19 vieraśnia ŭ Alesia Jaźvinskaha kanfiskavali častku nakładu vydavanaj im hazety «Brama». Jon źviarnuŭsia ŭ rajonnuju prakuraturu i zapatrabavaŭ viarnuć jamu skanfiskavanyja asobniki hazety, a taksama pravieści z supracoŭnikami milicyi tłumačalnuju pracu. Vynik byŭ dosyć niečakany. Praz šeść dzion hazetu viarnuli, a supracoŭnik milicyi operupaŭnavažany Kisiel, jaki pravodziŭ pieratrus na kvatery Jaźvinskaha, paprasiŭ u redaktara prabačeńnia. Bolš za toje, z prakuratury pryjšoŭ adkaz, što sp. Kisiel atrymaŭ słužbovaje spahnańnie za pieravyšeńnie słužbovych paŭnamoctvaŭ.
Adnak ciešyŭsia sp. Jaźvinski nia doŭha. U škołu, dzie jon pracuje, z pravierkaj naviedałasia cełaja delehacyja z namieśnicaj zahadčyka rajonnaha adździełu adukacyi na čale. Pa vynikach pravierki piać nastaŭnikaŭ, i sp. Aleś u ich liku, atrymali vymovy. Zatym u škołu patelefanavali z abłasnoha adździełu adukacyi.
«Kiraŭnictva škoły paprasili mianie pavychoŭvać» — śmiajecca Aleś Jaźvinski. Apynułasia, što ŭ abłasny adździeł adukacyi z takoj prośbaj źviarnułasia abłasnoje ŭpraŭleńnie MUS. «Kazali, što ja vydaju hazetu, jakaja dyskredytuje ŭładu» — kaža vydaviec «Bramy». I dadaje: «Paprasiŭ pavychoŭvać milicyjantaŭ, a ŭ vyniku vychoŭvajuć mianie».