U čaćvier u mienskim ofisie ABSE lidery abjadnanych demsiłaŭ sustrelisia z dakładčykam palityčnaha kamitetu Parlamenckaj Asamblei Rady Eŭropy Andrea Ryhoni.
Staršynia Abjadnanaj hramadzianskaj partyi Anatol Labiedźka padziakavaŭ spadaru Ryhoni za jahonuju zajavu — toj kazaŭ, što pryjedzie ŭ Miensk tolki kali Eŭrapiejski marš projdzie biez ekscesaŭ i pravakacyjaŭ.
Lidery apazycyi zaklikali spadara Ryhoni j mižnarodnuju supolnaść pastavicca z toj ža ŭvahaj da Sacyjalnaha maršu.
Spadar Labiedźka zajaviŭ paśla sustrečy: “Ryhoni raście. Ja baču dynamiku rostu paraŭnalna z papiarednimi sustrečami. I ja
dumaju, što krytyka, jakaja prahučała z našych vusnaŭ napiaredadni jaho pryjezdu, taksama spryjała tamu, kab jon bolš daskanała vyvučaŭ sytuacyju. Niekalki pryncypovych rečaŭ, jakija jon zajaviŭ. Pieršaje, što jość roźnica — dyjaloh, status specyjalna zaprošanaha i stałaje siabroŭstva ŭ arhanizacyi. Heta vielmi važna, jon bačyć hetuju roźnicu. Jon prychilna pastaviŭsia da prapanovy, jakaja była nami ahučanaja, — pytańnie pra status specyjalna zaprošanaha nia moža być razhledžanaje raniej, čym projdzie vybarčaja kampanija. Tolki paśla hetaha my možam. Dahetul my možam abmiarkoŭvać temu dyjalohu. Jon skazaŭ, što sytuacyja takaja: pierad nami nie šaša, a maleńkaja ściežka, i pa joj
treba iści. I my tut taksama zhodnyja”.