Kali Ŭładzimier Pucin dabjecca ad Iranu zhortvańnia jahonaj jadziernaj prahramy, ZŠA mohuć admovicca ad PRA va Ŭschodniaj Eŭropie. Takaja prapanova źjaviłasia ŭ sieradu ad amerykanskaha Dziarždepu. A Džordž Buš daŭ zrazumieć, što ŭ vypadku padtrymki z boku Maskvy ŭ iranskim pytańni jon moža zapluščyć vočy na harotny stan rasiejskaj demakratyi.
Sensacyjnaja zajava ab mahčymaści zhortvańnia prajekta amerykanskaj PRA u Eŭropie ŭ abmien na admovu Irana ad jadziernaj prahramy zrabiŭ u sieradu ŭviečary ŭ Bruseli pamahaty dziaržsakratara ZŠA pa spravach Eŭropy i Eŭrazii Denieł Fryd. Vysokapastaŭleny dyplamat staŭ pieršym amerykanskim čynoŭnikam, jaki publična abviaściŭ pra toje, što ZŠA hatovyja pierahledzieć plany raźmiaščeńnia elementaŭ systemy supraćrakietnaj abarony ŭ Uschodniaj Eŭropie, kali Iran admovicca ad svajoj jadziernaj prahramy.
Pavodle Fryda, «kali Iran spynić pracy pa ŭzbahačeńni ŭranu, pačnie ŭzajemadziejničać ź mižnarodnaj supolnaściu i źmienić ton, my nia zmožam nie pryniać hetaha pad uvahu ŭ kantekście prablemaŭ PRA». Fryd nie chavaŭ, što jahonyja słovy adrasavanyja najpierš Maskvie.
«Nas niepakoić nie Rasieja, a Iran. My zakłapočanyja abvastreńniem prablemy vakoł Iranu, ale kali jana źniknie, my zrobim nieabchodnyja vysnovy», — skazaŭ čynoŭnik.
Zhodna ź im, rasiejskija partnery ŭžo viedać pra hetuju pazycyju. Zajavy prahučali na pasiedžańni Rady Rasieja-NATO, pryśviečanym prablemie PRA. Na mierapryjemstvie prysutničaŭ taksama kiraŭnik amerykanskaha ahienctva pa PRA hienerał Hienry Oberynh, jaki raniej nie dapuskaŭ zhortvańnia prajekta eŭrapiejskaj PRA ni pry jakich umovach.
Adnačasova ŭ amerykanskich i eŭrapiejskich ŚMI źjavilisia takija ž niečakanyja paviedamleńni ab tym, što niadaŭnija amerykanskija pieramovy ŭ Maskvie ŭ farmacie «2 na 2» stalisia nie takimi ŭžo biespaśpiachovymi. Hazety padkreślivać, što toj ža Fryd paviedamiŭ amerykanskim žurnalistam, što «dyskusija z Rasiejaj pa PRA idzie ŭ pazytyŭnym klučy i supravadžajecca peŭnym prahresam». Hienerał Oberynh u svaju čarhu pazytyŭna acaniŭ novyja padychody da prajekta PRA, sfarmulavanyja na sustrečy ŭ Maskvie 12 kastryčnika. Zhodna z Oberynham, ZŠA ličać varyjant intehravańnia rasiejskaj i amerykanskaj systemaŭ PRA u adziny mechanizm z vykarystańniem rasiejskich RŁS u Habale i Armaviry całkam rabočym i perspektyŭnym. Nahadajem, što paśla zakančeńnia pieramovaŭ abodva baki vyrazna dali zrazumieć, što ličać ich pravalnymi.
Pakazalnyja taksama prahramnyja zajavy, jakija kiraŭnik ZŠA zrabiŭ na ŭčorašniaj pres-kanferencyi ŭ Biełym domie. Džordž Buš zajaviŭ, što «nie zaniepakojeny ŭmacavańniem suviaziaŭ pamiž Rasiejaj i Iranam». Pavodle amerykanskaha prezydenta, jon praciahnie pracavać z rasiejskim prezydentam Uładzimieram Pucinym u napramku zhortvańnia jadziernaj prahramy Tehieranu. Jon nazvaŭ adnosiny z našaj krainaj «składanymi, ale važnymi adnosinami, jakija nieabchodna zachoŭvać». Jon taksama zrabiŭ niečakanuju zajavu ab tym, što «demakratyja – nia taja ŭłaścivaść, jakaja zakładzienaja ŭ kryvi Rasiei».
Pavodle vykazvańnia Buša, «pieraprahramavać asnoŭnuju rasiejskuju DNK, jakoj źjaŭlajecca centralizavanaja ŭłada, vielmi ciažka». Hetyja słovy byli ŭspryniatyja naziralnikami jak admova ad cisku na Rasieju pry adychodzie ad demakratyčnych normaŭ u ich ahulnapryniatym zachodnim razumieńni.
Padkreśliŭšy, što Iran nie pakidaje svaich jadziernych ambicyjaŭ, Buš skazaŭ, što takaja sytuacyja «pahražaje treciaj suśvietnaj vajnoj» i zaklikaŭ usie zacikaŭlenyja baki vyrašać hetuju prablemu sumiesna».
Narešcie, vidavočnaje źmiakčeńnie pazycyi ZŠA pa eŭrapiejskaj PRA, jak i vidavočnyja asbłableńni presinhu na Rasieju ŭ cełym, taksama moža być źviazanaje z pradmietam pieramovaŭ, jakija praviali dniami ŭ Tehieranie prezydenty Pucin i Achmadynedžad.
Šerah zachodnich hazet paviedamlaje, što rasiejski bok ahučyŭ u Iranie niejkuju “asablivuju prapanovu” pa iranskaj jadziernaj prahramie.
Detali nie paviedamlajucca. Pavodle źviestak The New York Times, novyja prapanovy byli zroblenyja na sustrečy Pucina z duchoŭnym i faktyčnym lideram Irana ajatałoj Chamieniei. Toje, što Rasieja ŭniesła novyja antykryzisnyja prapanovy, paćvierdziŭ u sieradu sakratar Vyšejšaj rady nacyjanalnaj biaśpieki Irana Ali Łarydžani. Jon taksama adznačyŭ, što Iran razhladaje hetuju prapanovu. Pavodle źviestak «Bi-Bi-Si», aficyjny Vašynhton «chacieŭ by daviedacca ad rasiejskaha kalehi padrabiaznaści pieramovaŭ u Tehieranie».
