Zajaŭniki abiacajuć pryvieści demanstrantaŭ z Kastryčnickaj płoščy da Akademii navuk. Milinkievič: «Ja pajdu na Banhałor, choć heta ciažkoje maralnaje pytańnie i iści tudy nia chočacca». Ivaškievič: My idziom na heta, bo chočam, kab usio było absalutna mirna.

Rašeńnie pryniataje — «Eŭrapiejski marš» projdzie pa tym samym maršrucie, jaki prapanavali zajaŭnikam mienskija čynoŭniki. Jašče ŭ aŭtorak viečaram usim zajaŭnikam pryjšli listy ź Mienharvykankamu za podpisam namieśnika staršyni M.Ciciankova. U adkazie havorycca, što akcyja 14 kastryčnika dazvalajecca pa nastupnym maršrucie: Akademija navuk — vulica Surhanava — płošča Banhałor. Zbor la Akademii a 14:00, zakančeńnie akcyi a 19:00.

U sieradu z ranicy zajaŭniki «Eŭramaršu» praviali pasiedžańnie, dzie abmierkoŭvali prapanovy Mienharvykankamu. Urešcie było vyrašana zhadzicca z prapanavanym maršrutam. Razam z tym, zajaŭniki abiacajuć pryjści na Kastryčnickuju płošču, kab zabrać adtul usich ludziej, jaki pieršapačatkova tudy pryjduć.

«Eŭrapiejski marš» dazvolili — heta pazytyŭnaja navina, niepryjemna tolki, što naša prośba nie była zadavolenaja i nam dali nia toj maršrut. My ŭvieś čas havaryli pra mirny charaktar i niekanfliktnaść hetaj akcyi, tamu i vyrašyli pahadzicca pajści na Banhałor. Jašče heta robicca z toj pryčyny, što na marš źbirajecca pryjechać šmat aficyjnych pradstaŭnikoŭ Eŭrasajuzu. My chočam, kab jany vystupili na akcyi absalutna lehalna i zakonna», — adznačyŭ staršynia arhkamitetu Viktar Ivaškievič.

Lider AHP Anatol Labiedźka skazaŭ, što choć akcyja ŭžo i dazvolenaja, ale na miascovym uzroŭni ŭłady praciahvajuć palityku «zapałochvańnia, represij i pravakacyj». Jon nahadaŭ pra zatrymańni, jakija hetymi dniami adbyvajucca ŭ Horadni, Homieli i inšych haradach.

«My nia musim zapluščvać na heta vočy», — skazaŭ A.Labiedźka.

Lider Partyi BNF Vincuk Viačorka ŭ svaim karotkim vystupie zasiarodziŭsia na pytańni mižnarodnaj padtrymki «Eŭrapiejskaha maršu». Jon adznačyŭ, što pakul rana havaryć pra toje, chto mienavita z eŭrapiejskich palitykaŭ pryjedzie 14-ha ŭ Miensk, bo pytańnie vydačy vizaŭ dla niekatorych vyrašajecca tolki ciapier. Viačorka taksama paviedamiŭ, što dniami jon viarnuŭsia ź Biarozaŭskaha i Darahičynskaha rajonaŭ.

«Ludziej najbolš chvaluje vizavaje pytańnie. Siońnia ŭžo možna kazać ź vialikaj dolaj upeŭnienaści, što z nastupnaha hodu šenhienskija vizy dla biełarusaŭ buduć kaštavać amal u dva razy daražej, čym dla ŭkraincaŭ i rasiejcaŭ, i hetaje pytańnie treba vyrašać», — ličyć V. Viačorka.

Lider ruchu «Za svabodu» Alaksandar Milinkievič skazaŭ nastupnaje:

«Ja ŭ čarhovy raz pierakonvajusia, što hetyja ŭłady nia vučycca na svaich pamyłkach. U dobrych adnosinach z Eŭropaj siońnia zacikaŭlenyja ŭsie, u tym liku i ŭłady. Adzinaje patrabavańnie da apošnich — pavodźcie siabie prystojna. Ale hetaha niama i blizka. Takaja sytuacyja nahadvaje mnie viaskovyja tancy, kali ŭsim viesieła i choraša, ale na ŭsialaki vypadak chłopcy biaruć z saboj pałki, jakija pakidajuć pad płotam. Kali takim chłopcam niešta nie padabajecca na tancach, to jany biahuć za toj pałkaj i pačynajecca bojka. Toje ž i ŭ nas. Pierakanany, što «Eŭrapiejski marš» prademanstruje, što Biełaruś isnuje i choča žyć pavodle eŭrapiejskich normaŭ».

Jašče viasnoj Alaksandar Milinkievič zajaŭlaŭ, što bolš nia pojdzie na Banhałor. Voś što jon skazaŭ na hety kont:

«Dla mianie heta ciažkoje maralnaje pytańnie. Tak, iści na Banhałor nia chočacca, ale mnie nia chočacca taksama vyhladać kapryźlivaj panienkaj ci tym, chto nia choča adzinstva, tamu ja pajdu na Banhałor», — havoryć A. Milinkievič.

Naprykancy pres‑kanferencyi Viktar Ivaškievič paviedamiŭ, što siońnia ž voźmie brašurku «Što EZ moža dać Biełarusi?», a taksama rašeńnie Mienharvykankamu ź jakim pojdzie va ŭniversyteckija i zavadzkija prachadnyja, kab ahitavać ludziej pryjści na «Eŭrapiejski marš».

«Spadziajusia, za infarmavańnie ludziej pra rašeńnie haradzkich čynoŭnikaŭ mianie nichto nie zatrymaje», — žartuje V.Ivaškievič.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?