«Padčas źniavoleńnia na Akreścina mianie vyklikali ŭ kabiniet, dzie siadzieŭ pradstaŭnik vajenkamata Baranavičaŭ (u hetym horadzie ja prapisany), niekalki supracoŭnikaŭ KDB i niejki čałaviek ź videakamieraj. Pradstaŭnik vajenkamata aznajomiŭ mianie z dakumientam, u jakim pieraličanyja miery za parušeńnie pravił voinskaha ŭliku. Skazali, što ja pavinien prajści miedkamisiju. Dali pozvu ŭ vajenkamat pad rośpis. Supracoŭniki KDB uvieś hety čas pahroźliva maŭčali», — paviedamiŭ Mikita Sasim pres‑centru Chartyi'97.
Paśla vychadu na svabodu (Sasim adsiedzieŭ 5 sutak aryštu za ŭdzieł u padrychtoŭcy Jeŭrapiejskaha Marša) apazicyjanier pajechaŭ u Baranavičy — prachodzić miedkamisiju. Lekary vajenkamata, pravieryŭšy zdaroŭje patencyjnaha pryzyŭnika, pryjšli da vysnovy, što jamu nieabchodna prajści dadatkovaje abśledavańnie ŭ miascovaj paliklinicy — dahetul adčuvajucca nastupstvy čerapna‑mazhavoj traŭmy, naniesienaj Sasimu biełaruskimi amapaŭcami.
Nahadajem, što 16 vieraśnia 2005 hoda milicyja razahnała ŭ Miensku akcyju ŭ pamiać źnikłych i adniała ŭ jaje ŭdzielnikaŭ partrety źnikłych palitykaŭ i nacyjanalnyja ściahi. U toj dzień moładzievy lider Mikita Sasim padniaŭ nad hałavoj svaju džynsavuju kašulu jak simvał supracivu dyktatury. Žorstka źbity AMAPam jon patrapiŭ u špital z strasańniem mozhu. 14 sakavika 2006 hoda, niezadoŭha da prezidenckich vybaraŭ, Mikitu Sasima aryštavali. AMAP schapiŭ jaho prosta na vulicy ŭ Miensku.
U adździaleńni milicyi Mikitu stała drenna, «chutkaja dapamoha» adviezła jaho ŭ špital, dzie jamu terminova praapieravali apiendycyt. Apieracyja prajšła ŭnačy, a ranicaj, zakutaha ŭ kajdanki moładzievaha lidera, pryvieźli ŭ jaho rodny horad Baranavičy. U baranavickim špitali Mikita lažaŭ prykavanym da łožka i pad achovaj milicyi. Praz tydzień jaho kinuli ŭ kamieru śledčaha izalatara. Vyśvietliłasia, što suprać jaho ŭzbudžanaja kryminalnaja sprava «za ŭchileńnie ad voinskaj słužby». Pra źbićcio AMAPam i strasańnie mozhu vajenkamat vyrašyŭ nie ŭspaminać. 12 traŭnia 2006 hoda sudom Baranavickaha rajona i h. Baranavičy Mikita Samim byŭ prysudžany da 3 miesiacaŭ aryštu.
«Pakul na mnie «visieła» sudzimaść, mianie nielha było zaklikać u vojska. Ciapier ža jany majuć namier abuć mianie ŭ boty ŭ što b toje ni stała. Vidavočna, našamu vojsku brakuje sałdat, jakija adsiedzieli ŭ turmie za palityčnuju dziejnaść. Kali patraplu ŭ vojska, abaviazkova padzialusia dośviedam ź inšymi bajcami», — adznačyŭ Mikita Sasim u intervju pres‑centru Chartyi'97.
