 Pilip Orlik |
Paśla kala pamiatnaha znaka, pryśviečanaha hramadska‑palityčnamu dziejaču Ukrainy, adbyŭsia mitynh. Na im vystupili Nadzvyčajny i Paŭnamocny pasoł Ukrainy ŭ Respublicy Biełaruś Ihar Lichavy, staršynia Vilejskaha rajvykankama Jaŭhien Siniła, staršynia Vilejskaha rajonnaha savieta deputataŭ Jaŭhien Ihnatovič, staršynia hramadskaj kamisii pa ŭviekaviečańni pamiaci Pilipa Orlika biełaruskaha hramadskaha abjadnańnia ŭkraincaŭ «Vatra» Halina Kalužnaja.
24 žniŭnia rajonny saviet deputataŭ pryniaŭ rašeńnie nazvać imiem Pilipa Orlika novuju vulicu, jakaja znachodzicca pamiž vulicaj Vałynca i vulicaj 8 Sakavika. 13 kastryčnika na joj adbyłosia adkryćcio pamiatnaj doški.
Udzielniki śviata naviedali Vilejski krajaznaŭčy muziej, dzie była padrychtavanaja vystava z nahody jubileju słavutaha ŭradženca Vilejščyny. Paśla ŭ himnazii «Łohas» prajšoŭ kancert. Hości ź Minska, falkłorny ansambl pieśni i abradaŭ «Vatra» minskaha hramadskaha abjadnańnia ŭkraincaŭ «Zapovit» i narodny chor ukrainskaj pieśni «Krinicia» Respublikanskaha centra nacyjanalnych kultur, vykanali pieśni na ŭkrainskaj movie.
Himnazičny ansambl «Karusiel» praśpiavaŭ pieśniu pra Orlika na słovy Viktara Kažury. Vilejskija paety Kłaŭdzija Dubovik i Viktar Kažura pračytali svaje novyja vieršy, pryśviečanyja histaryčnamu dziejaču.
Padčas śviata pasoł Ukrainy Ihar Lichavy vykazaŭ svaju ŭściešanaść, što Pilip Orlik, syn dvuch bratnich narodaŭ, nie zabyty ni na Biełarusi, ni na Ukrainie, i padziakavaŭ biełarusam za vialikuju pracu pa zachavańni jaho imia. U płanach pasolstva — ustalavańnie hietmanu pomnika ŭ Kasucie, jaki budzie zrobleny na Ukrainie.
Jak raskazaŭ staršynia Vilejskaha savieta deputataŭ Jaŭhien Ihnatovič, u kasuckaj kaplicy viadziecca ramont, kab adkryć u joj muziej vioski i muziej Pilipa Orlika. 17 vieraśnia kaplicu błahasłaviŭ mitrapalit Fiłaret. Pa słovach Jaŭhiena Ihnatoviča, ramont zavieršycca ŭ listapadzie, ale adkryćcio muzieja adbudziecca praz hod.
