 |
U mnohich pašpartnych stałach supracoŭniki rekamendujuć hramadzianam afarmlać dazvolny štamp i nadalej — terminam da piaci hadoŭ.
Spadar Piotar niadaŭna padoŭžyŭ štamp na vyjezd na piać hadoŭ.
«U mianie ŭ lutym zakančvaŭsia štamp na vyjezd za miažu. U pašpartnym stale mnie rekamendavali padoŭžyć jaho. Ja zapłaciŭ 155 tysiač rubloŭ i padoŭžyŭ štamp na piać hadoŭ».
U AVIRach sytuacyju z čakanym skasavańniem štampu nie kamentujuć, adnak praciahvajuć afarmlać jaho.
Voś rekamendacyja supracoŭnicy adździełu hramadzianstva i mihracyi Centralnaha rajonu Miensku:
«Kali vy planujecie vyjechać, i ambasada patrabuje, to lahična budzie padoŭžyć štamp».
Varta adznačyć, što ambasady nie afarmlajuć vizaŭ u pašparty, u jakich termin dziejnaści dazvolnaha štampu mienšy za try miesiacy.
«Na siońniašni dzień nijakaj aficyjnaj infarmacyi niama»
Dyk ci admianiajuć dazvolny štamp? Kiraŭnica presavaha centru Ministerstva ŭnutranych spravaŭ Kaciaryna Samusienkava‑Šelehava peŭnaha adkazu na hetaje pytańnie nie daje:
«Na siońniašni dzień nijakaj aficyjnaj infarmacyi niama».
Karespandentka: «A kali jana budzie?»
Samusienkava‑Šelehava: «Kali budzie, my paviedamim nasielnictvu i ŭsim hramadzianam».
Darečy, sioleta ŭ lipieni ministar unutranych spravaŭ Uładzimier Navumaŭ na sustrečy z žurnalistami čarhovy raz zajaviŭ, što štamp na vyjezd planujecca admianić sa studzienia 2008 hodu.
Jašče hod tamu MUS rekamendavała hramadzianam Biełarusi nie afarmlać štamp dazvołu na vyjezd va ŭsie krainy śvietu bolš jak na dva hady.
Nahadaju, što na chadajnictva eks‑deputata Pałaty pradstaŭnikoŭ Uładzimiera Parfianoviča Kanstytucyjny sud pastanaviŭ admianić dazvolny zapis jašče ŭ vieraśni 2002 hodu.
Planavałasia, što jaho skasujuć u 2006 hodzie, potym termin admieny štampu pieranieśli na pačatak 2008 hodu.
Tady ž mierkavałasia admianić i hetak tak zvanyja «data‑štampy», jakija staviać pamiežniki ŭ pašpartach pry pierasiačeńni miažy. Da hetaha času pavinna być stvoranaja adzinaja systema ŭliku hramadzianaŭ, i ŭsie pamiežnyja punkty propusku pavinny zajmieć aŭtamatyzavanuju systemu kantrolu.
Hetaksama pavinien być stvorany bank źviestak asobaŭ, prava na vyjezd jakich z terytoryi Respubliki Biełaruś časova abmiežavanaje.
Načalnik adździełu kantrolu za vykanańniem sudovych rašeńniaŭ Kanstytucyjnaha sudu Viačasłaŭ Skirda adznačaje, što rašeńnie Kanstytucyjnaha sudu abaviazkovaje dla vykanańnia.
«Ustalavany termin — 31 śniežnia 2007 hodu. Ja čytaŭ u druku: Navumaŭ dakładna kaža, što budzie admienieny. Siońnia jašče kastryčnik. Havaryć pra toje, što jon nia budzie admienieny, jašče rana».
Staršynia Biełaruskaha Chelsynskaha kamitetu Taciana Proćka ličyć, što praz dazvolnyja štampy biełaruskaja dziaržava kantraluje svaich hramadzianaŭ:
«Tolki dziela hetaha jany i isnujuć. Jak tolki ŭ našaj krainie ŭzmacniajecca tendencyja hetaha kantrolu nad asobaj, tak hetyja ŭsie štamy realna pačynajuć uzmacniacca i isnavać».
Nieviadoma, ci kampensujuć u vypadku skasavańnia štampu sumy, jakija hramadzianie ŭžo zapłacili za afarmleńnie dazvolnaha zapisu — niekatoryja da 2012 hodu. Dziejańnie štampu na kožny hod kaštuje adnu bazavuju vieličyniu, ciapier heta 31 tysiača rubloŭ.
U susiednich Rasiei i Ŭkrainie hramadzianie majuć dva pašparty — unutrany i zamiežny. U litoŭcaŭ, palakaŭ, łatyšoŭ, jak i ŭ biełarusaŭ, — ahulnahramadzianski pašpart, ź jakim možna vyjaždžać za miažu. Ale tam nijakich dazvolnych štampaŭ nie patrabujuć.
