47‑hadovy italjanski parlamentar, jaki dahetul nikoli nia byŭ u Biełarusi, choča asabista aznajomicca z ahulnaj sytuacyjaj u krainie.
Niapiaredadni vizytu jon zajaviŭ, što metaj misii źjaŭlajecca padrychtoŭka spravazdačy pa sytuacyi ŭ Biełarusi, jakaja budzie pradstaŭlenaja na pačatku 2008 hodu ŭ Kamisiju pa palityčnych pytańniach PARE.
Siońnia Andrea Ryhoni sustreŭsia sa staršyniom Pałaty pradstaŭnikoŭ Nacyjanalnaha schodu Vadzimam Papovym. Hałoŭnaje pytańnie, jakoje jon zadaŭ śpikeru biełaruskaha parlamentu, heta ci biełaruskija ŭłady majuć žadańnie ŭmacavać stasunki z PARE, i ŭ hetym nakirunku byli zroblenyja kankretnyja kroki.
U svaju čarhu paśla sustrečy z pradstaŭnikom PARE Vadzim Papoŭ zajaviŭ, što Biełaruś namahajecca adnavić status «specyjalna zaprošanaha» ŭ PARE dla biełaruskaha parlamentu.
«My abmiarkavali ŭvieś spektar pytańniaŭ, pradstaŭlajučych ŭzajemny ahulny intares. Sustreča dazvoliła pravieryć pazycyi, udakładnić uzajemapohlady j damovicca ab formach dalejšaha supracoŭnictva,»‑ zajaviŭ Vadzim Papoŭ.
Ci vizyt specdakładčyka PARE budzie mieć istotnaje značeńnie dla eŭrapiejskaj palityki biełaruskaha ŭradu i ŭniasie źmieny ŭ adnosinach z eŭrapiejskimi strukturami?
Sustaršynia Palityčnaj rady abjadnanych demakratyčnych siłaŭ Anatol Labiedźka ličyć, što siońniašniaj sustrečy nia varta nadavać vialikaha značeńnia.
A. Labiedźka: Ja dumaju, što spadaru Ryhoni pradstavili ceły nabor čarhovych abiacańniaŭ. Ci italjanski parlamentar da hetaha padrychtavany, pabačym zaŭtra. My viedajem, što našyja ŭłady ŭmiejuć rabić dobraje ŭražańnie. Śpis tych, chto siadzić ŭ Pałacie pradstaŭnikoŭ, davoli bahaty. Jany jašče ŭ savieckija časy viedali, jaki treba arhanizavać pryjom i pravieźci pa peŭnamu maršrucie, kab u čałavieka byli pryjemnyja ŭspaminy. Naša zadača — pakazać druhuju Biełaruś i inšy bok sytuacyi ŭ našaj krainie. Moža niešta źmianiłasia, ale da hetaha spadar Ryhonie nia mieŭ u planach sustrečy z tymi, chto patrapiŭ u turmu napiaredadni Eŭrapiejskaha maršu. Vidać, jon taksama nie planuje sustrečy ź siem`iami skradzienych palitykaŭ. A škada, bo mienavita hetyja ludzi mohuć pakazać realnuju karcinu sytuacyi ŭ Biełarusi, a nie toje, što abiacaje j pakazvaje spadar Papoŭ.
Na dumku palitolaha Juryja Čavusava, na dadzieny momant Eŭropa nia maje jasnaha j vyraznaha planu supracoŭnictva ź Biełaruśsiu.
Jury Čavusaŭ: Siarod eŭrapiejskich palitykaŭ jość «jastraby», jakija prytrymlivajucca žorstkaha padychodu. Jość i «hałuby», jakija prytrymlivajucca teoryi viadzieńnia dyjalohu. Mačyma, štości z hetaha j atrymajecca. Biezumoŭna, dziaržaŭnaja prapahanda vykarystaje hety vizyt u jakaści pakazčyka taho, što, voś, pahladzicie, zamiežna — palityčnaja izalacyja prabita. Ale heta nie dyjaloh, tolki razmovy vakoł dyjalohu. Pakul što nijakaha kankretnaha vyniku ad hetaha čakać nia varta. Ale, biezumoŭna, takija vizyty važnyja. Važna, kab hramadzianskaja supolnaść adčuła, što nia budzie zamireńnia dyktatury Łukašenki, a što heta sapraŭdnaje imknieńnie palepšyć sytuacyju ŭnutry krainy.
Nieskładana zaŭvažyć, što kali idzie havorka pra supracoŭnictva ź Biełaruśsiu, to pradstaŭniki eŭrastrukturaŭ vyrazna padzialilisia na dva lahiery. Adnyja ź ich źjaŭlajucca prychilnikami žorstaha traktavańnia biełaruskaha režymu j uviadzieńnia čarhovych sankcyjaŭ. Inšyja, jak, naprykład, Andrea Ryhoni, źjaŭlajucca prychilnikami ŭciahnieńnia Biełarusi ŭ niejkija intehracyjnyja prajekty, pry dapamozie jakich zmoža źmianić palityku biełaruskaha ŭradu. Paŭstaje pytańnie, ci isnuje šaniec znajści «załaty srodak» u kantaktach ź biełaruskim bokam?
Palitolah Valer Karbalevič: Heta składanaje pytańnie. Va ŭsialakim razie eŭrapiejskija struktury prytrymlivajucca takoj žorstkaj linii — pakul biełaruskija ŭłady nia vykanajuć 12 patrabavańniaŭ Eŭraźviazu, to adnosiny nia mohuć «razmarozicca». Pryčym nia moža adbycca dyjaloh navat pa pytańniach dalokich ad palityki, kštałtu enerhietyka ci ekanamičnyja adnosiny. Sprava ŭ tym, što siońnia Biełaruś nia maje, što zaprapanavać Eŭropie, dziakujučy čamu Eŭropa mahła b zapluščyć vočy na prablemy z demakratyjaj i parušeńniem pravoŭ čałavieka ŭ Biełarusi. Niama takoha tavaru, jaki b Łukašenka moh pradać Eŭropie. Skažam, Muammar Kadafi ź Libii zmoh pradać Eŭropie admovu ad padtrymki mižnarodnaha teraryzmu. A pradstaŭniki palityčnych režymaŭ Siaredniaj Azii ci Zakaŭkaźzia, dzie taksama isnujuć vialikija prablemy z demakratyjaj, majuć haz dy naftu, jakija mohuć taksama pradać. A ŭ Łukašenki niama takoha tavaru. Jon sprabavaŭ pradać svajo dystansavańnie ad Rasiei, ale ničoha nia vyjšła. Akazałasia, što hety tavar nie taki cikavy dla Eŭropy, kab za jaho možna było zapluščyć vočy na prablemy z demakratyjaj. Tamu pakul što sytuacyja «zamaroziłasia» voś na takim uzroŭni.
Zaŭtra Andrea Ryhoni sustreniecca z pradstaŭnikami biełaruskaj apazycyi, jakuju buduć pradstaŭlać čatyry sustaršyni Palityčnaj rady abjadnanych demakratyčnych siłaŭ, a taksama Alaksandar Milinkievič i Stanisłaŭ Šuškievič. Jak paviedamiŭ Polskamu radyjo Anatol Labiedźka, asnoŭnymi pytańniami zaŭtrašniaj sustrečy buduć sytuacyja ŭ krainie j viartańnie Biełarusi ŭ Radu Eŭropy.
