 |
Dniami adbyłasia karekciroŭka prajektu achoŭnaj zony Aŭhustoŭskaha kanału. Meta: nie dapuścić, u pryvatnaści, budaŭnictva tam abjektaŭ, što buduć supiarečyć navakolnamu asiarodździu i tradycyjami miascovaj architektury.
Dniami adbyłasia karekciroŭka prajektu achoŭnaj zony Aŭhustoŭskaha kanału. Meta: nie dapuścić, u pryvatnaści, budaŭnictva tam abjektaŭ, što buduć supiarečyć navakolnamu asiarodździu i tradycyjami miascovaj architektury. Jak viadoma, u rajonie kanału pa abodva baki miažy — polskim i biełaruskim —viaskovyja pabudovy zrobleny pryblizna ŭ adnym styli.
Isnuje hieneralny plan Aŭhustoŭskaha kanału, na jakim paznačana: što, dzie i ŭ jakim nakirunku možna raźvivać, u im uličvajecca budaŭnictva hatelaŭ ci inšych novych budynkaŭ, ale nia tolki heta. Adzin sa specyjalistaŭ nam paviedamiŭ: ciapier daviałosia ŭzhadniać adzin chutar u rajonie Radziviłak, jaki znachodzicca ŭ zonie kanału. Čałaviek, što kupiŭ chutar, choča jaho krychu pierabudavać. Jamu prapanavali pastavić bramu ź pierakryžavańniem, što charakterna dla hetych miaścinaŭ. Jon chacieŭ budavać inšuju, ale, zrazumieła, pahadziŭsia. Toje ž samaje było z płotam: dumaŭ vysoki hłuchi pastavić, ale heta ŭłaściva dla ŭschodniaj častki Biełarusi, zaznačyli eksperty.
U zonie kanału nie pavinny źjavicca nieadpaviednyja pabudovy, havorać specyjalisty. Turystam budzie tam cikava, kali jany ŭbačać miascovy kalaryt u architektury, raźvićcio tradycyi, a značycca, tady i sam kanał stanie bolš pryvabnym. A kali nabudavać što kamu da hałavy pryjdzie, naŭrad ci JUNIESKO pažadaje ŭklučyć abjekt u śpis suśvietnaj spadčyny, zaznačyŭ adzin z čynoŭnikaŭ. Miž inšym, na heta spadziajucca polskija ŭłady, pakolki prapanoŭvać JUNIESKO možna tolki ŭvieś kanał całkam — i polskuju častku, i biełaruskuju.
Kali biełaruskija ŭłady paskoranymi tempami rekanstrujavali kanał, dyk na susiedzkim baku jon amal na ŭsim praciahu ŭ pracoŭnym stanie, ale palaki krychu zaciahnuli budaŭničyja raboty na pamiežnym šluzie «Kužyniec». Praŭda, Hieneralny konsuł Respubliki Polšča ŭ Horadni Andžej Krentoŭski dniami paviedamiŭ, što ŭ siaredzinie kastryčnika palaki całkam zakončać svaju častku.
Dyplamat taksama zaznačyŭ — tady pačnie dziejničać adziny vodny šlach daŭžynioj bolš za 102 kilametry i źjavicca mahčymaść, kab u Biełaruś pryjaždžała bolej turystaŭ. Haradzienskija čynoŭniki spadziajucca, što paśla hetaha ŭ polskich biznesoŭcaŭ uźniknie žadańnie investavać u infrastrukturu na biełaruskim baku kanału, jakaja pakul što raźvivajecca słaba.
