Pryčyna - vykazvańni Alaksandra Łukašenki nakont habrejaŭ, jakija MZS Izrailu paličyła antysemickimi.
Izrailski bok maje namier ŭ piatnicu, 19 kastryčnika, zapatrabavać ad biełaruskaha dyplamata Ihara Laščeni tłumačeńniaŭ ŭ suviazi z vykazvańniami Alaksandra Łukašenki, paviedamlaje telegraf.by sa spasyłkaj na hazetu Haaretz. Takim čynam premjer-ministar Izrailu Cypi Liŭni rezka adreahavała na vykazvańni Alaksandra Łukašenki nakont habrejaŭ u časie pres-kanferencyi pierad rasiejskimi žurnalistam, što prajšła 12 kastryčnika.
"Suśvietnyja lidery pavinny ŭziać na siabie adkaznaść za baraćbu suprać antysemityzmu, što padymaje zvyrodlivuju hałavu ŭ roznych častkach śvietu, a nie zaachvočvać jaho", -- padreslliła kiraŭnik MZS Dziaržavy Izrail.
Nahadajem, što pad čas pres-kanferencyi Alaksandar Łukašenka zajaviŭ nastupnaje: «Kali vy byli ŭ Babrujsku, vy bačyli, u jakim stanie horad. U jaho strašna było zajści! Śvinušnik byŭ! Heta ŭ asnoŭnym byŭ habrejski horad».
Pasoł Izrailu ŭ Biełarusi Ziejeŭ bien-Arje z hetaj nahody zajaviŭ, što «vykazvańni prezydenta Biełarusi na adras jaŭrejaŭ vyklikajuć ździŭleńnie».
Radyjo "Svaboda" paviedamiła siońnia z spasyłkaj na hazety “Haarec”, što padčas tłumačalnaj hutarki z namieśnikam kiraŭnika departamentu Eŭropy i Azii izrailskaha MZS Pini Avivi, pasoł Biełarusi pasprabavaŭ abvierhnuć infarmacyju ab vykazvańniach Łukašenki, što vyklikała
dadatkovy hnieŭ supracoŭnikaŭ MZS. “Heta nia niejki klerk – heta vaš prezydent, ni mienš ni bolš, i my šakavanyja i vykazvajem našaje abureńnie. Aprača prezydenta Iranu nichto tak nie havoryć”, – skazaŭ Pini Avivi pasłu Laščeniu.
Kiraŭnictva MZS zaznačyła, što izrailski pasoł u Biełarusi ciapier znachodzicca ŭ adpačynku ŭ Izraili i što napačatku razhladałasia prapanova adkłaści jahonaje viartańnie ŭ Biełaruś. Adnak urešcie było vyrašana ŭstrymacca ad takoha kroku, kab nie pahłyblać kryzys. “Ale my nia budziem vahacca viarnuć pasła, kali takija vykazvańni prahučać znoŭ”, – skazaŭ vysokapastaŭleny słužboviec ministerstva. Adpaviednaja nota była pieradadzienaja biełaruskamu pasłu.
* * *
Pasoł Izraila ŭ Biełarusi Ziejeŭ Bien‑Arje nie byŭ adklikany izrailsikmi ŭładami, a pajechaŭ u adpačynak ź siamjoj. Razam ź im ź Minska vyjechaŭ pieršy sakratar pasolstva Ihal Kojfman ź siamjoj. Pra heta BiełaPAN zajavili ŭ pasolstvie Dziaržavy Izrail u Respublicy Biełaruś.
Jak paviedamili ŭ pasolstvie, dypłamaty «vylecieli viečaram 17 kastryčnika rejsam izrailskaj avijakampanii «El‑Al» u tydniovy, zahadzia zapłanavany adpačynak, jaki pa časie vypadkova supaŭ ź niadaŭniaj zajavaj sp. Bien‑Arje nakont vykazvańniaŭ kiraŭnika biełaruskaj dziaržavy Alaksandra Łukašenki na sustrečy z žurnalistami rasijskich rehijanalnych ŚMI 12 kastryčnika».
25 kastryčnika Z. Bien‑Arje i I. Kojfman pavinny pačać vykanańnie svaich abaviazkaŭ u dyppradstaŭnictvie.
Źviestki pra toje, što Ź.Bien‑Arje adklikany dla kansultacyj u Tel‑Aviŭ «u suviazi ź niadaŭnimi vykazvańniami prezidenta Biełarusi Alaksandra Łukašenki», raspaŭsiudzili viečaram 18 kastryčnika niekatoryja izrailskija ŚMI.
AH
* * *
«Vykazvańni prezidenta Biełarusi na adras jaŭrejaŭ vyklikajuć ździŭleńnie i škadavańnie» — tak prakamientavaŭ pasoł Izraila ŭ Biełarusi Ziejeŭ Bien‑Arje ŭ intervju BiełaPAN słovy Alaksandra Łukašenki, što prahučali 12 kastryčnika padčas sustrečy z pradstaŭnikami rasijskich rehijanalnych ŚMI.
