Šerah našych apazycyjaneraŭ paśpiašaŭsia vykazacca ŭ tym duchu, što, voś, na Ŭkrainie adbyŭsia paŭtor pamarančavaha tryjumfu. Hetaja ramantyzavanaja traktoŭka siońnia tym bolej pablakła.
Juščanka, jaki nia ciešyć siabie iluzijami ščyraha aljansu z kolišniaj "hazavaj pryncesaj", raspačaŭ svaju hulniu. I zamiž taho kab dać zialonaje śviatło čakanaj aranžavaj kaalicyi, prapanavaŭ usim siłam, što trapili ŭ parlament, sieści za stoł kansultacyj: "Ja očikuju vid lidieriv Partiji riehioniv, Błoku Juliji Timošienko, Błoku "Naša Ukrajina — Narodna Samooborona", Błoku Litvina političnoji mudrosti i krokiv do konsolidaciji krajini navkoło nacionalnich prioritietiv".
Naturalna, što pasyjanarnaja tryjumfatarka Julija Cimašenka adrazu adkinuła mahčymaść supracy z antahanistam Janukovičam. Zakručvajecca novaja intryha. I voś užo maskoŭskaje internet-vydańnie śpiašajecca nazvać padziei na Ŭkrainie teatram absurdu.
Ale ci nia bolej nahadvaje taki teatar sama Rasieja, asabliva paśla śviežaj zajavy Pucina pra svajo imaviernaje premjerstva? Zrešty, jaki b varyjant u Kramli ni vybrali, vožyku zrazumieła, što astatniaje — sprava techniki. Vybaraŭ u narmalovym sensie ŭvohule nia budzie. Pra Biełaruś pamaŭčym… Na Ŭkrainie ž (pry ŭsich padazreńniach, što na ŭschodzie nie abyšłosia biez krucielstva pry padliku, bo i dasiul niama ŭsich pratakołaŭ), badaj, nichto nie sumniajecca, što pa vialikim rachunku adbylisia mienavita vybary. Palitykaŭ u Radu, chaj sabie i daloka nie idealnych, sapraŭdy abraŭ narod.
Dyj pakazalna ŭžo samo toje, što kali paŭhodu tamu tam vybuchnuła palityčnaja kryza, dyk paratunkam viarchi vybrali mienavita daterminovyja vybary — to bok prysud elektaratu.
I ŭ hetym sensie Ŭkraina, jakuju, badaj, jašče nie adnojčy budzie lichamanić, daloka adarvałasia ad nas. Jak i ad Rasiei. Pryčym ad Rasiei — nia tolki ŭ sensie demakratyčnaha raźvićcia, ale i ŭ sensie harantyj ad imperskaj ekspansii. Bo navat Janukovič, jakoha inercyjna ličać prarasiejskim, musić praklamavać eŭrapiejski vektar.
I potym, krainu z realnymi mechanizmami demakratyi nivodzin asobna ŭziaty palityk nia zmoža zakłaści ŭ palityčny lambard ci pradać z-pad krysa.
