbalizuje saboj «sałaŭinaje serca» Biełarusi. U nižniaj častcy kryža — nadpis «Sys Anatol» z paznakaj hodu naradžeńnia i śmierci paeta.
Aproč Łojki, u konkursie, zładžanym arhkamitetam pa ŭšanavańni pamiaci paeta, brali ŭdzieł skulptary Aleś Šaternik, Leŭ i Siarhiej Humileŭskija.
Pomnik budzie z čornaha hranitu (habro-dyjabazu), vahoju niedzie 800 kh. Kamień užo zamoŭleny na zavodzie «Biełhran», što ŭ mienskaj Dražni.
«Spačatku jaho musiać razrezać, i my pieraviaziem jaho da mianie ŭ majsterniu, — kaža spadar Łojka. — Mienavita na apłatu pasłuh zavodu i transparciroŭku patrebnyja hrošy — usiaho paŭtara miljona rubloŭ. Potym pačniecca užo mienavita maja praca».
Pa słovach siabra arhkamitetu, paeta Eduarda Akulina, ustalavańnie i adkryćcio pomniku planujecca da treciaj hadaviny z dnia śmierci Anatola Sysa – u traŭni 2008 h. u vioscy Haroškaŭ.
Srodki na na vyrab i ŭstalavańnie pomnika Sysu možna pieradać, źviarnuŭšysia pa t.: (017) 284-44-04, 768-56-14 (Eduard), (029) 955-92-04 (Henik).