 Ziejeŭ Bien-Arje |
Padčas pres‑kanfierencyi prezident, u pryvatnaści, zajaviŭ:
«Kali vy byli ŭ Babrujsku, vy bačyli, u jakim stanie horad. U jaho strašna było zajści! Śvinušnik byŭ! Heta ŭ asnoŭnym byŭ jaŭrejski horad. Nu, vy viedajecie, jak jaŭrei staviacca da miesca, dzie jany žyvuć. Pahladzicie ŭ Izraili, ja voś byŭ...».
Pavodle słoŭ izrailskaha dypłamata, u vykazvańniach biełaruskaha prezidenta «čujucca vodhuki daŭno, jak ja spadziavaŭsia, pachavanaha historyjaj adukavanaha čałaviectva mifu ab jaŭrejach nieachajnych, brudnych, z smurodam, mifu antysiemickaha».
«Takoje ŭražańnie, što Babrujsk byŭ niezaležnaj jaŭrejskaj votčynaj sa svaim asobnym biudžetam, a nie adnym ź biełaruskich haradoŭ, dzie adkaznaść za dobraŭparadkavańnie i srodki dla hetaha byli ŭ rukach aficyjnych uładaŭ. Dziakuj Bohu, što zaraz znachodziać srodki na dobraŭparadkavańnie», — skazaŭ pasoł.
Razam z tym jon vykazaŭ pažadańnie, kab «biełaruskija harady dasiahnuli ŭzroŭniu municypalnych i naohuł sacyjalnych słužb Izraila ź jaho, skažam, miedycynskim absłuhoŭvańniem, kłopatam ab sastarełych i invalidach, baraćboj z narkotykami, ałkahalizmam i nasillem u siamji, asnaščeńniem dziciačych sadkoŭ i škoł, chacia prezident i ŭbačyŭ dzieści niepadstryžanuju travu».
Zakranuŭšy pytańnie ab viartańni ŭ krainu jaŭrejaŭ, Ź.Bien‑Arje zaznačyŭ, što
«heta, kaniešnie, sprava Biełarusi — kaho prymać, a kaho nie». «Sa svajho boku jak pasoł Izraila chaču skazać, što Dziaržava Izrail, źjaŭlajučysia nacyjanalnym domam jaŭrejaŭ, prymała, prymaje i budzie prymać usich jaŭrejaŭ, jakija žadajuć pryjechać da nas, niezaležna ad taho, jość u ich hrošy ci nie», — padkreśliŭ dypłamat.
Izrailski pasoł taksama vykazaŭ nadzieju na toje, «što ŭ Biełarusi, na ziamli jakoj zahinuła ad ruk nacystaŭ i ich dapamahatych ledź ci nie ŭsia, adna z samych vialikich u Jeŭropie jaŭrejskich abščyn, buduć z bolšaj uvahaj stavicca da prajaŭ antysiemityzmu (naprykład, da niadaŭniaha apahanieńnia jaŭrejskich mahił u tym ža Babrujsku i nadpisam «Biej žydoŭ» na domie, dzie znachodzicca kiraŭnictva jaŭrejskaj abščyny ŭ Słucku) i ŭstrymlivacca ad lubych zajaŭ, jakija mohuć stymulavać padobnyja sumnyja źjavy».
Kamentar
Biełaruskaja presa, u tym liku "Naša Niva", starałasia abyści hetyja słovy A. Łukašenki maŭčańniem. Hazety nie ŭklučyli ich u svaje spravazdačy pra tuju pres-kanferencyju. Heta było, pamiž inšaha, ad niežadańnia pryciahvać uvahu da vykazvańniaŭ, jakija mohuć jašče bolej sapsavać i biez taho kašmarny vobraz Biełarusi i biełaruskaha narodu ŭ śviecie.
Izrail nie zmaŭčaŭ.
Słova - nie vierabiej. Heta adzin z najhoršych dyplamatyčnych prakołaŭ našaha kiraŭnictva, jaki nadoŭha azmročyć naš imidž, - nie vypadkovy prakoł, a prostaje nastupstva palityčnaje hulni, jakaja viadziecca na rasiejskim poli.
Što ž napiša pra heta "Sovietskaja Biełoruśsija"? Jaje niaźmienny redaktar Pavał Jakubovič? I ci stanie heta choć dla kahości ŭ našaj dziaržavie nahodaj dla pieraacenki kaštoŭnaściaŭ? Chočacca vieryć, što tak.
Niama horš dla Respubliki, kali jaje dziejačy pačynajuć zarablać palityčny kapitał na prynižeńni nacyjanalnych ci moŭnych hrupaŭ - jak heta ŭžo było z palakami (narkotyki i łajanka Borys), ci biełaruskamoŭnymi, jakich peŭnyja ludzi inačaj jak "śviadomymi", z kplivaj intanacyjaj, nie nazyvajuć.
Motašlivaja bryda stała normaj.
Što da słovaŭ, jakija tak baluča apiakli žydoŭ, to heta nie byli słovy biełaruskaha narodu. Biełaruski narod svaje słovy pra habrejaŭ skazaŭ daŭno - vusnami Kupały, Biaduli, Baradulina.
Andrej Dyńko
