Śviata bulby štovosień pravodziać babrujskija hramadskija aktyvisty pry padtrymcy ŭładaŭ. Heta adziny ŭ Biełarusi charčovy fiest.

Inicyjatar praviadzieńnia fiestyvalu bulby — babrujčanka Natalla Cymburskaja. Jana maryć ustalavać u svaim horadzie pomnik Bulbie i ŭdziačnamu Bulbašu. Žančyna — vialikaja amatarka dranikaŭ, i da bulby padychodzić pa‑fiłasofsku.

— Hałoŭny charč biełarusaŭ — heta bulba, — havoryć Natalla. — Toje naša tradycyjnaje, na čym bazujecca samaśviadomaść. Treba stavić na pjedestał usio rodnaje i blizkaje. I kali Biernu nie soramna pravodzić fiestyvali cybuli, to čamu b Babrujsku nie stać stalicaj bulby?

Prahrama sioletniaha fiestyvalu vialikaja i raznastajnaja. U konkursie na lepšuju stravu, pryhatvanuju z bulby, mohuć brać udzieł amatary i prafiesijanalnyja kuchary. Płanujecca niezvyčajnaja kulinarnaja akcyja: budzie pryhatavana samaja doŭhaja bulbianaja kaŭbasa — miarkujecca, što jaje daŭžynia składzie bolš za 20 mietraŭ.

Narodnaje žury vybiare ź dziesiatka hatunkaŭ bulby samuju smačnuju ŭ hatavanym vyhladzie. Na fiestyvali buduć handlavać bulbaj — dla ježy i nasiennaj, a taksama roznymi stravami. Naprykład, bulbianym kvasam.

Na bulbianym šmatborji kamandy buduć spaborničać u chutkasnych ačystcy i nadzirańni bulby, smažańni dranikaŭ, chutkasnym spažyvańni bulbianych straŭ, biehu z bulbianymi miachami. Pavodle prapanovy adnoj ź sietak kram mabilnaj suviazi, na fiestyvali buduć miatać mabilniki i bulbiny — što dalej palacić?

Naprykancy publika vybiare Karalevu bulby, a taksama Bulbašoŭ. Apošnich budzie niekalki: adzin pavinien lepiej za inšych śpiavać, druhi — tančyć, treci — być samym načytanym, a čaćviorty budzie samym intelektualnym u śfiery kampjutarnych hulniaŭ.

Na fiestyval bulby zaprašajuć u Babrujsk u niadzielu, 14 kastryčnika. Jon budzie prachodzić u miežach kirmaša «Załataja vosień» kala Pałaca mastactvaŭ z 10 da 15 hadzin.

Siarhiej Hutarevič, BulletinOnline.org

Клас
0
Панылы сорам
0
Ха-ха
0
Ого
0
Сумна
0
Абуральна
0